ದಮನಿತರ ಪರ ಹೋರಾಟದ ದನಿಯಾಗಿದ್ದ ಗೇಲ್ ಒಂವೆಡ್ತ್

ಕಲಬುರಗಿ: ಮಾನವ ಹಕ್ಕುಗಳ ಹೋರಾಟಗಾರ್ತಿ, ಖ್ಯಾತ ಸಂಶೋಧಕಿ ಗೇಲ್ ಒಂವೆಡ್ತ್ ನಿಧನ ಪ್ರಯುಕ್ತ ನಗರದ ಕನ್ನಡ ಭವನದಲ್ಲಿ ಪ್ರಗತಿಪರ ಸಂಘಟನೆಗಳ ಒಕ್ಕೂಟದ ಅಡಿಯಲ್ಲಿ ಈಚೆಗೆ ಶ್ರದ್ಧಾಂಜಲಿ ಸಭೆ ಹಮ್ಮಿಕೊಳ್ಳಲಾಗಿತ್ತು.

ಮಹಾರಾಷ್ಟ್ರದ ಸಾಂಗ್ಲಿ ಜಿಲ್ಲೆಯ ಕಾಸೆಗಾಂವ್ ಗ್ರಾಮದಲ್ಲಿ ವಾಸಿಸುತ್ತಿದ್ದ ಅಮೆರಿಕ ಮೂಲದ ಡಾ. ಗೇಲ್ ಒಂವೆಡ್ತ್ ಅವರು ಪಿಎಚ್.ಡಿ. ಅಧ್ಯಯನಕ್ಕಾಗಿ ಭಾರತಕ್ಕೆ ಬಂದು ಹಲವು ಸಾಮಾಜಿಕ ಚಳವಳಿಗಳ ಮೇಲೆ ಅಧ್ಯಯನ ನಡೆಸಿದರು ಎಂದು ಪ್ರಗತಿಪರ ಚಿಂತಕ ಪ್ರೊ. ಆರ್.ಕೆ. ಹುಡಗಿ ತಿಳಿಸಿದರು.

ಮಹಿಳಾ ಹೋರಾಟಗಾರ್ತಿ ಕೆ. ನೀಲಾ ಮಾತನಾಡಿ, ಮಹಾತ್ಮ ಜ್ಯೋತಿಬಾ ಫುಲೆ ಹಾಗೂ ಸಾವಿತ್ರಿಬಾ ಫುಲೆ ಕುರಿತು ಆಳವಾದ ಅಧ್ಯಯನ ನಡೆಸಿದರು ಮಾತ್ರವಲ್ಲ ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಅವರ ಸಾಂವಿಧಾನಿಕ ವಿಚಾರ ಹಾಗೂ ಆಶಯಗಳನ್ನು ಸಮಾಜದಲ್ಲಿ ಬಿತ್ತಿದರು ಎಂದು ತಿಳಿಸಿದರು.

ಶ್ರಮಿಕ್ ಮುಕ್ತಿ ದಳದ ಸಹ ಸಂಸ್ಥಾಪಕಿಯಾಗಿದ್ದ ಡಾ. ಗೇಲ್ ತಮ್ಮ ಪತಿ ಭರತ್ ಪಟ್ನಾಗರ್ ಜೊತೆಗೂಡಿ ದಮನಿತ ಸಮುದಾಯಗಳ ಪರ ಹೋರಾಟಗಳಿಗೆ, ದಮನಿತ ಸಮುದಾಯಗಳ ಅಧ್ಯಯನಕ್ಕೆ ತಮ್ಮ ಜೀವನವನ್ನು ಮೀಸಲಿಟ್ಟಿದ್ದರು ಎಂದು ಸಭೆಯಲ್ಲಿ ಭಾಗವಹಿಸಿದ್ದ ಮರೆಪ್ಪ ಹಳ್ಳಿ, ಅರ್ಜುನ ಭದ್ರೆಯವರು ಅವರ ಹೋರಾಟದ ಸ್ವರೂಪವನ್ನು ಸ್ಮರಿಸಿಕೊಂಡರು.

ಡಾ. ಪ್ರಭು ಖಾನಾಪುರೆ, ಬಸಣ್ಣ ಸಿಂಗೆ, ದತ್ತಾತ್ರೇಯ ಇಕ್ಕಳಕಿ, ಶ್ರೀಶೈಲ ಘೂಳಿ, ಶಿವಶರಣಪ್ಪ ಮೂಳೆಗಾಂವ, ಎಸ್.ಪಿ. ಸುಳ್ಳದ, ಸೂರ್ಯಕಾಂತ ಸೊನ್ನದ ಸೇರಿದಂತೆ ಅನೇಕರು ಸಭೆಯಲ್ಲಿ ಭಾಗವಹಿಸಿದ್ದರು.