ಹಳಕರ್ಟಿ; ನೇತಾಜಿ ಜಯಂತಿ-ಬಹಿರಂಗ ಸಭೆ | ಧರ್ಮ ಬೆರೆತ ರಾಜಕಾರಣ ಜನೈಕ್ಯತೆ ಒಡೆಯುತ್ತದೆ

ವಾಡಿ: ಜಾತಿ ಧರ್ಮದ ಆಚರಣೆ ಅಗತ್ಯವಿದ್ದರೆ ಅದು ವೈಯಕ್ತಿಕವಾಗಿರಬೇಕು. ಅದನ್ನು ರಾಜಕೀಯದಲ್ಲಿ ಬೆರೆಸಬಾರದು ಎಂಬುದು ಕ್ರಾಂತಿಕಾರಿ ನಾಯಕ ನೇತಾಜಿ ಸುಭಾಶ್ಚಂದ್ರ ಬೋಸ್ ಅವರ ಬಲವಾದ ನಂಬಿಕೆಯಾಗಿತ್ತು ಎಂದು ಅಖಿಲ ಭಾರತ ರೈತ ಕೃಷಿ ಕಾರ್ಮಿಕ ಸಂಘಟನೆ (ಎಐಕೆಕೆಎಂಎಸ್) ರಾಜ್ಯಾಧ್ಯಕ್ಷ ಎಚ್.ವಿ.ದಿವಾಕರ್ ಹೇಳಿದರು.

ಎಐಡಿಎಸ್‍ಒ, ಎಐಡಿವೈಒ ಹಾಗೂ ಎಐಕೆಕೆಎಂಎಸ್ ಸಂಘಟನೆಗಳು ಗುರುವಾರ ಹಳಕರ್ಟಿ ಗ್ರಾಮದಲ್ಲಿ ಜಂಟಿಯಾಗಿ ಏರ್ಪಡಿಸಲಾಗಿದ್ದ ನೇತಾಜಿ ಸುಭಾಶ್ಚಂದ್ರ ಬೋಸ್ ಅವರ 126ನೇ ಜಯಂತಿ ಕಾರ್ಯಕ್ರಮದ ಬಹಿರಂಗ ಸಭೆ ಉದ್ದೇಶಿಸಿ ಅವರು ಮಾತನಾಡಿದರು. ಪ್ರಸ್ತುತ ರಾಜಕೀಯ ವ್ಯವಸ್ಥೆಯಲ್ಲಿ ಶೋಷಣೆ, ಬಡತನ, ಬೆಲೆ ಏರಿಕೆಗಳ ವಿರುದ್ಧ ಮಾತನಾಡಿದರೆ ದೇಶದ್ರೋಹಿ ಪಟ್ಟ ಕಟ್ಟಲಾಗುತ್ತಿದೆ. ಉದ್ಯೋಗ ಕೇಳುವ ಯುವಕರ ಮೆದುಳಿಗೆ ಧರ್ಮದ ಅಫೀಮು ಲೇಪಿಸಲಾಗುತ್ತಿದೆ.

ಹೀಗೆ ರಾಜಕೀಯದಲ್ಲಿ ಜಾತಿ ಧರ್ಮವನ್ನು ಬೆರೆಸಿರುವ ವಿವಿಧ ಪಕ್ಷಗಳ ಭ್ರಷ್ಟ ರಾಜಕಾರಣಿಗಳು ಪ್ರಜಾಪ್ರಭುತ್ವದ ಆಶಯವನ್ನೇ ಮಣ್ಣುಪಾಲು ಮಾಡಿದ್ದಾರೆ. ಮೌಢ್ಯ ಕಂದಾಚಾರಗಳನ್ನು ಪೋಷಿಸಿಕೊಂಡು ಬರುವ ಮೂಲಕ ವೈಜ್ಞಾನಿಕ ಚಿಂತನೆಗಳನ್ನು ಸಾಯಿಸಿದ್ದಾರೆ. ಜನರನ್ನು ಅಂಧಕಾರದಲ್ಲಿಟ್ಟು ಸರ್ಕಾರದ ಬೊಕ್ಕಸವನ್ನು ಲೂಟಿ ಹೊಡೆಯುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ ದಿವಾಕರ್, ಇಂಥಹ ಕೊಳಕು ವ್ಯವಸ್ಥೆಯನ್ನು ಬದಲಿಸಲು ಯುವಜನರು ನೇತಾಜಿ, ಭಗತ್‍ಸಿಂಗ್, ಆಜಾದ್, ಅಶ್ಫಾಖುಲ್ಲ ಖಾನ್, ಖುದಿರಾಂ ಬೋಸ್ ತುಳಿದ ಕ್ರಾಂತಿಯ ಮಾರ್ಗವನ್ನೇ ಅನುಸರಿಸಬೇಕಾದ ಅನಿವಾರ್ಯತೆಯಿದೆ ಎಂದರು.

ಎಐಕೆಕೆಎಂಎಸ್ ತಾಲೂಕು ಕಾರ್ಯದರ್ಶಿ ಶಿವುಕುಮಾರ ಆಂದೋಲಾ ಮಾತನಾಡಿದರು. ಮುಖ್ಯ ಅತಿಥಿಯಾಗಿದ್ದ ಗ್ರಾಪಂ ಮಾಜಿ ಸದಸ್ಯ ಹೀರಾ ಜಾಧವ ಅವರು ನೇತಾಜಿ ಬೋಸ್ ಭಾವಚಿತ್ರಕ್ಕೆ ಹೂಮಾಲೆ ಅರ್ಪಿಸಿದರು. ಎಐಡಿವೈಒ ಕಾರ್ಯದರ್ಶಿ ಗೌತಮ ಪರ್ತೂರಕರ ಅಧ್ಯಕ್ಷತೆ ವಹಿಸಿದ್ದರು. ಗೋದಾವರಿ ಕಾಂಬಳೆ, ಚೌಡಪ್ಪ ಗಂಜಿ, ಈರಣ್ಣ ಇಸಬಾ, ದತ್ತಾತ್ರೇಯ ಹುಡೇಕರ, ಸಿದ್ದರಾಜ ಮದ್ರಿ, ವೀರೇಶ ನಾಲವಾರ, ಮಹಾಂತೇಶ ಹುಳಗೋಳ, ವೀರೇಶ ಗುರೆಗೋಳ, ಚಂದ್ರಶೇಖರ ಕೊಟಗಿ, ಭೀಮಪ್ಪ ಮಾಟ್ನಳ್ಳಿ, ಚಂದ್ರರೆಡ್ಡಿ ದನಕಾಯಿ, ನಾನಾಸಾಬ ಕೋಲಕುಂದಿ, ಮಶಾಕ್ ಗಂವಾರ, ಬಸಯ್ಯಸ್ವಾಮಿ, ದೊಡ್ಡಪ್ಪ ಹೊಸೂರ ಸೇರಿದಂತೆ ಗ್ರಾಮದ ಸಾವಿರಾರು ಜನರು ಪಾಲ್ಗೊಂಡಿದ್ದರು. ನಂತರ ವಿದ್ಯಾರ್ಥಿಗಳಿಂದ ಸಾಂಸ್ಕøತಿಕ ಕಾರ್ಯಕ್ರಮಗಳು ಜರುಗಿದವು. ಸಿದ್ಧಾರ್ಥ ತಿಪ್ಪನೋರ ನಿರೂಪಿಸಿ, ವಂದಿಸಿದರು.