ಕಾಂಗ್ರೇಸ್ ಪಕ್ಷದಿಂದಲೇ ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕಿದ್ದು, ಬಿಜೆಪಿಯಿಂದ ದೇಶಭಕ್ತಿಯ ಪಾಠ ಕಲಿಯಬೇಕಿಲ್ಲ: ಪ್ರಿಯಾಂಕ್ ಖರ್ಗೆ

ಕಲಬುರಗಿ: ಕಾಂಗ್ರೇಸ್ ಪಕ್ಷವಿಲ್ಲದಿದ್ದರೇ ದೇಶಕ್ಕೆ ಸ್ವಾತಂತ್ರ್ಯ ವಿರುತ್ತಿರಲಿಲ್ಲ ಹಾಗೂ ದೇಶದ ಜನರು ನೆಮ್ಮದಿಯಾಗಿರುತ್ತಿರಲಿಲ್ಲ‌. ಈ ವಸ್ತುಸ್ಥಿತಿ ಅರಿಯದ ಬಿಜೆಪಿಯವರು ನಮಗೆ ದೇಶಭಕ್ತಿಯ ಪಾಠ ಹೇಳುತ್ತಿದ್ದಾರೆ ಅವರಿಂದ ನಾವು ಪಾಠ ಕಲಿಯಬೇಕಿಲ್ಲ ಎಂದು ಸಮಾಜಕಲ್ಯಾಣ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರಾದ ಪ್ರಿಯಾಂಕ್ ಖರ್ಗೆ ಆಕ್ರೋಶ ವ್ಯಕ್ತಪಡಿಸಿದರು.

ಸೇಡಂ ಪಟ್ಟಣದಲ್ಲಿ ಏರ್ಪಡಿಸಲಾಗಿದ್ದ ಚುನಾವಣಾ ಸಭೆಯಲ್ಲಿ ಭಾಗವಹಿಸಿ ಅವರು ಮಾತನಾಡುತ್ತಿದ್ದರು. ಬಿಜೆಪಿಯ ಚುನಾವಣಾ ಪ್ರಣಾಳಿಕೆ ಗಮಿಸದರೆ ಅಲ್ಲಿ ಹುಸಿ ಮಾತುಗಳೆ ತುಂಬಿವೆ. ದೇಶ ಮೊದಲು, ಸೈನ್ಯಕ್ಕೆ ಹೆಚ್ಚಿನ ಶಕ್ತಿ ತುಂಬುತ್ತೇವೆ. ಕಾಶ್ಮೀರ ಕ್ಕೆ ಹೆಚ್ಚಿನದು ಮಾಡುತ್ತೇವೆ ಎಂದು ಕತೆ ಕಟ್ಟಿದ್ದಾರೆ.‌ ದೇಶದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಕಾಂಗ್ರೇಸ್ ಪಕ್ಷದ ನಾವು ಇವರಿಂದ ದೇಶಭಕ್ತಿಯ ಪಾಠ ಕಲಿಯಬೇಕಾ?  ಸ್ವಾತಂತ್ರ್ಯ ಹೋರಾಟ ಮಾಡುವಾಗ ನೀವು ಎಲ್ಲಿದ್ರಿ? ಅಸಂಖ್ಯಾತ ನಾಯಕರು ತ್ಯಾಗ ಬಲಿದಾನ ಮಾಡಿದಾಗ ನೀವು ಎಲ್ಲಿದ್ರಿ? ನಿಮ್ಮ ಪಕ್ಷದ ಯಾರಾದರು 50 ಜನ ದೇಶಕ್ಕಾಗಿ ತ್ಯಾಗ ಮಾಡಿದ್ದರೆ ಅವರ ಹೆಸರು ಹೇಳಿ ಎಂದು ಬಿಜೆಪಿಯ ನಾಯಕರನ್ನು ಪ್ರಶ್ನಿಸಿದರು.

