ರೈತರ ಮೇಲೆ ಲಾಠಿಚಾರ್ಜ್ ಬಿ.ಜೆ.ಪಿ ನಡೆ ಖಂಡಿಸಿ ರೈತ-ಕೃಷಿಕಾರ್ಮಿಕರ ಸಂಘಟನೆ ಪ್ರತಿಭಟನೆ

ಶಹಾಬಾದ:£ ಹರಿಯಾಣ ರಾಜ್ಯದ ಕರ್ನಾಲ್ ನಲ್ಲಿ ಶಾಂತಿಯುತವಾಗಿ ಪ್ರತಿಭಟನೆ ನಡೆಸುತ್ತಿದ್ದ ರೈತರ ಮೇಲೆ ಅಮಾನುಷವಾಗಿ ಲಾಠಿಛಾರ್ಜ್ ನಡೆಸಿರುವ ಹರಿಯಾಣ ರಾಜ್ಯದ ಬಿ.ಜೆ.ಪಿ. ಸರ್ಕಾರದ ನಡೆಯ ಬಗ್ಗೆ ಈ ಸರ್ಕಾರಗಳು ರೈತವಿರೋಧಿಯಾಗಿದ್ದು ಬಂಡವಾಳಶಾಹಿಗಳ ಏಜೆಂಟರಂತೆ ನಡೆದುಕೊಳ್ಳುತ್ತಿದೆ ಎಂದು ರೈತ-ಕೃಷಿಕಾರ್ಮಿಕರ ಸಂಘಟನೆ (ಆರ್.ಕೆ.ಎಸ್.) ನ ಕಲಬುರಗಿ ಜಿಲ್ಲಾ ಅಧ್ಯಕ್ಷ ಕಾಮ್ರೇಡ್ ಗಣಪತ್‍ರಾವ್.ಕೆ. ಮಾನೆ ಉಗ್ರವಾಗಿ ಖಂಡಿಸಿದರು.

ಅವರು ಬುಧವಾರ ತಾಲೂಕಿನ ಹೊನಗುಂಟಾ ಗ್ರಾಮದಲ್ಲಿ ಆರ್.ಕೆ.ಎಸ್ ತಾಲೂಕ ಸಮಿತಿಯಿಂದ ನಡೆದ ಪ್ರತಿಭಟನೆಯಲ್ಲಿ ಮುಖ್ಯ ಭಾಷಣಕಾರರಾಗಿ ಮಾತನಾಡಿದರು.

ಕೇಂದ್ರ ಸರ್ಕಾರ ತಂದಿರುವ ಮೂರು ರೈತ ವಿರೋಧಿ ಮಸೂದೆಗಳು ಹಾಗೂ ವಿದ್ಯುತ್‍ಶಕ್ತಿ ಮಸೂದೆಯನ್ನು ಹಿಂತೆಗೆದುಕೊಳ್ಳಬೇಕೆಂದು ಆಗ್ರಹಿಸಿ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಮುಖ್ಯ ಮಂತ್ರಿಗಳಿಗೆ ಮನವಿ ಸಲ್ಲಿಸಲು ಹೋದಾಗ ರೈತರ ಮೇಲೆ ಸರ್ಕಾರ ತನ್ನ ದೌರ್ಜನ್ಯವೆಸಗಿದೆ. ಇದು ಬಿಜೆಪಿ ಸರ್ಕಾರದ ಫ್ಯಾಸಿಸ್ಟ್ ದಾಳಿಯಾಗಿದ್ದು ಅತ್ಯಂತ ಅಮಾನವೀಯವಾಗಿ ರೈತರೊಂದಿಗೆ ನಡೆದುಕೊಂಡಿದೆ.

ಕರೋನಾ ಮಹಾಮಾರಿಯ ಈ ಕರಾಳ ಸಂದರ್ಭದಲ್ಲಿ ಜನರು ಕೆಲಸ ಕಳೆದುಕೊಂಡು ಆರ್ಥಿಕವಾಗಿ ಜರ್ಜರಿತರಾಗಿದ್ದಾರೆ. ಇದೇ ಸಮಯದಲ್ಲಿ ಆಳುವ ಎಲ್ಲಾ ಸರ್ಕಾರಗಳು ಅಗತ್ಯ ವಸ್ತುಗಳ ಬೆಲೆಗಳನ್ನು ಹೆಚ್ಚಿಸಿ ಬಂಡವಾಳಿಗರ ಜೇಬು ತುಂಬುತ್ತಿದೆ. ಹೀಗೆ ಪೆಟ್ರೋಲ್, ಡಿಸೇಲ್, ಅಡುಗೆ ಅನೀಲಗಳು ಬಡಜನರ ಜೀವನದಿಂದ ದೂರವಾಗುತ್ತಿದೆ.

ಪರಿಸ್ಥಿತಿಯ ತೀವ್ರತೆಯನ್ನು ಅರಿತು ಸರ್ಕಾರವು ಈ ಕೂಡಲೇ ಈ ಘಟನೆಯಲ್ಲಿ ನೊಂದ ಗಾಯಾಳುಗಳಿಗೆ ಸೂಕ್ತ ಪರಿಹಾರ ನೀಡಬೇಕು. ಘಟನೆಯಲ್ಲಿ ನೊಂದ ರೈತರಿಗೆ ಕೂಡಲೇ ಉಚಿತ ಔಷಧೋಪಚಾರಗಳನ್ನು ಒದಗಿಸಬೇಕು. ಇಡೀ ಘಟನೆಯ ಬಗ್ಗೆ ಮ್ಯಾಜಿಸ್ಟ್ರೇಟ್ ಮಟ್ಟದ ಅಧಿಕಾರಿಗಳು ತನಿಖೆ ನಡೆಸಿ ಘಟನೆಗೆ ಕಾರಣರಾದವರ ಮೇಲೆ ಸೂಕ್ತ ಕ್ರಮಗಳನ್ನು ಕೈಗೊಂಡು ಶಿಕ್ಷೆ ವಿಧಿಸಬೇಕೆಂದು ಹಾಗೂ ಕೇಂದ್ರ ಬಿಜೆಪಿ ಸರ್ಕಾರವು ರೈತರ ಪ್ರತಿಭಟನೆಯನ್ನು ಮನಗಂಡು ಎಚ್ಚೆತ್ತುಕೊಂಡು ತನ್ನ ಕಾರ್ಪೋರೇಟ್ ಪರ ನೀತಿಗಳನ್ನು ಹಿಂತೆಗೆದುಕೊಳ್ಳಬೇಕೆಂದು ಅಲ್ಲಿಯವರೆಗೆ ರೈತರು ತಮ್ಮ ಹೋರಾಟವನ್ನು ಇನ್ನಷ್ಟು ತೀವ್ರಗೊಳಿಸಬೇಕೆಂದು ಕರೆ ನೀಡಿದರು.

ಆರ್.ಕೆ.ಎಸ್ ತಾಲೂಕ ಕಾರ್ಯದರ್ಶಿಗಳಾದ ಕಾಮ್ರೇಡ್ ರಾಜೇಂದ್ರ ಅತನೂರ ಅಧ್ಯಕ್ಷತೆ ವಹಿಸಿದ್ದರು. ಶಾಂತಮಲ್ಲಪ್ಪ, ಮರೆಪ್ಪಾ, ದತ್ತು, ಶ್ರೀಶೈಲ್, ನಿಂಗಪ್ಪ ಪೂಜಾರಿ ಇತರರು ಉಪಸ್ಥಿತರಿದ್ದರು.