ಬೆಲೆ ಏರಿಕೆ ಖಂಡಿಸಿ ಮಾ.೪ ರಂದು ಜನಾಂದೋಲನ

ವಾಡಿ: ಪೆಟ್ರೋಲ್ ಡೀಸೆಲ್ ಸೇರಿದಂತೆ ಇನ್ನಿತರ ಅಗತ್ಯ ವಸ್ತುಗಳ ಬೆಲೆ ಏರಿಕೆ ಖಂಡಿಸಿ ಸೋಷಲಿಸ್ಟ್ ಯುನಿಟಿ ಸೆಂಟರ್ ಆಫ್ ಇಂಡಿಯಾ (ಎಸ್‌ಯುಸಿಐ) ಕಮ್ಯುನಿಸ್ ಪಕ್ಷದ ನೇತೃತ್ವದಲ್ಲಿ ಮಾ.೪ ರಂದು ಕಲಬುರಗಿ ನಗರದಲ್ಲಿ ಜನಾಂದೋಲನಕ್ಕೆ ಕರೆ ನೀಡಲಾಗಿದೆ ಎಂದು ಪಕ್ಷದ ನಗರ ಸಮಿತಿ ಕಾರ್ಯದರ್ಶಿ ಕಾಮ್ರೇಡ್ ವೀರಭದ್ರಪ್ಪ ಆರ್.ಕೆ ತಿಳಿಸಿದ್ದಾರೆ.

ಹಳಕರ್ಟಿ ಗ್ರಾಮದಲ್ಲಿ ಎಸ್‌ಯುಸಿಐ ವತಿಯಿಂದ ಏರ್ಪಡಿಸಲಾಗಿದ್ದ ಜನಾಂದೋಲನ ಜಾಗೃತಿ ಸಭೆ ಉದ್ದೇಶಿಸಿ ಮಾತನಾಡಿದ ಹೋರಾಟಗಾರ ವೀರಭದ್ರಪ್ಪ, ತೈಲ ಬೆಲೆ ಗಗನಕ್ಕೇರುತ್ತಿರುವುದರಿಂದ ದೇಶಾದ್ಯಂತ ಬಡ ಜನರ ಬದುಕು ಬೀದಿಗೆ ಬಿದ್ದಿದೆ. ಜನಪರ ಸೋಗಿನ ಸರಕಾರಗಳು ಜನರ ಶೋಷಣೆಗೆ ನಿಂತಿವೆ. ಬಂಡವಾಳಶಾಹಿಗಳ ಹೊಟ್ಟೆ ತುಂಬಿಸಲು ಮುಂದಾಗಿರುವ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಬಿಜೆಪಿ ಸರಕಾರ, ಜನಸಾಮಾನ್ಯರ ಹೊಟ್ಟೆಯ ಮೇಲೆ ಬರೆ ಎಳೆಯುತ್ತಿದೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ಕಚ್ಚಾ ತೈಲದ ಬೆಲೆ ಕನಿಷ್ಟಮಟ್ಟದಲ್ಲಿದ್ದರೂ ಅತಿ ಹೆಚ್ಚು ತೆರಿಗೆ ವಿಧಿಸಲಾಗುತ್ತಿದೆ. ಎಲ್ಲಾ ರೀತಿಯ ಸಬ್ಸೀಡಿಗಳನ್ನು ವಾಪಸ್ಸು ಪಡೆಯಲಾಗುತ್ತಿದೆ. ಸರಕಾರಿ ಸ್ವಾಮ್ಯದ ಸಂಸ್ಥೆಗಳನ್ನು ಬಂಡವಾಳಶಾಹಿ ಸೋಷಕರ ಮಡಿಲಿಗೆ ಹಾಕಲಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಬ್ಯಾಂಕ್ ಖಾತೆಯಲ್ಲಿ ಕಡಿಮೆ ಹಣ ಜಮೆಯಿದೆ ಎಂಬ ಕಾರಣಕ್ಕೆ ಜನತೆಗೆ ದಂಡ ವಿಧಿಸಿ ಹಣ ದೋಚಲಾಗುತ್ತಿದೆ. ಜನಕಲ್ಯಾಣ ಯೋಜನೆಗಳಿಗೆ ಮೀಸಲಿದ್ದ ಅನುದಾನಕ್ಕೆ ಕತ್ತರಿ ಹಾಕಲಾಗಿದೆ. ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಗಳನ್ನು ಮಾರಾಟದ ಸರಕಾಗಿಸಿ ದುಡ್ಡಿದ್ದವರಿಗೆ ಮಾತ್ರ ಎನ್ನುವಂತಹ ಪರಸ್ಥಿತಿ ಸೃಷ್ಠಿಸಿದ್ದಾರೆ. ಜನರ ದುಡಿಮೆಯ ಬಹುಪಾಲು ಹಣ ಶಿಕ್ಷಣ ಮತ್ತು ಆರೋಗ್ಯಕ್ಕೆ ಖರ್ಚಾಗಿ ಬದುಕು ಮತ್ತೆ ಮತ್ತೆ ದಿವಳಿಯಾಗುತ್ತಿದೆ. ಸರಕಾರದ ಈ ಹಗಲು ದರೋಡೆಯನ್ನು ಸಮರ್ಥಿಸಲು ಒಂದು ದೊಡ್ಡ ಪಡೆಯನ್ನೇ ರಚಿಸಿ ಜನರ ಮಧ್ಯೆ ಬಿಡಲಾಗಿದೆ. ಆ ತಂಡ ಹಸಿ ಸುಳ್ಳುಗಳನ್ನು ಬಿತ್ತರಿಸಿ ಜನರ ಆಲೋಚನೆ ಸರಕಾರದ ವಿರುದ್ಧ ತಿರುಗದಂತೆ ನೋಡಿಕೊಳ್ಳುತ್ತಿದೆ. ಸರಕಾರದ ಜನವಿರೋಧಿ ನೀತಿಗಳನ್ನು ಟೀಕಿಸಿದರೆ ದೇಶದ್ರೋಹಿ ಪಟ್ಟ ಕಟ್ಟಲಾಗುತ್ತಿದೆ ಎಂದು ಕಿಡಿಕಾರಿದರು.

