ಕಲಬುರಗಿಗೆ ರಾಜ್ಯ‌ ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷರ ಸದಸ್ಯರ ಪ್ರವಾಸ

ಕಲಬುರಗಿ: ಕರ್ನಾಟಕ ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷ ಕೆ.ಜಯಪ್ರಕಾಶ ಹೆಗಡೆ ಮತ್ತು ಸದಸ್ಯರುಗಳು ಬೆಂಗಳೂರಿನಿಂದ ವಿಮಾನದ‌ ಮೂಲಕ ಜುಲೈ 11 ರಂದು‌ ಮಧ್ಯಾಹ್ನ 1.55 ಗಂಟೆಗೆ‌ ಕಲಬುರಗಿ ವಿಮಾನ ನಿಲ್ದಾಣಕ್ಕೆ ಆಗಮಿಸಿ‌ ಕಲಬುರಗಿಯಲ್ಲಿಯೆ ವಾಸ್ತವ್ಯ ಮಾಡುವರು.

ಆಯೋಗವು ಜುಲೈ 12 ರಿಂದ 15ರ ವರೆಗೆ ಪ್ರತಿ ದಿನ ಬೆಳಿಗ್ಗೆ 9 ಗಂಟೆಗೆ ಕಲಬುರಗಿಯಿಂದ ಹೊರಟು ವಿವಿಧ ತಾಲೂಕಿನ ಗ್ರಾಮಗಳಿಗೆ ಭೇಟಿ‌ ನೀಡಿ ನೊಳಂಬ, ಪಂಚಮಸಾಲಿ, ಲಿಂಗಾಯತ, ಆದಿಬಣಜಿಗ, ಕುಡುವಕ್ಕಲಿಗ ಹಾಗೂ ಇತರೆ‌ ಓ.ಬಿ.ಸಿ ಜನಾಂಗದವರ ಸಾಮಾಜಿಕ, ಶೈಕ್ಷಣಿಕ ಸ್ಥಿತಿಗತಿ ಕುರಿತು ಸ್ಥಳ ಪರಿಶೀಲನೆ ಮತ್ತು ಅಧ್ಯಯನ‌ ಮಾಡಿ ಸಾಯಂಕಾಲ 6 ಗಂಟೆ ಕಲಬುರಗಿ ಆಗಮಿಸಿ ವಾಸ್ತವ್ಯ ಮಾಡುವರು.

ಇದನ್ನೂ ಓದಿ: ರಾಷ್ಟ್ರಪತಿ ಚುನಾವಣೆ: ಜೆಡಿಎಸ್ ಬೆಂಬಲ ಕೋರಿದ ಶ್ರೀಮತಿ ದ್ರೌಪದಿ ಮುರ್ಮು

ಜುಲೈ 12 ರಂದು ಜೇವರ್ಗಿ ತಾಲೂಕಿನ ಆಂದೋಲ, ಗಂವ್ಹಾರ, ಜೇವರ್ಗಿ ಪಟ್ಟಣ, ಕೊಳಕೂರ, ಫರಹತಾಬಾದ್ ಹಾಗೂ ಖಣದಳ ಗ್ರಾಮಕ್ಕೆ, ಜುಲೈ 13 ರಂದು ಅಫಜಲಪೂರ ತಾಲೂಕಿನ ಗೊಬ್ಬೂರ, ದೇವಲಗಾಣಗಾಪೂರ, ತೆಲ್ಲೂರ, ಅನೂರ, ಸ್ಟೇಷನ್ ಗಾಣಗಾಪೂರ, ಗುಡೂರ್ ಹಾಗೂ ನೀಲೂರ ಗ್ರಾಮಕ್ಕೆ, ಜುಲೈ 14 ರಂದು‌ ಆಳಂದ ತಾಲೂಕಿನ‌ ನಿಂಬರ್ಗಾ, ಹಿತ್ತಲಶಿರೂರ, ಭಟ್ಟರ್ಗಾ,‌ ಜೀರೊಳ್ಳಿ, ಹೆಬಳಿ ಹಾಗೂ ಕೂಡಲಹಂಗರಗಾ ಗ್ರಾಮಕ್ಕೆ ಹಾಗೂ ಜುಲೈ 15 ರಂದು ಕಲಬುರಗಿ ತಾಲೂಕಿನ ಅವರಾದ(ಬಿ), ಮಹಾಗಾಂವ, ಓಕಳಿ,‌ ಮರಗುತ್ತಿ ಹಾಗೂ ಜೀವಣಗಿ ಗ್ರಾಮಗಳಿಗೆ‌ ಭೇಟಿ ನೀಡುವರು.

ಜುಲೈ 16 ರಂದು ಬೆಳಿಗ್ಗೆ 11 ರಿಂದ ಮಧ್ಯಾಹ್ನ 1.30 ಗಂಟೆ ವರೆಗೆ ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ಜಿಲ್ಲಾಧಿಕಾರಿಗಳು, ಜಿಲ್ಲಾ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು, ವಿಭಾಗಾಧಿಕಾರಿಗಳು, ತಹಶೀಲ್ದಾರ್‌ಗಳು ಹಾಗೂ ಜಿಲ್ಲಾ ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿಗಳು, ಹಿಂದುಳಿದ ಅಭಿವೃದ್ಧಿ ನಿಗಮದ ಅಧಿಕಾರಿಗಳು, ಜಿಲ್ಲಾ ಮುಖ್ಯ ಇಂಜಿನಿಯರ್ ವಿದ್ಯುತ್ ನಿಗಮ, ಗಂಗಾ ಕಲ್ಯಾಣ ಯೋಜನೆ ಮತ್ತು ಹಿಂದುಳಿದ ವರ್ಗಗಳ ಕಲ್ಯಾಣ ಕಾರ್ಯಕ್ರಮಗಳ ಅನುಷ್ಠಾನದ‌ ಪ್ರಗತಿ ಮತ್ತು ಅನಾಥ ಮಕ್ಕಳ ದತ್ತು ಪ್ರಕ್ರಿಯೆ ಕುರಿತು‌ ಚರ್ಚಿಸುವರು. ಮಧ್ಯಾಹ್ನ 2 ರಿಂದ 3.30 ಗಂಟೆಗೆ ಇಲ್ಲಿಯೆ ವಿವಿಧ ಹಿಂದುಳಿದ ಸಮುದಾಯದವರಿಂದ ಜಾತಿ ಮತ್ತಿತರ ಸಮಸ್ಯೆಗಳ ಕುರಿತು ಮನವಿ ಪತ್ರಗಳನ್ನು ಸ್ವೀಕರಿಸಿ ಸಾಯಂಕಾಲ 4 ಗಂಟೆಗೆ‌ ವಿಮಾನದ‌ ಮೂಲಕ ಬೆಂಗಳೂರಿಗೆ ಹಿಂದಿರುಗುವರು.

ಇದನ್ನೂ ಓದಿ: ಇನ್ನೊಂದು ಶ್ರೀಲಂಕಾ ಸೃಷ್ಟಿ ಮಾಡುವ ಪಕ್ಷಗಳು ನಿಮಗೆ ಬೇಕಾ?: ಹೆಚ್.ಡಿ.ಕುಮಾರಸ್ವಾಮಿ