ಕಲಬುರಗಿ ಶೈಕ್ಷಣಿಕ ಜಿಲ್ಲೆಯಲ್ಲೇ ಶಹಾಬಾದ ಮುಂದುವರೆಯಲಿ

ಶಹಾಬಾದ:ಸೇಡಂ ಶೈಕ್ಷಣಿಕ ಜಿಲ್ಲೆಗೆ ಶಹಾಬಾದ ತಾಲೂಕಾವನ್ನು ಸೇರಿಸುತ್ತಿರುವುದು ಸಂಪೂರ್ಣ ಅವೈಜ್ಞಾನಿಕ ಕ್ರಮವಾಗಿದ್ದು, ಯಾವುದೇ ಕಾರಣಕ್ಕೂ ಕಲಬುರಗಿ ಜಿಲ್ಲಾ ಕೇಂದ್ರದಿಂದ ಸೇಡಂ ಶೈಕ್ಷಣಿಕ ಜಿಲ್ಲೆಗೆ ಸೇರಿಸುವುದಕ್ಕೆ ನಮ್ಮ ವಿರೋಧವಿದೆ ಎಂದು ಕಸಾಪ ಮಾಜಿ ಅಧ್ಯಕ್ಷ ನಾಗಣ್ಣ ರಾಂಪೂರೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಶಹಾಬಾದಿಂದ ಕಲಬುರಗಿ ಜಿಲ್ಲಾ ಕೇಂದ್ರ ಕೇವಲ ೨೫ ಕಿಮೀ ದೂರದಲ್ಲಿ.ಆದರೆ ಸೇಡಂ ಸುಮಾರು ೭೦ ಕಿಮೀ ದೂರದಲ್ಲಿದೆ.ಅಲ್ಲದೇ ಸೇಡಂಗೆ ಹೋಗಲು ಯಾವುದೇ ರೀತಿಯ ಅನುಕೂಲತೆಗಳು ಇಲ್ಲ. ಶಹಾಬಾದ ತಾಲೂಕಿನ ಹೊನಗುಂಟಾ ಗ್ರಾಮದವರು ತಾಲೂಕಿಗೆ ಬರಲು ಸುಮಾರು ೧೩ ಕಿಮೀ ಆಗುತ್ತದೆ. ಕಡೆಹಳ್ಳಿ ಗ್ರಾಮದವರು ಹೊನಗುಂಟಾ ಗ್ರಾಮಕ್ಕೆ ಬಂದು ನಂತರ ತಾಲೂಕಾ ಕೇಂದ್ರವಾದ ಶಹಾಬಾದಕ್ಕೆ ಬರಬೇಕು.ಹೀಗೆ ಅನೇಕ ಗ್ರಾಮದ ಜನರಿಗೆ ಮತ್ತಷ್ಟು ದೂರವಾಗುತ್ತದೆ.

ಮರತೂರ ಗ್ರಾಮದವರಿಗೆ ಕಲಬುರಗಿ ಅತ್ಯಂತ ಸಮೀಪದಲ್ಲಿದೆ.ಅಲ್ಲಿನ ಗ್ರಾಮಸ್ಥರು ದೂರದ ಸೇಡಂಗೆ ಹೋಗಿ ಬರಲು ಅನಾನುಕೂಲವಾಗುತ್ತದೆ.ಶಿಕ್ಷಕರಿಗೆ, ಪಾಲಕರಿಗೆ ತಮ್ಮ ಕೆಲಸ ಕಾರ್ಯಗಳಿಗೆ ಕಚೇರಿಗಳಿಗೆ ಅಲೆಯುವುದೇ ನಿತ್ಯ ಕಾಯಕವಾಗುತ್ತದೆ.ಇದರಿಂದ ಸಾಕಷ್ಟು ತೊಂದರೆ ಅನುಭವಿಸಬೇಕಾಗುತ್ತದೆ.ಆದ್ದರಿಂದ ಯಾವುದೇ ಕಾರಣಕ್ಕೂ ಸೇಡಂ ಶೈಕ್ಷಣಿಕ ಜಿಲ್ಲೆಗೆ ಸೇರಿಸುವುದಕ್ಕೆ ವಿರೋಧ ವ್ಯಕ್ತವಾಗುತ್ತಿದೆ. ಆದ್ದರಿಂದ ಕಲಬುರಗಿ ಜಿಲ್ಲೆಯಲ್ಲಿಯೇ ಮುಂದುವರಿಸಿ ಜನರಿಗೆ ಅನುಕೂಲ ಮಾಡಿಕೊಡಬೇಕೆಂದು ಒತ್ತಾಯಿಸಿದರು.

ಅಲ್ಲದೇ ಶಾಸಕ ಬಸವರಾಜ ಮತ್ತಿಮಡು, ಲೋಕಸಭಾ ಸದಸ್ಯ ಡಾ.ಉಮೇಶ ಜಾಧವ ಅವರು ಈ ಬಗ್ಗೆ ಗಮನಹರಿಸಿ ಸಾರ್ವಜನಿಕರ ಹಿತದೃಷ್ಟಿಯಿಂದ ಸರಕಾರದ ಮೇಲೆ ಒತ್ತಡ ಹಾಕಬೇಕು. ಇಲ್ಲದಿದ್ದರೇ ಮುಂದಿನ ಚುನಾವಣೆಯಲ್ಲಿ ಜನರು ತಕ್ಕ ಪಾಠ ಕಲಿಸುತ್ತಾರೆ.