ಶೌಚಾಲಯ ಕೋಡ್ರಿ ಇಲ್ಲಾ ಕುರ್ಚಿ ಖಾಲಿ ಮಾಡ್ರಿ: ಮಹಿಳೆಯರಿಂದ ಪ್ರತಿಭಟನೆ

ಕಲಬುರಗಿ: ಯಡ್ರಾಮಿ ತಾಲೂಕಿನ ಅರಳಗುಂಡಗಿ ಗ್ರಾಮದ ಮಹಿಳೆಯರು ಶೌಚಾಲಯ ಸಮಸ್ಯೆಯನ್ನು ಪರಿಹರಿಸಿಕೊಡುವಂತೆ ಆಗ್ರಹಿಸಿ ಇಂದು ಗ್ರಾಮ ಪಂಚಾಯತಿಯ ಮುಂದೆ ತಮಟೆ ಬಾರಿ‌ಸಿ ಪ್ರತಿಭಟನೆ ನಡೆಸಿದರು.

ನಮ್ಮ ದೇಶಕ್ಕೆ ಸ್ವತಂತ್ರ ಬಂದರು ಸಹಿತ ಇನ್ನೂ ನಮ್ಮ ಊರುಗಳಲ್ಲಿ ಸರಿಯಾದ ಶೌಚಾಲಯ ನಿರ್ಮಾಣವಾಗಿಲ್ಲ. ಈ ಸರಕಾರ ಇದ್ದು ಇಲ್ಲದಂತಾಗಿದೆ ,ನಮಗೆ ಶೌಚಾಲಯ ವ್ಯವಸ್ಥೆ ಮಾಡಿ ಇಲ್ಲವೇ ಖಾಲಿಮಾಡಿ ! ಎಂದು ಮಹಿಳೆಯರು ಆಕ್ರೋಶ ವ್ಯಕ್ತಪಡಿಸಿ ಗ್ರಾಮ ಪಂಚಾಯತಿಯ ಆಡಳಿತ ವೈಖರಿಗೆ ಚಿ…ಛೀ..ಥೂ ಎಂದು ಉಗಿದು ಹಿಡಿಶಾಪ ಹಾಕಿದರು.

ಗ್ರಾಮದ ಪರಿಶಿಷ್ಟ ಜಾತಿ ಜನಾಂಗದ ಕೆರಿಯ ಹೆಣ್ಣುಮಕ್ಕಳು, ಸೇರಿದಂತೆ ಇತರೆಲ್ಲ ಸಮುದಾಯದ ಮಹಿಳೆಯರು ಮಲ ಜಲಭಾದೆ ಗಾಗಿ ಶೌಚಕ್ಕಾಗಿ ತೀವ್ರ ಸಮಸ್ಯೆ ಎದುರಿಸುವಂತಾಗಿದೆ. ಮರ್ಯಾದಸ್ಥ ಹೆಣ್ಣುಮಕ್ಕಳು ಹಾಗೂ ಪ್ರಾಪ್ತ ವಯಸ್ಸಿನ ಕಿಶೋರಿಯರಿಗೆ ಇದು ನುಂಗಲಾರದ ತುತ್ತಾಗಿ ಪರಿಣಮಿಸಿದ್ದು ,ಅಧಿಕಾರಿಗಳು ಹಾಗೂ ಚುನಾಯಿತ ಪ್ರತಿನಿಧಿಗಳು ಮೌನವಹಿಸಿದ ಕಾರ್ಯವೈಖರಿಗೆ ಮಹಿಳೆಯರು ಗ್ರಾಮಸ್ಥರು ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ.

