ಯೋಗದಿಂದ ಆರೋಗ್ಯ ಶ್ರೀಮಂತಿಕೆ: ವೀರಭದ್ರಪ್ಪ

ವಾಡಿ: ರೋಗ ಬಂದ ನಂತರ ಯೋಗಾಭ್ಯಾಸ ಮಾಡುವುದಕಿಂತ, ರೋಗ ಬರುವ ಮೊದಲೇ ಯೋಗಾಸನಕ್ಕೆ ಆಧ್ಯತೆ ನೀಡುವುದಾದರೆ ಆರೋಗ್ಯ ಶ್ರೀಮಂತಿಕೆ ಮೆರೆಯಬಹುದು ಎಂದು ಶಿಕ್ಷಕ, ಅಖಿಲ ಭಾರತ ಶಿಕ್ಷಣ ಉಳಿಸಿ ಸಮಿತಿ ರಾಜ್ಯ ಉಪಾಧ್ಯಕ್ಷ ವೀರಭದ್ರಪ್ಪ ಆರ್.ಕೆ ಹೇಳಿದರು.

ವಿಶ್ವ ಯೋಗದಿನ ಪ್ರಯುಕ್ತ ಪಟ್ಟಣದ ಎಸಿಸಿ ಉದ್ಯಾನವನದಲ್ಲಿ ಬೆಳಗಿನ ಬಳಗ, ಪತಂಜಲಿ ಯೋಗ ಸಮಿತಿ, ಎಸಿಸಿ ಕಾರ್ಖಾನೆ ಹಾಗೂ ಪುರಸಭೆ ಆಡಳಿತದ ಸಹಯೋಗದಲ್ಲಿ ಏರ್ಪಡಿಸಲಾಗಿದ್ದ ಯೋಗಾಭ್ಯಾಸ ತರಬೇತಿ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ಯೋಗಾಸನದಿಂದ ದೈಹಿಕ ಆರೋಗ್ಯ ಚೈತನ್ಯಶೀಲವಾಗಿಡಲು ಸಾಧ್ಯವಿದೆ. ಮಾನಸಿಕ ಒತ್ತಡದಿಂದ ದೂರವಿರಲು ಪ್ರಾಣಾಯಮ, ವಜ್ರಾಸನ, ಭುಜಂಗಾಸನ, ಹಾಸ್ಯಾಸನ ಉಪಯೋಗಕಾರಿಯಾಗಿವೆ. ಯಾವೂದೇ ವಯಸ್ಸಿನವರು ಮಾಡಬಹುದಾದ ಯೋಗವನ್ನು ದಿನದ ವ್ಯಾಯಾಮದ ಭಾಗವಾಗಿ ಸ್ವೀಕರಿಸಬೇಕು. ಯುವಜನರು ಇಂದು ಹೆಚ್ಚು ಒತ್ತಡಕ್ಕೊಳಗಾಗುತ್ತಿರುವುದನ್ನು ಕಾಣುತ್ತಿದ್ದೇವೆ. ಜೀವನಕ್ರಮ ಪೌಷ್ಠಿಕ ಆಹಾರದಿಂದ ವಂಚಿತವಾಗಿದೆ. ಕ್ರೀಯಾಶೀಲತೆಯ ಕೊರತೆ ಎದ್ದು ಕಾಣುತ್ತಿದೆ. ಯೋಗವನ್ನು ಯೋಗ ದಿನದಂದೇ ಮಾಡದೇ ದಿನವೂ ಇದನ್ನು ರೂಢಿಸಿಕೊಳ್ಳಬೇಕು ಎಂದರು.

ಪತಂಜಲಿ ಯೋಗ ಶಿಕ್ಷಕ ವೀರಣ್ಣ ಯಾರಿ ಮಾತನಾಡಿ, ಬದುಕಿನ ಜಂಜಾಟದಲ್ಲಿ ಮಾನಸಿಕ ಹಿಂಸೆಗೊಳಗಾಗಿರುವ ಪ್ರತಿಯೊಬ್ಬ ಹೆಣ್ಣು ಗಂಡು ಯೋಗಾಸನದ ಮೊರೆ ಹೋಗಬೇಕು. ಧ್ಯಾನದಿಂದ ಮನಸ್ಸಿನ ರೋಗ ನಿವಾರಣೆಯಾಗುತ್ತದೆ. ಯೋಗದ ಒಂದೊಂದು ಭಂಗಿಯೂ ಒಂದೊಂದು ರೋಗಕ್ಕೆ ಮದ್ದಾಗಿದೆ ಎಂದರು. ಎಸಿಸಿಯ ಭದ್ರಾತಾಧಿಕಾರಿ ವೈಜನಾಥ ಹಿರಗೆ, ಯೋಗ ಶಿಕ್ಷಕರಾದ ನಮ್ರತಾ ಅಶೋಕ ಪವಾರ, ರಾಜೀವ್ ಪಾಂಡೆ, ಬೆಳಗಿನ ಬಳಗದ ವಿ.ಕೆ.ಕೆದಿಲಾಯ, ಮಡಿವಾಳಪ್ಪ ಹೇರೂರ, ಪ್ರಕಾಶ ಚಂದನಕೇರಿ, ಭೀಮಶಾ ಜಿರೊಳ್ಳಿ, ಶರಣಗೌಡ ಚಾಮನೂರ, ನಾಗೇಂದ್ರ ಜೈಗಂಗಾ, ಡಾ.ಗೋವಿಂದ ಎಲ್.ನಾಯಕ, ಮುಖಂಡರಾದ ಮಲ್ಲಿಕಾರ್ಜುನ ಕರಗಾರ, ಜೋ.ಮ.ಜಯದೇವ, ಶಾಂತಪ್ಪ ಸಾಹು ಅಳ್ಳೊಳ್ಳಿ, ವಿಠ್ಠಲ ನಾಯಕ, ಕಾಶೀನಾಥ ಶೆಟಗಾರ, ಹರಿ ಗಲಾಂಡೆ, ಭೀಮರಾವ ದೊರೆ, ನಾಗರಾಜ ಗೌಡಪ್ಪನೋರ, ರವಿಕುಮಾರ ರದ್ದೇವಾಡಗಿ, ಜಿ.ಕೆ.ಇಂದಿರಾ, ಮಲ್ಲಯ್ಯಸ್ವಾಮಿ ಮಠಪತಿ, ಅಮೃತಪ್ಪ ದಿಗ್ಗಾಂವ, ವಿಶ್ವವರಾಧ್ಯ ಗುತ್ತೇದಾರ, ವೆಂಕಟೇಶ ದೇವದುರ್ಗ, ರಾಜೇಶ ಅಗರವಾಲ, ರಾಜು ಒಡೆಯರಾಜ, ಅನಿತ್ ಅಗರವಾಲ ಸೇರಿದಂತೆ ನಗರದ ನಾಗರಿಕರು ಹಾಗೂ ವಿವಿಧ ಶಾಲೆಗಳ ನೂರಾರು ವಿದ್ಯಾರ್ಥಿಗಳು ಯೋಗ ದಿನಾಚರಣೆಯಲ್ಲಿ ಪಾಲ್ಗೊಂಡಿದ್ದರು.