ತಡಕಲ್ ಗ್ರಾಪಂ ಆಡಳಿತ ವೈಫಲ್ಯ ಖಂಡಿಸಿ ಧರಣಿ ಸತ್ಯಾಗ್ರಹ

ಆಳಂದ: ತಾಲೂಕಿನ ತಡಕಲ್ ಗ್ರಾಮ ಪಂಚಾಯತ್ ಆಡಳಿತ ಸಂಪೂರ್ಣ ವೈಫಲ್ಯದಿಂದ ಕೂಡಿದೆ ತಕ್ಷಣವೇ ಮೇಲಾಧಿಕಾರಿಗಳು ಮಧ್ಯಸ್ಥಿಕೆ ವಹಿಸಿ ಸರಿಪಡಿಸಬೇಕು ಎಂದು ಪ್ರತಿಪಕ್ಷ ಬೆಂಬಲಿತ ಐವರು ಸದಸ್ಯರ ನೇತೃತ್ವದಲ್ಲಿ ಗ್ರಾಮದ ಕೆಲಸವರು ಪಂಚಾಯತ್ ಕಚೇರಿಯ ಮುಂದೆ ಧರಣಿ ಸತ್ಯಾಗ್ರಹ ನಡೆಸಿದರು.

ತಡಕಲ್ ಗ್ರಾಪಂ ಕಚೇರಿಯ ಮುಂದೆ ಮಂಗಳವಾರ ಗ್ರಾಪಂ ಸದಸ್ಯರಾದ ವಿಶ್ವನಾಥ ಬಿ. ಪವಾಡಶೆಟ್ಟಿ, ನಾಗೀಂದ್ರ ಥಂಭೆ, ಶರಣಪ್ಪ ಜಮಾದಾರ, ಪಾರ್ವತಿಬಾಯಿ ಥಂಭೆ ನೇತೃತ್ವದಲ್ಲಿ ಪ್ರತಿಭಟನೆ ಕೈಗೊಂಡು ಬೇಡಿಕೆಗೆ ಒತ್ತಾಯಿಸಿದರು.

ಸದಸ್ಯ ವಿಶ್ವನಾಥ ಬಿ. ಪವಾಡಶೆಟ್ಟಿ ಅವರು ಮಾತನಾಡಿ, ಗ್ರಾಪಂ ಅಧ್ಯಕ್ಷೆಯ ಪತಿ ಹಾಗೂ ಲೆಕ್ಕ ಸಹಾಯಕರ ಪತಿಯತರೆ ಆಡಳಿತ ಕಾರೋಬಾರ ಮಾಡುತ್ತಿದ್ದಾರೆ. ಈ ಕುರಿತು ವಿಡಿಯೂ ಸಹಿತ ಚಿತ್ರಕರಿಸಲಾಗಿದ್ದು, ಮೇಲಾಧಿಕಾರಿಗಳು ತಿಪ್ಪಿತಸ್ಥರ ಮೇಲೆ ಕ್ರಮ ಜರುಗಿಸಬೇಕು.

ಪಂಪ್ ಆಪರೇಟ್ ಹುದ್ದೆಯಲ್ಲಿದ್ದ ಸಿಬ್ಬಂದಿವೊಬ್ಬರು ಕಂಪ್ಯೂಟರ್ ಆಪರೇಟರ್ ಹುದ್ದೆ ನಿರ್ವಹಿಸುತ್ತಿದ್ದಾರೆ. ಗ್ರಾಪಂ ಆಡಳಿತಕ್ಕೆ ಸಂಬಂಧಿತ ದಾಖಲೆಗಳನ್ನು ಪಂಚಾಯತ್ ಕಚೇರಿಯಲ್ಲಿ ಇರದೆ ಮನೆಯಲ್ಲೇ ಇಟ್ಟುಕೊಳ್ಳುತ್ತಿದ್ದಾರೆ. ಕಾಮಗಾರಿಯಾದ ಕ್ರಿಯಾ ಯೋಜನೆಯ ಮಾಹಿತಿ ನೀಡುತ್ತಿಲ್ಲ ಎಂದು ಅವರು ಆರೋಪಿಸಿದರು.

ಹಲವು ಬಾರಿ ಕೇಳಿದ ಖರ್ಚು ವೆಚ್ಚದ ಲೆಕ್ಕವೇ ನೀಡುತ್ತಿಲ್ಲ. ತೆರಿಗೆÀ ವಸೂಲಾತಿಯ ಹಣದ ಲೆಕ್ಕ ನೀಡಬೇಕು. 15ನೇ ಹಣಕಾಸಿನ ಲೆಕ್ಕಪತ್ರ ವಿವರಣೆ, ನೀರು ನಿರ್ವಾಹಣೆ ಹಾಗೂ ನೈರ್ಮಲ್ಯದ ಖರ್ಚು ವ್ಯಚ್ಚದ ದಾಖಲಾತಿ ಸಮೇತ ಲೆಕ್ಕವನ್ನು ನೀಡಬೇಕು ಎಂದು ಅವರು ಒತ್ತಾಯಿಸಿದರು.

