ಸುರಪುರ: ಪಠ್ಯ ಪುಸ್ತಕ ರಚನಾ ಸಮಿತಿ ವಿರುದ್ಧ ಪ್ರತಿಭಟನೆ

ಸುರಪುರ: ಸರಕಾರ ರಚನೆ ಮಾಡಿರುವ ಪಠ್ಯ ಪುಸ್ತಕ ರಚನಾ ಸಮಿತಿ ವಿರುದ್ಧ ನಗರದ ಮಹಾತ್ಮ ಗಾಂಧಿ ವೃತ್ತದಲ್ಲಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ (ಕ್ರಾಂತಿಕಾರಿ ಬಣ) ನೇತೃತ್ವದಲ್ಲಿ ಪ್ರತಿಭಟನೆ ನಡೆಸಿ ಸರಕಾರದ ಹಾಗೂ ಪಠ್ಯ ಪುಸ್ತಕ ರಚನಾ ಸಮಿತಿ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ಈ ಸಂದರ್ಭದಲ್ಲಿ ಅನೇಕ ಮುಖಂಡರು ಮಾತನಾಡಿ, ಪಠ್ಯ ಪುಸ್ತಕ ಪರಿಷ್ಕರಣೆ ಅಧ್ಯಕ್ಷ ರೋಹಿತ್ ಚಕ್ರತೀರ್ಥ ಸುರಪುರ ಚರಿತ್ರೆಯನ್ನು ಮರೆತು ಇತಿಹಾಸದ ಅರಿವಿಲ್ಲದೆ ಅವೈಜ್ಞಾನಿಕ ವಿಚಾರಗಳನ್ನು ಪುಠ್ಯಪುಸ್ತಕದಲ್ಲಿ ತುಂಬಿದ್ದಾನೆ. ಕೋಮುವಾದ ಬಿತ್ತುತ್ತಿರುವ ಹೆಡಗೆವಾರರ ಮನುಸಂಸ್ಕೃತಿ ವಿಚಾರಗಳನ್ನು ಪಠ್ಯದಲ್ಲಿ ಸೇರಿಸಿದ್ದು. ಸುರಪುರ ಸಂಸ್ಥಾನದ ಅರಸರ ಚರಿತ್ರೆ, ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್, ಜಗಜ್ಯೋತಿ ಬಸವಣ್ಣ ಚರಿತ್ರೆಯನ್ನು ಪಠ್ಯದಿಂದ ಕೈ ಬಿಟ್ಟಿರುವುದು ಮಹಾನಾಯಕರಿಗೆ ಮಾಡಿದ ಅವಮಾನವಾಗಿದೆ. ಇಂತಹ ಹೀನಕೃತ್ಯಕ್ಕೆ ಕೈಹಾಕಿರುವ ರೋಹಿತ್ ಚಕ್ರತೀರ್ಥರ ಮೇಲೆ ದೇಶದ್ರೋಹ ಪ್ರಕರಣ ದಾಖಲಿಸಬೇಕು. ಕೋಮು ದಳ್ಳೂರಿಗಳಿಗೆ ಕಾರಣರಾಗುತ್ತಿರುವ ಪ್ರಮೋದ ಮುತಾಲಿಕ್ ಅವರನ್ನು ಬಂಧಿಸಬೇಕು.

ಸುಳ್ಳಿನ ಸಾಲು ಬಿತ್ತುತ್ತಿರುವ ಯುವ ಪೀಳಿಗೆಯನ್ನು ದಾರಿ ತಪ್ಪಿಸುತ್ತಿರುವ, ಸೂಲಿಬೇಲಿ ಚಕ್ರವರ್ತಿಯನ್ನು ಪಠ್ಯದಿಂದ ಕೈಬಿಡಬೇಕು. ಹಿರಿಯ ಸಾಹಿತಿಗಳಾದ ಕುವೆಂಪು, ಬರಗೂರು ರಾಮಚಂದ್ರಪ್ಪ, ದೇವನೂರ ಮಹಾದೇವ, ಲಂಕೇಶ ಹಾಗೂ ಅನೇಕ ನೈಜ ಸಮಾಜ ಸುಧಾರಕರ ನೀತಿ ಪಾಠಗಳನ್ನು ಮುಂದುವರಿಸಬೇಕು. ಶಾಲೆಗಳಲ್ಲಿ ಪುಸ್ತಕ ವಿತರಣೆಗೆ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.

ದೇವೀಂದ್ರಪ್ಪ ಪತ್ತಾರ, ವೆಂಕಟೇಶ ಬೇಟೆಗಾರ, ಅಹ್ಮದ್ ಪಠಾಣ್, ರೈತ ಸಂಘದ ತಾಲೂಕು ಅಧ್ಯಕ್ಷ ಹಣಮಂತ್ರಾಯ ಮಡಿವಾಳ, ಮಾನಪ್ಪ ಬಿಜಾಸ್ಪುರ, ಜಟ್ಟಪ್ಪ ನಾಗರಾಳ, ರಾಮಣ್ಣ ಶೆಳ್ಳಗಿ, ಬುದ್ಧಿವಂತ ನಾಗರಾಳ, ಆರ್.ಎಸ್. ಮಾಲಗತ್ತಿ, ಮೂರ್ತಿ ಬೊಮ್ಮನಹಳ್ಳಿ, ಕಾಳಿಂಗಪ್ಪ ಕಲ್ಲದೇವನಹಳ್ಳಿ, ಖಾಜಾಹುಸೇನ್ ಗುಡಗುಂಟಿ, ಮಲ್ಲಪ್ಪ ಬಡಿಗೇರ, ಭೀಮಾಶಂಕರ ಬಡಿಗೇರ ಸೇರಿದಂತೆ ಅನೇಕರಿದ್ದರು.