ಕಾಂಗ್ರೆಸ್‌ಗೆ ಖರ್ಗೆ ಆಪ್ತ ದೊರೆ ರಾಜೀನಾಮೆ

ವಾಡಿ: ಕಾಂಗ್ರೆಸ್ ಹಿರಿಯ ಮುಖಂಡ ಡಾ.ಮಲ್ಲಿಕಾರ್ಜುನ ಖರ್ಗೆ ಆಪ್ತ, ಮಹರ್ಷಿ ವಾಲ್ಮೀಕಿ ಸಮಾಜದ ಚಿತ್ತಾಪುರ ತಾಲೂಕು ಅಧ್ಯಕ್ಷ ಭೀಮರಾವ ದೊರೆ ಕಾಂಗ್ರೆಸ್‌ಗೆ ಗುಡ್ ಬೈ ಹೇಳಿದ್ದಾರೆ.

ಶುಕ್ರವಾರ ವಾಡಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಸೈಯದ್ ಮಹೆಮೂದ್ ಸಾಹೇಬ ಅವರ ನಿವಾಸಕ್ಕೆ ತೆರಳಿದ ಕಾಂಗ್ರೆಸ್ ಹಿರಿಯ ಮುಖಂಡ ಭೀಮರಾವ ದೊರೆ ರಾಜೀನಾಮೆ ಸಲ್ಲಿಸಿದ್ದಾರೆ. ಇವರೊಂದಿಗೆ ಇತರ ಕಾಂಗ್ರೆಸ್ ಮುಖಂಡರಾದ ಮಲ್ಲಿಕಾರ್ಜುನ ದೊಡ್ಡಮನಿ, ಚಾಮನೂರ ಗ್ರಾಮದ ಸುಭಾಷಚಂದ್ರ ರದ್ದೇವಾಡಗಿ, ರಾಮಕೃಷ್ಣ ಭೀಮರಾಯ, ಮಹ್ಮದ್ ರಫೀಕ್ ಉಸ್ಮಾನ್ ಕೂಡ ಪಕ್ಷಕ್ಕೆ ವಿದಾಯ ಹೇಳಿದ್ದಾರೆ.

ಪಕ್ಷದಲ್ಲಿ ಸರ್ವಾಧಿಕಾರ ಮನೆ ಮಾಡಿದ್ದು, ಪಕ್ಷನಿಷ್ಠರಿಗೆ ಬೆಲೆ ಇಲ್ಲವಾಗಿದೆ. ಪಕ್ಷ ಸಂಘಟನೆ ಮಾಡಿದವರ ಕಷ್ಟಕ್ಕೆ ಪಕ್ಷದ ನಾಯಕರು ನಿಲ್ಲುತ್ತಿಲ್ಲ. ಸ್ವಾಭೀಮಾನ ಮರೆತು ಅಸಹಾಯಕತೆ ಮತ್ತು ಅಭದ್ರತೆಯಿಂದ ಕೆಲಸ ಮಾಡಬೇಕಾದ ಪರಸ್ಥಿತಿ ಕಾಂಗ್ರೆಸ್‌ನಲ್ಲಿ ನಿರ್ಮಾಣವಾಗಿದೆ. ಇದರಿಂದ ಬೇಸತ್ತು ಪಕ್ಷ ತೊರೆಯುತ್ತಿರುವುದಾಗಿ ಭೀಮರಾವ ದೊರೆ ತಮ್ಮ ರಾಜೀನಾಮೆ ಪತ್ರದಲ್ಲಿ ವಿವರಿಸಿದ್ದಾರೆ.