ಅಪರಿಚಿತ ವ್ಯಕ್ತಿ ಸಾವು

ವಾಡಿ: ಅಪರಿಚಿತ ಅನಾರೋಗ್ಯ ಪೀಡಿತ ವ್ಯಕ್ತಿಯೋರ್ವ ರಾತ್ರಿ ಮಲಗಿದ್ದಲ್ಲೇ ಮೃತಪಟ್ಟ ಘಟನೆ ರವಿವಾರ ಚಿತ್ತಾಪುರ ತಾಲೂಕಿನ ವಾಡಿ ಪಟ್ಟಣದಲ್ಲಿ ಸಂಭವಿಸಿದೆ.

ಸುಮಾರು ೬೦ ವಯಸ್ಸಿನ ಈ ವ್ಯಕ್ತಿಯ ಶವ ಪಟ್ಟಣದ ಅಂಬೇಡ್ಕರ್ ವೃತ್ತದ ಕಟ್ಟೆಯಲ್ಲಿ ಮಲಗಿದ್ದ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಈತನ ಬಟ್ಟೆಯ ಮೇಲೆ ಓಮೆಗಾ ಟೈಲರ್ ಹೆಸರಿನ ಲೇಬಲ್ ಇದೆ. ಮುಂಬೈ ಹೋಟಲ್ ಮಾಲೀಕರೊಬ್ಬರ ಮೋಬಾಯಿಲ್ ನಂಬರ್ ಇದ್ದು, ಅವರ ಹತ್ತಿರ ಕೆಲಸ ಮಾಡಿ ಬಂದಿದ್ದಾನೆ ಎನ್ನಲಾಗುತ್ತಿದ್ದು, ಅವರಿಗೂ ಈ ವ್ಯಕ್ತಿಯ ನಿಜವಾದ ವಿಳಾಸ ತಿಳಿದಿಲ್ಲ.

ಮೃತ ವ್ಯಕ್ತಿಯ ಜೇಬಿನಲ್ಲಿ ಅಸ್ತಮಾ ಕಾಯಿಲೆಗೆ ಸಂಬಂದಿಸಿದ ಮಾತ್ರೆಗಳು ಮತ್ತು ಔಷಧಿ ಚೀಟಿ ಲಭ್ಯವಾಗಿವೆ. ಮೆಡಿಕಲ್ ಚೀಟಿಗಳ ಮೇಲೆ ಮಹಾದೇವಪ್ಪ ಹಡಪದ ಗಂಜ್ ಏರಿಯಾ ಕಲಬುರಗಿ ಎಂದು ಬರೆಯಲಾಗಿದೆ.

ಮೃತ ವ್ಯಕ್ತಿಯ ನಿಖರವಾದ ವಿಳಾಸ ಹಾಗೂ ಕುಟುಂಬ ಸಂಬಂದಿಕರು ಪತ್ತೆಯಾಗದ ಕಾರಣ ಶವವನ್ನು ಸ್ಥಳೀಯ ಸರಕಾರಿ ಆಸ್ಪತ್ರೆಯಲ್ಲಿಡಲಾಗಿದ್ದು, ವಾರಸುದಾರರು ಪತ್ತೆಯಾಗದಿದ್ದರೆ ಎರಡು ದಿನದ ನಂತರ ಕಾನೂನು ರೀತಿಯಲ್ಲಿ ಅಂತ್ಯಸಂಸ್ಕಾರ ನೆರವೇರಿಸಲಾಗುವುದು. ಸಂಬಂದಿಸಿದವರು ವಾಡಿ ಪೊಲೀಸ್ ಠಾಣೆಗೆ ಕರೆ ಮಾಡುವಂತೆ ಪಿಎಸ್‌ಐ ವಿಜಯಕುಮಾರ ಭಾವಗಿ ಕೋರಿದ್ದಾರೆ. ಈ ಕುರಿತು ವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.