ಶಿಕ್ಷಕ ಸಾಹಿತಿ ಸಿರಿ ಪ್ರಶಸ್ತಿ ಪ್ರದಾನ

ಕಲಬುರಗಿ: ಮನುಜ ಎಷ್ಟೆ ಸಾಧನೆ ಮಾಡಿದರೂ ಸಂಸ್ಕಾರ ದೊರೆಯುತ್ತಿಲ್ಲ. ಅದಕ್ಕೆ ಬೇಕಾದ ಮೌಲ್ಯಯುತ ಶಿಕ್ಷಣದ ಕೊರತೆ ಎದ್ದು ಕಾಣುತ್ತಿದೆ. ನಮ್ಮ ಸೃಜನಶಿಲ ಸಾಹಿತ್ಯ ಸಮಾಜಕ್ಕೆ ಕೊಟ್ಟರೆ ಅದು ಅಭಿವೃದ್ಧಿಗೆ ಪೂರಕವಾಗಬಲ್ಲದು ಎಂದು ಎಂದು ಹಿರಿಯ ಸಾಹಿತಿ ಎ ಕೆ ರಾಮೇಶ್ವರ ಹೇಳಿದರು.

ನಗರದ ಕನ್ನಡ ಭವನದಲ್ಲಿ ಕರ್ನಾಟಕ ರಾಜ್ಯ ಬರಹಗಾರರ ಬಳಗ ಉದ್ಘಾಟನೆ, ಪುಸ್ತಕ ಲೋಕಾರ್ಪಣೆ, ಪದಾಧಿಕಾರಿಗಳ ಪದಗ್ರಹಣ ಹಾಗೂ ಶಿಕ್ಷಕ ಸಾಹಿತಿ ಸಿರಿ ಪ್ರಶಸ್ತಿ ಪ್ರದಾನ ಸಮಾರಂಭ ಉದ್ಘಟಿಸಿ ಅವರು ಮಾತನಾಡಿದರು.

ಸಾಹಿತಿ ಅಳಿದರೂ ಸಾಹಿತ್ಯ ಸಮಾಜದಲ್ಲಿ ಗಟ್ಟಿಯಾಗಿ ಉಳಿಯುತ್ತದೆ. ತಾನು ಮಾಡುವ ಕೆಲಸ ಇತರರಿಗೆ ಮಾದರಿ ಆಗಬೇಕು. ಮಕ್ಕಳಿಗೆ ಒಳ್ಳೆಯ ಸಂಸ್ಕಾರ ನೀಡುವಂಥ ಶಿಕ್ಷಣ ಕೊಡಬೇಕಾಗಿದೆ. ಬರಹಗಳು ಸಮಾಜಮುಖಿ ಚಿಂತನೆಗಳ ಗೂಡಾಗಿರಲಿ. ಗುರುವಿನ ಕರುಣೆ ಮತ್ತು ಬೋಧನೆಗಳೆರಡು ವ್ಯಕ್ತಿತ್ವ ರೂಪಿಸುವಲ್ಲಿ ಪರಿಣಾಮ ಬೀರ ಬಲ್ಲದು ಎಂದರು.

ಮುಖ್ಯ ಅತಿಥಿ ಗುವಿಕ ಜೈವಿಕ ತಂತ್ರಜ್ಞಾನ ವಿಭಾಗದ ಪ್ರಾಧ್ಯಪಕ ಡಾ ರಮೇಶ ಲಂಡನಕರ್ ಅವರು, ನಮ್ಮ ಸೃಜನಶೀಲ ಬರವಣಿಗೆಯ ಕೊರತೆಯಿದ್ದು, ಓರೆ ಕೊರೆಗಳನ್ನು ತಿದ್ದುವ ಕೆಲಸ ಸಾಹಿತ್ಯದಿಂದಾಗಬೇಕು. ಅದು ಸಮಾಜದ ಪ್ರಗತಿಗೆ ಪೂರಕವಾಗಿರಬೇಕು. ಕನ್ನಡಿಯಾಗಿ ಜನ ಸಾಮಾನ್ಯರ ಮಧ್ಯೆ ನಿಂತು ಉಸಿರಾಗಬೇಕು ಎಂದರು.

ಕನಾಟಕ ರಾಜ್ಯ ಬರಹಗಾರರ ಬಳಗದ ರಾಜ್ಯಾಧ್ಯಕ್ಷ ಮಧು ಎಲ್ ನಾಯಕ ಅವರು ಅಧ್ಯಕ್ಷತೆ ವಹಿಸಿ, ಬರಹಗಾರರನ್ನು ಗುರುತಿಸಿ ಅವರ ಸಾಹಿತ್ಯ ಪ್ರಕಟಿಸುವ ಕೆಲಸ ಬಳಗವು ಮಾಡುತ್ತಿದೆ. ಬರುವ ದಿನಗಳಲ್ಲಿ ರಾಜ್ಯ ಮಟ್ಟದ ಬರಹಗಾರರ ಸಮಾವೇಶ ಮಾಡಲಾಗುತ್ತದೆ. ಅವರ ಸಾಹಿತ್ಯ ಜನ ಮಾನಸಕ್ಕೆ ತಲುಪಿಸಿದಾಗ ನಾವು ಬರೆದ ಬರವಣಿಗೆ ಸಾರ್ಥಕವಾಗುತ್ತದೆ ಎಂದರು.