ಗ್ರಾಪಂನ ಹಿಂದಿನ ನಡಾವಳಿಯ ಪುಸ್ತಕದಲ್ಲಿ ಇಟ್ಟ ಕಾಮಗಾರಿಗಳನ್ನು ಪೂರ್ಣಗೊಳಿಸದೆ ಇರುವುದಕ್ಕೆ ಕಾರಣ ತಿಳಿಸಬೇಕು ಹಾಗೂ ತಕ್ಷಣವೇ ಈ ಕಾಮಗಾರಿಯನ್ನು ಪೂರ್ಣಗೊಳಿಸಬೇಕ ಎಂದರು.

ತಡಕಲ್ ಗ್ರಾಮದಲ್ಲಿನ ಸರ್ಕಾರಿ ಬಾವಿಯ ನೀರು ತುಂಬಿ ಹೊಲಸಾಗಿದ್ದು ಸ್ವಚ್ಛಗೊಳಿಸಿ ಶುದ್ದ ನೀರು ನಿಲ್ಲಿಸಿ ಸಾರ್ವಜನಿಕರ ಬಳಕೆಗೆ ಅನುಕೂಲ ಮಾಡಿಕೊಡಬೇಕು ಎಂದು ಒತ್ತಾಯಿಸಿದರು.

ಸದಸ್ಯ ನಾಗೇಂದ್ರ ಥಂಭೆ ಅವರು, ಕಣ್ಮಸ್ ಗ್ರಾಮದಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕವನ್ನು ನಿರ್ಮಿಸಬೇಕು. ಕಚ್ಚಾರಸ್ತೆ ನಿರ್ಮಾಣ, ಚರಂಡಿ ನಿರ್ಮಾಣ ಹಾಗೂ ಸಿಮೆಂಟ್ ರಸ್ತೆಗಳ ನಿರ್ಮಾಣ ಸೇರಿದಂತೆ ಮೂಲಸೌಲಭ್ಯಗಳನ್ನು ಒದಗಿಸಬೇಕು ಎಂದು ಒತ್ತಾಯಿಸಿದರು.

ಗ್ರಾಪಂ ಸದಸ್ಯರಾದ ಶರಣಪ್ಪ ಜಮಾದಾರ, ಪಾರ್ವತಿಬಾಯಿ ಥಂಭೆ ಸೇರಿದಂತೆ ತಾಪಂ ಮಾಜಿ ಅಧ್ಯಕ್ಷ ಬಸವರಾಜ ಬವಾಡಶೆಟ್ಟಿ, ಶ್ರೀಮಂತ ಕೊಡ್ಲೆ, ಧರ್ಮಣ್ಣಾ ಪೂಜಾರಿ, ಬಸವರಾಜ ಬಿರಾದಾರ, ನಾಗಣ್ಣಾ ಗೌರೆ, ಸಾಯಬಣ್ಣಾ ಗುಗರೆ, ಚಂದ್ರಕಾಂತ ಮಾಳಗೆ, ಶ್ರೀಶೈಲ ಗುಗರೆ, ಬಸಣ್ಣಾ ಅಳ್ಳೆ, ಸುಭಾಷ ಹಳಖೇಡೆ, ಅನೀಲ ಸ್ವಾಮಿ, ಚನ್ನವೀರ ರುದ್ರವಾಡಿ ಸೇರಿದಂತೆ ಮತ್ತಿತರು ಪಾಲ್ಗೊಂಡಿದ್ದರು.

ಧರಣಿ ಸ್ಥಳಕ್ಕೆ ತಾಲೂಕು ಪಂಚಾಯತ್ ಕಾರ್ಯನಿರ್ವಾಹಕ ಅಧಿಕಾರಿ ನಾಗಮೂರ್ತಿ ಕೆ. ಶೀಲವಂತ ಅವರು ಧರಣಿ ನಿರತರಿಂದ ಮನವಿ ಸ್ವೀಕರಿಸಿ ಬೇಡಿಕೆಗೆ ಸ್ಪಂದಿಸಲಾಗುವುದು. ಕಾಲಾವಕಾಶ ನೀಡಬೇಕು ಎಂದು ಭರವಸೆ ನೀಡಿದ ಮೇಲೆ ಮುಖಂಡರು ಧರಣಿ ಹಿಂದಕ್ಕೆ ಪಡೆದುಕೊಂಡರು.