ಕಸಾಪ ಚುನಾವಣೆ: ನಿರಗುಡಿಗೆ ಸಮುದಾಯ ಟೀಂ ಬೆಂಬಲ

ಕಲಬುರಗಿ: ಜಿಲ್ಲಾ ಕಸಾಪ‌ಚುನಾವಣೆಗೆ ಸ್ಪರ್ಧಿಸುತ್ತಿರುವವರಲ್ಲಿ ಬಿ.ಎಚ್. ನಿರಗುಡಿ ಸಮರ್ಥರಿದ್ದು, ಈ ಬಾರಿಯ ಚುನಾವಣೆಯಲ್ಲಿ ಅವರಿಗೆ ಬೆಂಬಲಿಸುವುದಾಗಿ ಸಮುದಾಯ ಟೀಂ ನ ಪ್ರಮುಖರಾದ ಡಾ. ಮೀನಾಕ್ಷಿ ಬಾಳಿ ತಿಳಿಸಿದರು.

ಈಗಾಗಲೇ ಜಿಲ್ಲಾ ಕಸಾಪ ಗೌರವ ಕಾರ್ಯದರ್ಶಿಯಾಗಿ ಕಾರ್ಯ ನಿರ್ವಹಿಸಿರುವ ಅನುಭವ ಇರುವ ನಿರಗುಡಿಯವರು, ಖಾಸಗಿ ಕಾಲೇಜೊಂದರ ಪ್ರಾಚಾರ್ಯರಾಗಿ, ಸಾಹಿತಿಯಾಗಿ, ಪತ್ರಕರ್ತರಾಗಿ ಕಾರ್ಯನಿರ್ವಹಿಸುತ್ತಿದ್ದು, ಕಸಾಪಕ್ಕೆ ಇಂತಹ ಜ್ರಿಯಾಶೀಲರನ್ನು ಬಯಸುತ್ತದೆ ಎಂದು ಇಂದು ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

ಈಗಾಗಲೇ ಸಾಹಿತ್ಯಕ ವಾತಾವರಣದಿಂದ ದೂರ ಸರಿದಿರುವ ಪರಿಷತ್ ನಲ್ಲಿ ಮತ್ತೆ ಸಾಹಿತ್ಯಕ ಸಾಂಸ್ಕೃತಿಕ ವಾತಾವರಣ ತರುವುದಕ್ಕಾಗಿ ನಿರಗುಡಿ ಅವರನ್ನು ಆಯ್ಕೆ ಮಾಡುವುದು ಅತ್ಯಂತ ಅವಶ್ಯಕವಾಗಿದೆ ಎಂದರು.

ನುಡಿಯಲ್ಲಿ ಸಜ್ಜನಿಕೆ, ನಡೆಯಲ್ಲಿ ಸರಳತೆ ಮೈಗೂಡಿಸಿಕೊಂಡಿರುವ ನಿರಗುಡಿಯವರ ವ್ಯಕ್ತಿತ್ವ ಪರಿಷತ್ತಿನ ಘನತೆಗೆ ತಕ್ಕುದಾಗಿದೆ ಎಂದು ವಿವರಿಸಿದರು.

ಸರ್ವಾಧಿಕಾರಿ ಧೋರಣೆ ಇಲ್ಲದ ಎಲ್ಲರೊಂದಿಗೆ ಒಂದಾಗಿ, ಚೆಂದಾಗಿ ಬೆರೆಯುವ ನಿರಗುಡಿಯವರನ್ನು ಆಯ್ಕೆ ಮಾಡುವುದು ಪ್ರತಿಯೊಬ್ಬ ಪ್ರಜ್ಞಾವಂತ ಮತದಾರರ ಕರ್ತವ್ಯವಾಗಿದೆ ಎಂದು ತಿಳಿಸಿದರು.

ಡಾ. ಶ್ರೀಶೈಲ ಘೂಳಿ, ಡಾ. ಪ್ರಭು ಖಾನಾಪುರೆ, ನಾಗೇಂದ್ರಪ್ಪ ಅವರಾದಿ, ದತ್ತಾತ್ರೇಯ ಇಕ್ಕಳಕಿ, ಶರಣಗೌಡ ಪಾಟೀಲ, ಗಣಪತಿ ಕೊಡ್ಲೆ, ಪ್ರೇಮಾನಂದ ಚಿಂಚೋಳಿಕರ, ಭೀಮಾಶಂಕರ ಉಡಗಿ ಇತರರು ಸುದ್ದಿಗೋಷ್ಠಿಯಲ್ಲಿ ಇದ್ದರು.