ಶಹಾಬಾದನಲ್ಲಿ ಯೋಗ ಕಲಿಸಿದ ಸಾಧಕರು

ಶಹಾಬಾದ: ಅಂತರಾಷ್ಟ್ರೀಯ ಯೋಗ ದಿನಾಚಾರಣೆ ಹಿನ್ನೆಲೆಯಲ್ಲಿ ಜೂನ್ ೨೧ರಂದು ಆಚರಿಸಲಾಗುತ್ತದೆ. ನಗರದ ಅಲಸ್ಟಾಂ ಕಾರ್ಖಾನೆಯ ನಿವೃತ್ತ ಕಾರ್ಮಿಕ ಮತ್ತು ಸಾಹಿತಿಗಳಾದ ಹೆಚ್.ಬಿ.ತೀರ್ಥೆ ಹಾಗೂ ಮೋಹನ ಘಂಟ್ಲಿ ಅವರು ಯೋಗವನ್ನು ಕಲಿತು ದೈಹಿಕ ಹಾಗೂ ಮಾನಸಿಕ ಸಮಸ್ಯೆಗಳಿಗೆ ಯೋಗವೇ ಪರಿಹಾರ ಎಂಬುದನ್ನು ಅರಿತು ಜನ ಸಮುದಾಯಕ್ಕೆ ಯೋಗದ ಅರಿವು ಮೂಡಿಸುವತ್ತ ಶಿಬಿರಗಳನ್ನು ಆಯೋಜಿಸುತ್ತ ಬಂದಿದ್ದಾರೆ.

ಯೋಗ ಕ್ಷೇತ್ರದಲ್ಲಿ ಸಾಧನೆ ಮಾಡಿ ಪಧಕ,ಪುರಸ್ಕಾರ ಪಡೆಯದೇ ಇದ್ದರೂ ಯೋಗವನ್ನು ಪ್ರತಿಯೊಬ್ಬರಿಗೂ ಕಲಿಸುವ ಮೂಲಕ ಸದೃಢ ಭಾರತವನ್ನು ನಿರ್ಮಾಣ ಮಾಡಬೇಕೆಂಬ ಹಂಬಲದಿಂದ ಸುಮಾರು ವರ್ಷಗಳಿಂದ ತರಬೇತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತ ಹಾಗೂ ತರಬೇತುದಾರರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.ಅಂತಹವರಲ್ಲಿ ನಗರದ ಅಲಸ್ಟಾಂ ಕಾರ್ಖಾನೆಯ ನಿವೃತ್ತ ನೌಕರ ಹೆಚ್.ಬಿ.ತೀರ್ಥೆ ಅವರು ಸಾಹಿತಿಗಳಾಗಿ ಅನೇಕ ಜನರಿಗೆ ಸಾಹಿತ್ಯಿಕ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ, ಯುವ ಜನರಲ್ಲಿ ಸಾಹಿತ್ಯದ ರುಚಿಯನ್ನು ಉಣಬಡಿಸಿದ್ದಾರೆ.

ಅಲ್ಲದೇ ಇವರು ಸುಮಾರು ವರ್ಷಗಳಿಂದ ಸಾಹಿತ್ಯ ಕ್ಷೇತ್ರವಲ್ಲದೇ ಯೋಗ ಕ್ಷೇತ್ರದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. ಪತಂಜಲಿ ಯೋಗ ಸಮಿತಿಯ ಒಡನಾಟದೊಂದಿಗೆ ಇವರು ಶಾಲಾ ಕಾಲೇಜುಗಳಲ್ಲಿ ಹಾಗೂ ಕಾರ್ಖಾನೆಯ ಅಧಿಕಾರಿ ವರ್ಗದವರಿಗೆ ಹಾಗೂ ಕಾಲೋನಿಯ ಮಕ್ಕಳಿಗೆ ತರಬೇತಿ ನೀಡುತ್ತಾ ಬಂದಿದ್ದಾರೆ.ಈಗ ಕಲಬುರಗಿಯ ನೃಪತುಂಗ ಕಾಲೋನಿಯಲ್ಲಿ ನೆಲೆಸಿದ್ದು, ಯಾರೇ ಕರೆ ಮಾಡಿ ಯೋಗ ತರಬೇತಿ ನೀಡಬೇಕೆಂದರೆ ತಕ್ಷಣವೇ ಹಾಜರಾಗುತ್ತಾರೆ.

