ಬಿಲ್ವಪತ್ರೆ ತರಲು ಹೋದ ಯುವಕನಿಗೆ ಕಲ್ಲಿನಿಂದ ಜಜ್ಜಿ ಕಗ್ಗೊಲೆ

ಕಲಬುರಗಿ: ಬಿಲ್ವಪತ್ರೆ ತರುವುದಾಗಿ ಮನೆಯಲ್ಲಿ ಹೇಳಿ ಹೋಗಿದ್ದ ಯುವಕನಿಗೆ ಕಲ್ಲಿನಿಂದ ಜಜ್ಜಿ ಕಗ್ಗೊಲೆ ಮಾಡಿದ ಘಟನೆ ಜಿಲ್ಲೆಯ ಆಳಂದ್ ತಾಲ್ಲೂಕಿನ ನರೋಣಾ ಬಳಿ ವರದಿಯಾಗಿದೆ.

ಮೃತನಿಗೆ ನಗರದ ಭವಾನಿ ನಗರದ ನಿವಾಸಿ ಗಣೇಶ್ ಗುಡದ್ (19) ಎಂದು ಗುರುತಿಸಲಾಗಿದೆ.

ಕಳೆದ ಭಾನುವಾರ ಸಂಜೆ ಐದು ಗಂಟೆಗೆ ಬಿಲ್ವಪತ್ರೆ ತರುವುದಾಗಿ ಮನೆಯಿಂದ ಹೊರಹೋಗಿದ್ದ ಗಣೇಶನು ಮರಳಿ ಮನೆಗೆ ಬಾರದೇ ಇದ್ದುದರಿಂದ ಆತನ ಮೊಬೈಲ್‌ಗೆ ಮನೆಯವರು ಕರೆ ಮಾಡಿದಾಗ ಅದು ಸ್ವಿಚ್ ಆಫ್ ಆಗಿತ್ತು. ಆತನಿಗಾಗಿ ಹುಡುಕಾಟ ನಡೆಸಿದರೂ ಸಹ ಪತ್ತೆ ಆಗಿರಲಿಲ್ಲ. ಇದೀಗ ನರೋಣಾ ಬಳಿ ಆತನ ಶವ ಪತ್ತೆಯಾಗಿದೆ.

ಮೂರು ದಿನಗಳ ನಂತರ ಶವ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ ಎಂದು ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿ ಯಡಾ ಮಾರ್ಟಿನ್ ಮಾರ್ಬನ್ಯಾಂಗ್ ಅವರು ತಿಳಿಸಿದ್ದಾರೆ.

ಹಣಕಾಸು ವ್ಯವಹಾರದ ಹಿನ್ನೆಲೆಯಲ್ಲಿ ಕೊಲೆಯಾಗಿರುವ ಅನುಮಾನವಿದೆ. ಮೃತನ ತಾಯಿ ನಾಗವೇಣಿ ಪುತ್ರನನ್ನು ಕಳೆದುಕೊಂಡು ದು:ಖಿತಳಾಗಿದ್ದು, ತನ್ನ ಪುತ್ರ ಯಾವುದೇ ಜಗಳ, ಜೂಟ ತೆಗೆಯುತ್ತಿರಲಿಲ್ಲ. ಆತನಿಗೆ ಯಾರೂ ವೈರಿಗಳು ಇರಲಿಲ್ಲ ಎಂದು ತಿಳಿಸಿದರು.

ಮರಣೋತ್ತರ ಪರೀಕ್ಷೆಗಾಗಿ ಜಿಲ್ಲಾ ಸರ್ಕಾರಿ ಆಸ್ಪತ್ರೆಯ ಶವಾಗಾರಕ್ಕೆ ಪಾರ್ಥಿವ ಶರೀರವನ್ನು ತಂದಾಗ ಆತನ ಕುಟುಂಬದ ಸದಸ್ಯರು ಆಕ್ರಂಧಿಸಿದರು. ಈ ಕುರಿತು ನರೋಣಾ ಪೋಲಿಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.