ಕಾಂಗ್ರೇಸ್ ಪಕ್ಷದ ಮೂಲ ಉದ್ದೇಶವೇ ಎಲ್ಲ ವರ್ಗದ ಜನರ ಅಭ್ಯುದಯವಾಗಿದೆ. ಅದನ್ನೇ ನಾವು ಪ್ರಣಾಳಿಕೆಯಲ್ಲಿ ನಮೂದಿಸಿದ್ದೇವೆ  ಹಾಗೆ ಅದನ್ನೇ ಸಾಧಿಸಿ ತೋರಿಸುತ್ತೇವೆ ಎಂದು ಭರವಸೆ ನೀಡಿದರು. ನರೇಗಾ ಯೋಜನೆಯಡಿಯಲ್ಲಿ ಕೆಲಸ ಮಾಡಿವರಿಗೆ ಕೂಲಿ ಕೊಡಲು ಯೋಗ್ಯತೆಯಿಲ್ಲದ ಮೋದಿ ಕಾಂಗ್ರೇಸ್ ಅಧಿಕಾರದಲ್ಲಿ ಏನು ಅಭಿವೃದ್ದಿಯಾಗಿದೆ ಎಂದು ಪಶ್ನಿಸುತ್ತಿರುವುದು ಹಾಸ್ಯಾಸ್ಪದ ಎಂದರು. ರೈತರ ಸಾಲ ಮನ್ನಾ ಮಾಡುವ ಬೇಡಿಕೆ ಬಂದಾಗ ಅಂದಿನ ಸಿಎಂ ಯಡಿಯೂರಪ್ಪ ಸಾಲ ಮನ್ನಾ ಮಾಡಲು ನೋಟು ಪ್ರಿಂಟ್ ಮಷೀನು ಇಟ್ಟುಕೊಂಡಿಲ್ಲ ಅಂದಿದ್ದರು. ಆದರೆ, ಕೇಂದ್ರದಲ್ಲಿ ಕಾಂಗ್ರೇಸ್ ಪಕ್ಷದ ಮನಮೋಹನ ಸರಕಾರ 72,000 ಕೋಟಿ, ಸಿದ್ದರಾಮಯ್ಯನವರ ಸರಕಾರ 8 ಸಾವಿರ ಕೋಟಿ ಹಾಗೂ ಸಮ್ಮಿಶ್ರ ಸರಕಾರ 40,000 ಕೋಟಿ ರೈತರ ಸಾಲ ಮನ್ನಾ ಮಾಡಿದ್ದೇವೆ. ನೀವೆ ಯೋಚಿಸಿ ಯಾರಿಗೆ ರೈತರ ಕಾಳಜಿ ಇದೆ ಎಂದು ವಿವರಿಸಿದರು.

ಸಾಫ್ ನಿಯತ್ ಸಹಿ ವಿಕಾಸ್ ಮಂತ್ರ ಜಪಿಸುವ ಮೋದಿಯವರು ಅವರದೇ ರಾಜ್ಯ ನಾಯಕರಾದ ಯಡಿಯೂರಪ್ಪ, ಈಶ್ವರಪ್ಪ, ಅಶೋಕ ಮುಂತಾದವರು ರಾಜ್ಯದ ಸಮ್ಮಿಶ್ರ ಸರಕಾರ ಬೀಳಿಸುವ ಸರ್ವ ಪ್ರಯತ್ನ ಮಾಡುತ್ತಿದ್ದಾರೆ. ಗುರುಮಠಕಲ್ ಶಾಸಕರ ಮಗ ಬಿಎಸ್ವೈ ಆಪರೇಷನ್ ಕಮಲದ ಆಡಿಯೋ ಬಿಡುಗಡೆ ಮಾಡಿಸಿ ಅವರ ನೈಜಬಣ್ಣ ಬಯಲು ಮಾಡಿದ್ದಾರೆ. ಇದನ್ನ ಮೋದಿ ಸಾಫ್ ನಿಯತ್ ಎಂದು ಹೇಳುತ್ತಾರೆಯೇ ? ಎಂದು ಪ್ರಶ್ನಿಸಿದರು.

ಖರ್ಗೆ ಸಾಹೇಬರು ಏನು ಮಾಡಿದ್ದಾರೆ ಎಂದು ಕೆಲವರು ಕೇಳುತ್ತಿದ್ದಾರೆ. ಆದರೆ ಅವರೇನು ಮಾಡಿದ್ದಾರೆ?  ಬಿಜೆಪಿಯ ಆಮಿಷಕ್ಕೆ ಒಳಗಾಗಿದ್ದೇ ಅವರ ಸಾಧನೆನಾ?  ಎಂದು ಕುಟುಕಿದರು. ಇದಕ್ಕೂ ಮುನ್ನ ಮಾತನಾಡಿದ ಮಾಜಿ ಸಚಿವ ಡಾ ಶರಣಪ್ರಕಾಶ್ ಪಾಟೀಲ್ ಬಿಜೆಪಿ ಪಕ್ಷ ಧರ್ಮ ಗಳ ಹಾಗೂ ಜಾತಿಗಳ ಮಧ್ಯೆ ಜಗಳ ಹಚ್ಚುತ್ತಿದೆ. ದೇಶದ ಸಮಗ್ರ ಅಭಿವೃದ್ದಿಯಾಗಬೇಕಾದರೆ ಕಾಂಗ್ರೇಸ್ ಅಧಿಕಾರಕ್ಕೆ ತರಬೇಕು ಎಂದು ಮನವಿ ಮಾಡಿದರು.

ಮುಕ್ರಂಖಾನ್ ಮಾತನಾಡಿ ಮೋದಿ ನಿಮಗೆಲ್ಲ 15 ಲಕ್ಷ ಹಣ ಹಾಕಿದ್ರಾ? ಎಂದು ಪ್ರಶ್ನಿಸಿದರು.