ಮೋಹನ.ಹೆಚ್.ಘಂಟ್ಲಿ ಹಾಗೂ ನೀಲಗಂಗಮ್ಮ.ಎಮ್. ಘಂಟ್ಲಿ ದಂಪತಿಗಳು ಹೆಚ್.ಬಿ.ತೀರ್ಥೆ ಅವರಿಂದ ಸುಮಾರು ಒಂದುವರೆ ವರ್ಷ ನಿರಂತರ ಯೋಗ ತರಬೇತಿ ಪಡೆದು, ನಂತರ ಸುಮಾರು ಹತ್ತು ವರ್ಷಗಳ ಹಿಂದೆ ಪತಾಂಜಲಿ ಯೋಗ ಸಮಿತಿ ಹರಿದ್ವಾರ ವತಿಯಿಂದ ಆಯೋಜಿಸಲಾದ ಶಿಬಿರಲ್ಲಿ ರಾಮದೇವ ಬಾಬಾ ಮಾರ್ಗದರ್ಶನದಲ್ಲಿ ಯೋಗ ತರಬೇತಿ ಪಡೆದರು.ಅಂದಿನಿಂದ ಹೆಚ್.ಬಿ.ತೀರ್ಥೆ ಅವರ ಒಡನಾಟದಲ್ಲಿ  ಇವರು ನಗರದ ಅಲಸ್ಟಾಂ ಕಾರ್ಖಾನೆಯ ಶಹಾಬಾದ ಲಾಯನ್ಸ ಕ್ಲಬ್ ವತಿಯಿಂದ ಶಿಬಿರ ಏರ್ಪಡಿಸಿ ಯೋಗ ತರಬೇತಿ ನೀಡಿದರು.

ಹೀಗೆ ನಗರದ ಬಸವ ಸಮಿತಿ ಶಾಲೆ ಮಕ್ಕಳಿಗಾಗಿ, ರಾವೂರಿನ ಸಿದ್ಧಲಿಂಗೇಶ್ವರ ವಿದ್ಯಾಭಿವೃದ್ಧಿ ಸಂಸ್ಥೆಯ ವಿದ್ಯಾರ್ಥಿಗಳಿಗಾಗಿ, ಖಾಸಗಿ ಹಾಗೂ ಸರಕಾರಿ ಶಾಲೆಯ ಮಕ್ಕಳಿಗೆ ಹಾಗೂ  ಶಿಕ್ಷಕರಿಗಾಗಿ ತರಬೇತಿ ನೀಡಲಾಗಿದೆ. ಅಲ್ಲದೇ ತಾಲೂಕಿನ ಬಹುತೇಖ ಗ್ರಾಮಗಳಲ್ಲಿ ತೆರಳಿ ಯೋಗ ಶಿಬಿರವನ್ನು ಏರ್ಪಡಿಸಿ ಸೈ ಎನ್ನಿಸಿಕೊಂಡಿದ್ದಾರೆ. ಅಲ್ಲದೇ ಪತಂಜಲಿ ಯೋಗ ಸಮಿತಿ ರಚಿಸಿಕೊಂಡು ದೀಪಾ ಮೆಂಗಜಿ, ನಿರ್ಮಲಾ ರಾಮಪುರಕರ್, ಅನುಪಮಾ ಜಗತಾಪ್, ಸುಕೇಶನಿ ಫಂಡ್ ಅವರೊಂದಿಗೆ ನಗರದ ಮಹಿಳೆಯರಿಗೆ ಹಾಗೂ ಶಾಲೆಯ ಹೆಣ್ಣು ಮಕ್ಕಳಿಗೆ ಯೋಗ ತರಬೇತಿ ನೀಡುತ್ತಿದ್ದಾರೆ.  ಶಹಾಬಾದ ತಾಲೂಕಿನ ಸಾರ್ವಜನಿಕರಿಗಾಗಿ ಯೋಗ ಕಲಿಸಿ ನಿರೋಗಿಯಾಗಿ ಮಾಡಲು ಶ್ರಮ ವಹಿಸುತ್ತಿದ್ದಾರೆ.

ಯೋಗ ನಿತ್ಯ ಬದುಕಿನ ದಿನಚರಿಯಲ್ಲಿ ಅತ್ಯಂತ ಅವಶ್ಯಕವಾದ ಚಟುವಟಿಕೆಯಾಗಿದೆ. ಆದ್ದರಿಂದ ಪ್ರತಿಯೊಬ್ಬರೂ ಪೂರ್ಣ ಪ್ರಮಾಣದಲ್ಲಿ ಅನುಸರಿಸುವುದರ ಮೂಲಕ ಮನುಷ್ಯನ ಮಹಾಭಾಗ್ಯವಾದ ಆರೋಗ್ಯವನ್ನು ಸಂಪಾದಿಸಬೇಕು.ಯೋಗದಿಂದ ನಮ್ಮ ದೈಹಿಕ ಹಾಗೂ ಮಾನಸಿಕ ಕಾಯಿಲೆಗಳನ್ನು ದೂರ ಮಾಡಿ ನಮ್ಮನ್ನು ಕ್ರೀಯಾಶೀಲವನ್ನಾಗಿ ಮಾಡುತ್ತದೆ. – ಹೆಚ್.ಬಿ.ತೀರ್ಥೆ ಸಾಹಿತಿಗಳು ಹಾಗೂ ಯೋಗ ತರಬೇತಿದಾರರು ಶಹಾಬಾದ