ರುಕ್ಮಾಪುರ ಅಪ್ರಾಪ್ತ ಬಾಲಕಿ ಅಪಹರಣ ಖಂಡಿಸಿ ವಾಲ್ಮೀಕಿ ನಾಯಕ ಸಂಘ ಪ್ರತಿಭಟನೆ

ಸುರಪುರ: ತಾಲೂಕಿನ ರುಕ್ಮಾಪುರ ಗ್ರಾಮದ ದಲಿತ ಸಮುದಾಯದ ಅಪ್ರಾಪ್ತ ಬಾಲಕಿಯ ಅಪಹರಣ Sಂಡಿಸಿ ಹಾಗು ಅಪಹರಿಸಿದವರನ್ನು ಕೂಡಲೇ ಬಂಧಿಸುವಂತೆ ಆಗ್ರಹಿಸಿ ಶ್ರೀಮಹರ್ಷೀ ವಾಲ್ಮೀಕಿ ನಾಯಕ ಸಂಘದಿಂದ ತಹಸೀಲ್ ಕಚೇರಿ ಮುಂದೆ ಪ್ರತಿಭಟನೆ ನಡೆಸಲಾಯಿತು.

ಈ ಸಂದರ್ಭದಲ್ಲಿ ರೈತ ಸಂಘದ ಹಿರಿಯ ಮುಖಂಡ ಅಯ್ಯಣ್ಣ ಹಾಲಬಾವಿ ಮಾತನಾಡಿ, ಯಾವುದೇ ಹೆಣ್ಣುಮಗಳ ಬಗ್ಗೆ ಎಲ್ಲರಲ್ಲಿ ಗೌರವವಿರಬೇಕು.ಇದಕ್ಕೆ ಯಾವುದೇ ಜಾತಿ ಧರ್ಮ ಎನ್ನುವುದು ಬೇಕಿಲ್ಲ,ಇಲ್ಲಿ ಮಾನವೀಯತೆ ಮುಖ್ಯವಾಗಿದೆ.ಇದನ್ನು ಮರೆತು ಬಾಲಕಿಯನ್ನು ಅಪಹರಿಸಿದ ವ್ಯಕ್ತಿ ಯಾರೆ ಆಗಲಿ ಅವನಿಗೆ ಕಠಿಣ ಶಿಕ್ಷೆ ನೀಡಬೇಕು ಎಂದು ಆಗ್ರಹಿಸಿದರು.

ಸಂಘದ ಪ್ರಧಾನ ಕಾರ್ಯದರ್ಶಿ ವೆಂಕಟೇಶ ಬೇಟೆಗಾರ ಹಾಗು ಜಯಕರ್ನಾಟಕ ಅಧ್ಯಕ್ಷ ರವಿ ನಾಯಕ ಬೈರಿಮಡ್ಡಿ ಮಾತನಾಡಿ ರುಕ್ಮಾಪುರ ಗ್ರಾಮದ ನಮ್ಮ ಸಮುದಾಯದ ಕುಟುಂಬವೊಂದರ ೧೭ ವರ್ಷದ ಅಪ್ರಾಪ್ತ ಬಾಲಕಿ ಬಹಿರ್ದೇಸೆಗೆ ಹೋಗಿ ಬರುವಾಗ ವೆಂಕಟಾಪುರ ಗ್ರಾಮದ ಯುವಕ ಮಹಾಂತೇಶ ದೊರನಳ್ಳಿ ಎನ್ನುವವನು ತನ್ನ ಬೈಕ್ ಮೇಲೆ ಎತ್ತಿಕೊಂಡು ಹೋಗಿದ್ದಾನೆ. ತಮ್ಮ ಮಗಳನ್ನು ಕಳುಹಿಸಿಕೊಡುವಂತೆ ಬಾಲಕಿಯ ಪೋಷಕರು ವೆಂಕಟಾಪುರದ ಯುವಕನ ಮನೆಗೆ ಹೋಗಿ ಬೇಡಿಕೊಂಡರೆ ಅವರಿಗೆ ಅವಾಚ್ಯ ಪದಗಳಿಂದ ನಿಂದಿಸಿದ್ದಾರೆ.

ಇದರಿಂದ ಬಾಲಕಿಯ ಕುಟುಂಬ ತೀವ್ರ ನೊಂದಿದೆ,ಅಲ್ಲದೆ ಆ ಕುಟುಂಬ ಈಗ ಮಗಳನ್ನು ಕಳೆದುಕೊಂಡು ಸಂಕಷ್ಟ ಅನುಭವಿಸುತ್ತಿದೆ. ಅಪ್ರಾಪ್ತ ಯುವತಿಯನ್ನು ಅಪಹರಿಸಿರುವ ಯುವಕನನ್ನು ಕೂಡಲೇ ಬಂಧಿಸಬೇಕು ಮತ್ತು ಯುವತಿಯ ಮನೆಯವರಿಗೆ ನಿಂದಿಸಿರುವ ಯುವಕನ ಪೋಷಕರನ್ನು ಬಂಧಿಸಿ ಕಠಿಣ ಕ್ರಮ ಕೈಗೊಳ್ಳಬೇಕು ಇಲ್ಲವಾದಲ್ಲಿ ಇನ್ನು ಮೂರು ನಾಲ್ಕು ದಿನಗಳು ನೋಡುತ್ತೇವೆ ಅಷ್ಟರಲ್ಲಿ ಕ್ರಮ ಕೈಗೊಳ್ಳದಿದ್ದಲ್ಲಿ ಸುರಪುರ ಬಂದ್ ಮಾಡಿ ಪ್ರತಿಭಟನೆ ನಡೆಸಲಾಗುವುದು ಎಂದು ಎಚ್ಚರಿಸಿದರು.

ನಂತರ ಜಿಲ್ಲಾಧಿಕಾರಿಗಳಿಗೆ ಮತ್ತು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ ಬರೆದ ಮನವಿಯನ್ನು ಯಲ್ಲಪ್ಪ ಕಲ್ಲೋಡಿ ಓದಿ ನಂತರ ಗ್ರೇಡ-೨ ತಹಸೀಲ್ದಾರ್ ಸೂಫಿಯಾ ಸುಲ್ತಾನರ ಮೂಲಕ ಸಲ್ಲಿಸಿದರು.ಈ ಸಂದರ್ಭದಲ್ಲಿ ಸಂಘದ ಕಾರ್ಯಾಧ್ಯಕ್ಷ ರಮೇಶ ದೊರೆ ಆಲ್ದಾಳ,ಮಲ್ಲು ನಾಯಕ ಕಬಾಡಗೇರ,ಬಸವರಾಜ ಬಿಲಾಕಲ್,ಬಾಗನಾಥ ಗುತ್ತೇದಾರ ರುಕ್ಮಾಪುರ,ಮಲ್ಲಿಕಾರ್ಜುನ ಮಾಲಿ ಪಾಟೀಲ್,ಹಣಮಂತ ನಾಯಕ ಅಮ್ಮಾಪುರ ಸೇರಿದಂತೆ ಅನೇಕರಿದ್ದರು.