ಭಾಷೆ, ಗಡಿ, ದೇಶಾಭೀಮಾನದಂತಹ ಸೂಕ್ಷ್ಮ ವಿಷಯಗಳನ್ನು ಅಸ್ತ್ರಗಳನ್ನಾಗಿ ಬಳಸುತ್ತಿರುವ ಬಿಜೆಪಿ ಸರಕಾರದ ಹಿಟ್ಲರ್ ಆಡಳಿತದ ವಿರುದ್ಧ ಜನತೆ ಒಗ್ಗಟ್ಟಾಗುವ ಅಗತ್ಯವಿದೆ. ಪರಿಣಮ ಎಸ್‌ಯುಸಿಐ ಪಕ್ಷ ದೇಶಾದ್ಯಂತ ಜಿಲ್ಲಾ ಕೇಂದ್ರಗಳಲ್ಲಿ ಜನಾಂದೋಲನ ರೂಪಿಸಲು ಕರೆ ಕೊಟ್ಟಿದೆ. ಮಾ.೪ ರಂದು ಕಲಬುರಗಿ ನಗರದಲ್ಲಿ ಬಿಜೆಪಿ ಸರಕಾರದ ವಿರುದ್ಧ ಕೆಂಬಾವುಟಗಳು ಹಾರಾಡಲಿವೆ. ಸಾವಿರಾರು ಜನರು ಬೆಲೆ ಏರಿಕೆ ವಿರುದ್ಧ ತಮ್ಮ ಆಕ್ರೋಶ ಮೊಳಗಿಸಲಿದ್ದಾರೆ ಎಂದರು.

ಎಸ್‌ಯುಸಿಐ ಪಕ್ಷದ ಮಲ್ಲಿನಾಥ ಹುಂಡೇಕಲ್, ರೈತ ಕೃಷಿ-ಕಾರ್ಮಿಕ ಸಂಘಟನೆಯ ಜಿಲ್ಲಾ ಉಪಾಧ್ಯಕ್ಷ ಗುಂಡಣ್ಣ ಎಂ.ಕೆ, ಮುಖಂಡರಾದ ಮಲ್ಲಿಕಾರ್ಜುನ ಗಂದಿ, ಶಿವುಕುಮಾರ ಆಂದೋಲಾ, ಚೌಡಪ್ಪ ಗಂಜಿ, ದೊಡ್ಡಪ್ಪ ಹೊಸೂರ, ಅಯ್ಯಪ್ಪ ಹುಳಗೋಳ, ಗೌತಮ ಪರತೂರಕರ ಪಾಲ್ಗೊಂಡಿದ್ದರು.