ಶಿಕ್ಷಕಿ ಚಂದ್ರಕಲಾ ಪಾಟೀಲ ಅವರು ಬರೆದ ನಲಿ ಕಲಿ ಕವನ ಸಂಕಲನ ಕೃತಿಯನ್ನು ಎಕೆ ರಾಮೇಶ್ವರ ಲೋಕಾರ್ಪಣೆ ಮಾಡಿದರು. ಸಾಹಿತಿ ಧರ್ಮಣ್ಣ ಎಚ್ ಧನ್ನಿ ಅವರು ನಲಿ ಕಲಿ ಕೃತಿ ಪರಿಚಯ ಮಾಡಿದರು. ಕರ್ನಾಟಕ ರಾಜ್ಯ ವಿಜ್ಷಾನ ಪರಿಷತ್ತಿನ ಅಧ್ಯಕ್ಷ ಗಿರೀಶ ಕಡ್ಲೇವಾಡ ಅವರು, ಈ ಭಾಗದ ಎಲ್ಲಾ ಲೇಖಕರ ಕೃತಿಗಳನ್ನು ಪುಸ್ತಕ ಆಯ್ಕೆ ಸಮಿತಿಯಲ್ಲಿ ಆಯ್ಕೆ ಮಾಡಿ ಪ್ರೋತ್ಸಾಹಿಸಲಾಗುತ್ತದೆ ಎಂದು ಭರವಸೆ ನೀಡಿದರು.

ಬಳಗದ ರಾಜ್ಯ ಉಪಾಧ್ಯಕ್ಷ ಬಾರಾವಲಿ ಬಾವಿಹಳ್ಳಿ, ಖಂಡೂ ಬಂಜಾರ, ಸಾಹಿತಿ ಮಂಗಲಾ ಕಪರೆ, ಚಂದ್ರಕಲಾ ಪಾಟೀಲ ಮಾತನಾಡಿದರು. ಜಿಲ್ಲಾಧ್ಯಕ್ಷ ಮಹಾಂತೇಶ ಎನ್ ಪಾಟೀಲ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಶಾಳ ಮಠದ ಪೂಜ್ಯ ಕೇದಾರ ಶ್ರೀಗಳು ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.

ವನ್ಯಾ ಶಿವರಾಜ ಗೊಬ್ಬುರ ಅವರಿಂದ ಭರತ ನಾಟ್ಯ ಪ್ರದರ್ಶನ ನಡೆಯಿತು. ಸಿದ್ದಾರೂಡ ನಾಗರಳ್ಳಿ ಪ್ರಾರ್ಥನೆ ಗೀತೆ ಹಾಡಿದರು. ಶಿವಲೀಲಾ ಎಸ್ ಕೆ ನಿರೂಪಿಸಿದರು. ಬಾಬುಮಿಯಾ ಫೂಲಾರಿ ಸ್ವಾಗತಿಸಿದರು. ಗಂಗಮ್ಮ ನಾಲವಾರ ವಂದಿಸಿದರು.

ಪ್ರಶಸ್ತಿ ಪುರಸ್ಕøತರು: ಡಾ ಶೋಭಾದೇವಿ ಚೆಕಕ್ಕಿ, ಸಿದ್ದಣ್ಣ ಗೋಡೆಕರ್, ಪ್ರಕಾಶ ಕೋಟ್ರೆ, ಸಿಂಧುಮತಿ ಭೋಸ್ಲೆ, ಮಹಾನಂದ ಸಿಬಶೆಟ್ಟಿ, ಬಾಹುಬಲಿ ಮಾಲಗತ್ತಿ, ಸುಕೇಶಿನಿ, ಸುನೀತಾ ಮಾಳಗೆ, ಝಾಪರ್ ಅಲಿ ಮಿರಾನ, ಮಹಾದೇವ ಕೊತಲಿ, ನೇತ್ರಾವತಿ ರಾಂಪೂರ ಹಾಗೂ ರಾಜೇಶ ನಾಗೂರೆ ಅವರಿಗೆ ಶಿಕ್ಷಕ ಸಾಹಿತಿ ಸಿರಿ ಪ್ರಶಸ್ತಿ ಪತ್ರ ನೀಡಿ ಗೌರವಿಸಲಾಯಿತು.