ಗ್ರಾಮದಿಂದ ಯಡ್ರಾಮಿಗೆ ಹೋಗುವ ಮುಖ್ಯ ರಸ್ತೆಯೇ ಊರಿನ ಎಲ್ಲಾ ಹೆಣ್ಣು ಮಕ್ಕಳ ಶೌಚಾಲಯದ ಕೇಂದ್ರ ಸ್ಥಳವಾಗಿತ್ತು. ಆ ರಸ್ತೆಯಲ್ಲಿ ಬಹಳಷ್ಟು ಜನಗಳ ಮತ್ತು ವಾಹನಗಳ ಓಡಾಟವಿರುವುದರಿಂದ ಊರಿನ ಎಲ್ಲಾ ಸಮುದಾಯದ ಮಹಿಳೆಯರು ಅವಮಾನ, ಮುಜುಗರ ಅನುಭವಿ‌ಸುತ್ತಿದ್ದಾರೆ.

ನಿಜಕ್ಕೂ ಇದು ಅಮಾನವೀಯ ಘಟನೆಯಾಗಿದೆ. ಸರಿಯಾದ ಶೌಚಾಲಯವನ್ನು ನಿರ್ಮಿಸಿಕೊಟ್ಟು ಅನುಕೂಲ ಮಾಡಿಕೊಡಬೇಕೆಂದು ಸಮಸ್ಯೆಯನ್ನು ಆಲಿಸದೆ ಕಿವುಡರಾಗಿರುವ ಗ್ರಾಮ ಪಂಚಾಯತಿಯ ಆಡಳಿತ ವರ್ಗಕ್ಕೆ ಹಾಗೂ ಸಮಸ್ಯೆಯನ್ನು ಹೇಳಲು ಅಸಹಾಯಕರಾಗಿರುವ ಚುನಾಯಿತ ಪ್ರತಿನಿಧಿಗಳಿಗೆ ತಮಟೆ ಬಡಿಯುವ ಮೂಲಕ ಎಚ್ಚರಿಸಿ ಪ್ರತಿಭಟನೆಯನ್ನು ಕೈಗೊಂಡರು.

ಪಂಚಾಯತಿಯ ಅಧ್ಯಕ್ಷರು, ಕಾರ್ಯದರ್ಶಿಗಳಿಗೆ ಮನವಿ ಪತ್ರವನ್ನು ಸಲ್ಲಿಸಿದರು. ನಿಮ್ಮಲ್ಲಿ ಮಾನವೀಯತೆ ಎನ್ನುವ ಅಂಶವು ಕಿಂಚಿತ್ತು ಇದ್ದರೆ ಕೊಡಲೇ ಸಮಸ್ಯೆಗೆ ಸ್ಪಂದಿಸಿ ಇಲ್ಲವೇ ಕುರ್ಚಿ ಖಾಲಿ ಮಾಡಿ ಎಂದು ಘೋಷಣೆ ಕೂಗಿದರು.

ಮಹಿಳೆಯರ ಪ್ರತಿಭಟನೆಗೆ ಬೆಂಬಲ ‌ಸೂಚಿಸಿದ ಭಾರತ ಕಮ್ಯುನಿಸ್ಟ್ ಪಕ್ಷ ಯಡ್ರಾಮಿ ಕಾರ್ಯದರ್ಶಿ ಭೀಮರಾಯ ಮುದಬಸಪ್ಪಗೋಳ ಹಾಗೂ ಪಕ್ಷದ ಪ್ರಮುಖರಾದ ಸಾಹೇಬಗೌಡ ಮುರಡಿ, ಬೀರಪ್ಪ ಪೂಜಾರಿ, ಶರಣು ಬಿಲ್ಲಾ, ದೇವೇಂದ್ರ ಕಡಿ, ರಾಮು ಕುಸ್ತಿ, ಮೇರಮ್ಮ ವರವಿ, ಯಲ್ಲಮ್ಮ ಗೌಂಡಿ, ನೀಲಮ್ಮ ತಳಗೇರಿ, ರುದ್ರಮ್ಮ ಅಲ್ಲಾಪುರ, ಕೊಂತೆಮ್ಮ ಎಂಟಮಾನ ಉಪಸ್ಥಿತರಿದ್ದರು.