ಇ.ಡಿ.ಸಿ ಯಂತ್ರದ ಮೂಲಕ ಕಂದಾಯ ಪಾವತಿ ವ್ಯವಸ್ಥೆ: ಫೌಜಿಯಾ ತರನ್ನುಮ್

ಕಲಬುರಗಿ: ಕಲಬುರಗಿ ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಪಾಲಿಕೆಯ ಕರ ವಸೂಲಾತಿಯನ್ನು ಮತ್ತಷ್ಟು ಸರಳೀಕರಣ ಮಾಡಲು ಎಲೆಕ್ಟ್ರಾನಿಕ್ ಡೇಟಾ ಮಷಿನ್ ಸಾಫ್ಟವೇರ್ ಪರಿಚಯಿಸಲಾಗಿದ್ದು, ಮನೆ ಮನೆಗೆ ತೆರಳಿ ಸ್ಥಳದಲ್ಲಿಯೆ ಕಂದಾಯ ಹಣ ಪಾವತಿಸುವ ವ್ಯವಸ್ಥೆ ಜಾರಿಗೆ ತರಲಾಗುತ್ತಿದೆ ಎಂದು ಕಲಬುರಗಿ ಮಹಾನಗರ ಪಾಲಿಕೆಯ ಆಯುಕ್ತೆ ಬಿ.ಫೌಜಿಯಾ ತರನ್ನುಮ್ ಹೇಳಿದ್ದರು.

ಮಂಗಳವಾರ ಮಹಾನಗರ ಪಾಲಿಕೆಯ ನೂತನ ಕಟ್ಟಡದಲ್ಲಿ ಇ.ಡಿ.ಸಿ ಯಂತ್ರದ ಡೆಮೋ ಉದ್ಘಾಟಿಸಿ ಮಾತನಾಡಿ ಅವನ್ನು ಮುಂದೆ ಎಲೆಕ್ಟ್ರಾನಿಕ್ ಡೇಟಾ ಮಷಿನ್ ಮುಖಾಂತರ ಕಂದಾಯ ವಸೂಲಾತಿ ಪಡೆಯಲಾಗುವುದು. ಕ್ರೆಡಿಟ್ ಕಾರ್ಡ್, ಡೆಬಿಟ್ ಕಾರ್ಡ್, ಬ್ಯಾಂಕ್ ಚೆಕ್ ಅಥವಾ ಡಿ.ಡಿ. ಮುಖಾಂತರ ಕಂದಾಯ ಬಿಲ್ಲುಗಳನ್ನು ಪಾವತಿ ಮಾಡಬಹುದಾಗಿದೆ. ಪ್ರಾಯೋಗಿಕವಾಗಿ ಪಾಲಿಕೆ ವ್ಯಾಪ್ತಿಯ ೫ ವಾರ್ಡ್‌ಗಳಲ್ಲಿ ಆರಂಭದಲ್ಲಿ ಇದು ಜಾರಿಗೆ ತರಲಾಗುತ್ತಿದೆ. ತದನಂತರ ಸಾಧಕ-ಬಾಧಕಗಳನ್ನು ಅವಲೋಕಿಸಿ ಮುಂದಿನ ದಿನಗಳಲ್ಲಿ ಉಳಿದ ಎಲ್ಲಾ ೫೫ ವಾರ್ಡ್‌ಗಳಲ್ಲಿ ಆಸ್ತಿ ಪಾವತಿಗೆ ಇ.ಡಿ.ಸಿ ಯಂತ್ರ ಬಳಸಲಾಗುವುದು. ಇದಲ್ಲದೆ ಆನ್‌ಲೈನ್ ಮೂಲಕವು ಸಹ ಕರ ಪಾವತಿ ವ್ಯವಸ್ಥೆ ಜಾರಿಗೆ ತರಲು ಚಿಂತನೆ ನಡೆದಿದೆ ಎಂದರು.

ಈ ವ್ಯವಸ್ಥೆಯಿಂದ ಸಾರ್ವಜನಿಕರು ಮಹಾನಗರ ಪಾಲಿಕೆ ಕಛೇರಿಗೆ ಆಗಮಿಸಿ ಸರತಿ ಸಾಲಿನಲ್ಲಿ ನಿಂತು ಆಸ್ತಿ ತೆರೆಗೆಯನ್ನು ಕಟ್ಟುವುದು ತಪ್ಪುವುದಲ್ಲದೆ ಸಮಯದ ಉಳಿತಾಯವು ಆಗಲಿದೆ. ನೂತನ ವ್ಯವಸ್ಥೆ ಜಾರಿಗೆ ಸೆಮಿನರ್ ಕಂಪನಿ, ಎಚ್.ಡಿ.ಎಫ್.ಸಿ ಬ್ಯಾಂಕ್ ಪಾಲಿಕೆಯೊಂದಿಗೆ ಕೈಜೋಡಿಸಿದೆ. ಸಾರ್ವಜನಿಕರು ಈ ನೂತನ ವ್ಯವಸ್ಥೆ ಜಾರಿಗೆ ಪಾಲಿಕೆಯೊಂದಿಗೆ ಸಹಕರಿಸಬೇಕು. ಪ್ರತಿ ವಾರ್ಡ್‌ಗೆ ಓರ್ವ ಬಿಲ್ ಕಲೆಕ್ಟರ್‌ರಗಳಿದ್ದು, ಪ್ರಸ್ತುತ ೪೦ ಇ.ಡಿ.ಸಿ ಮಷಿನ್ ಪಾಲಿಕೆ ಹೊಂದಿದೆ ಎಂದರು.

ಈ ಸಂದರ್ಭದಲ್ಲಿ ಹೆಚ್‌ಡಿಎಫ್‌ಸಿ ಬ್ಯಾಂಕಿನ ವ್ಯವಸ್ಥಾಪಕ ಶಿವಶಂಕರ ಸೇರಿದಂತೆ ಪಾಲಿಕೆಯ ಅಧಿಕಾರಿಗಳು-ಸಿಬ್ಬಂದಿಗಳು ಇದ್ದರು.