ಬುದ್ಧನ ಮೂರ್ತಿ ಧ್ವಂಸಗೊಳಿಸಿದವರ ಬಂಧಿಸಲು ಪೊಲೀಸರಿಗೆ ಒತ್ತಾಯಿಸುವೆ: ಶಾಸಕ ರಾಜುಗೌಡ

ಸುರಪುರ: ಜಗತ್ತಿಗೆ ಶಾಂತಿ ಬೋಧಿಸಿದ ಮಹಾತ್ಮ ಗೌತಮ್ ಬುದ್ಧರ ಮೂರ್ತಿ ಧ್ವಂಸಗೊಳಿಸಿದ್ದು ನೋವಿನ ಸಂಗತಿಯಾಗಿದೆ,ಯಾರೇ ಮಾಡಿರಲಿ ಅವರನ್ನು ಬಂಧಿಸಿ ಕ್ರಮ ಕೈಗೊಳ್ಳಲು ಪೊಲೀಸರಿಗೆ ಒತ್ತಾಯಿಸುವುದಾಗಿ ಶಾಸಕ ನರಸಿಂಹ ನಾಯಕ (ರಾಜುಗೌಡ) ತಿಳಿಸಿದರು.

ನಗರದ ಗೋಲ್ಡನ್ ಕೇವ್ ಗವಿ ಬುದ್ಧ ವಿಹಾರಕ್ಕೆ ಸೋಮವಾರ ಬೆಳಿಗ್ಗೆ ಭೇಟಿ ನೀಡಿ ಕಿಡಿಗೇಡಿಗಳಿಂದ ಧ್ವಂಸಗೊಂಡ ಮೂರ್ತಿಯನ್ನು ವೀಕ್ಷಿಸಿ ಮಾತನಾಡಿ,ಬುದ್ಧನ ಸಂದೇಶವನ್ನು ಅರಿತವರು ಇಂತಹ ಕೃತ್ಯ ಮಾಡುವುದಿಲ್ಲ,ಯಾರೋ ತಿಳವಳಿಕೆ ಇಲ್ಲದವರು ಇಂತಹ ಕೆಲಸ ಮಾಡಿದ್ದಾರೆ,ಯಾರೇ ಆಗಲಿ ಅವರ ಮೇಲೆ ಕ್ರಮ ಕೈಗೊಳ್ಳಲು ತಿಳಿಸುವುದಾಗಿ ಹೇಳಿದರು.ಅಲ್ಲದೆ ಇದು ತುಂಬಾ ಪ್ರಶಾಂತವಾದ ಸ್ಥಳವಾಗಿದ್ದು ಪ್ರವಾಸೋದ್ಯಮ ಇಲಾಖೆಯಿಂದ ಅಭಿವೃಧ್ಧಿಗೆ ಒತ್ತು ನೀಡುವುದಾಗಿ ತಿಳಿಸಿದರು.ಅಲ್ಲದೆ ಈಗ ಧ್ವಂಸಗೊಂಡಿರುವ ಬುದ್ಧನ ಮೂರ್ತಿಯ ಬದಲಾಗಿ ಹೊಸ ಮೂರ್ತಿಯನ್ನು ಕೊಡಿಸುವುದಾಗಿ ಭರಸವೆ ನೀಡಿದರು.

ಉಪಸ್ಥಿತರಿದ್ದ ವರಜ್ಯೋತಿ ಬಂತೇಜಿ ಮಾತನಾಡಿ,ಬುದ್ಧ ಜಗತ್ತಿಗೆ ಶಾಂತಿ ಬೋಧಿಸಿದ ಮಹಾತ್ಮ,ಆತನ ಮೂರ್ತಿಯನ್ನು ಧ್ವಂಸಗೊಳಿಸಿದವರ ಬಗ್ಗೆ ನಾವು ಆಕ್ರೋಶ ವ್ಯಕ್ತಪಡಿಸುವ ಬದಲಾಗಿ,ಹೊಸದಾದ ಮೂರ್ತಿಯನ್ನು ಪ್ರತಿಷ್ಠಾಪಿಸಿ ಧ್ವಂಸಗೊಳಿಸಿದವರ ದುರ್ಬುದ್ಧಿಯನ್ನು ಬುದ್ಧ ದೂರಗೊಳಿಸಲೆಂದು ಪ್ರಾರ್ಥಿಸೋಣ ಎಂದರು.

ಈ ಸಂದರ್ಭದಲ್ಲಿ ಭಾಗವಹಿಸಿದ್ದ ದಲಿತ ಮುಖಂಡರು ಮಾತನಾಡಿ,ಹಿಂದಿನಿಂದಲೂ ಕೂಡ ಇಲ್ಲಿ ಕೆಲವು ಕಿಡಿಗೇಡಿಗಳು ಅನೈತಿಕ ಚಟುವಟಿಕೆಗಳನ್ನು ನಡೆಸುತ್ತಾರೆ.ಅದರ ಕುರಿತು ಪೊಲೀಸರಿಗೆ ಅನೇಕ ಬಾರಿ ಮನವಿ ಮಾಡಿಕೊಂಡರು ಪ್ರಯೋಜನೆಯಾಗಿಲ್ಲ ಎಂದು ಬೇಸರ ತೋಡಿಕೊಂಡರು.ಈಗ ಮೂರ್ತಿ ಧ್ವಂಸಗೊಳಿಸಿದವರನ್ನು ಕೂಡಲೇ ಬಂಧಿಸಿ ಕಠಿಣ ಶಿಕ್ಷೆಗೊಳಪಡಿಸಬೇಕೆಂದು ಆಗ್ರಹಿಸಿದರು.

ಈ ಸಂದರ್ಭದಲ್ಲಿ ನಗಸಭೆ ಉಪಾಧ್ಯಕ್ಷ ಮಹೇಶ ಪಾಟೀಲ್,ಸದಸ್ಯರಾದ ಶಿವಕುಮಾರ ಕಟ್ಟಿಮನಿ ಮುಖಂಡರಾದ ಮಲ್ಲಿಕಾರ್ಜುನ ಕ್ರಾಂತಿ,ವೆಂಕಟೇಶ ಹೊಸ್ಮನಿ,ನಾಗಣ್ಣ ಕಲ್ಲದೇವನಹಳ್ಳಿ,ಭೀಮರಾಯ ಸಿಂದಗೇರಿ,ದೊಡ್ಡ ದೇಸಾಯಿ ದೇವರಗೋನಾಲ, ಶರಣು ನಾಯಕ,ಮಾಳಪ್ಪ ಕಿರದಹಳ್ಳಿ,ರಾಹುಲ್ ಹುಲಿಮನಿ,ಕೃಷ್ಣಾರಡ್ಡಿ ಮುದನೂರು,ಮಹಾದೇವಪ್ಪ ಬೊಮ್ಮನಹಳ್ಳಿ,ಮಾನಪ್ಪ ಬಿಜಾಸಪುರ, ಧರ್ಮರಾಜ ಬಡಿಗೇರ,ಶರಣು ಹಸನಾಪುರ,ಆಕಾಶ ಕಟ್ಟಿಮನಿ,ರಮೇಶ ಬಾಚಿಮಟ್ಟಿ ಸೇರಿದಂತೆ ಅನೇಕರಿದ್ದರು.