ಅಕ್ಕಿ ಕದಿಯುವವರಿಗೆ‌ ಮತ ಹಾಕಬೇಕಾ: ಶಾಸಕ ಪ್ರಿಯಾಂಕ್ ಖರ್ಗೆ ಪ್ರಶ್ನೆ

ಕಲಬುರಗಿ: ಅಕ್ಕಿ ಕದಿಯುವವರಿಗೆ, ಜಾತಿ ಜಾತಿ ಜಗಳ ಹಚ್ಚುವವರಿಗೆ, ಕೊಲೆಯತ್ನ ಮಾಡಿದ ಆರೋಪ ಇರುವವರಿಗೆ, ಬಾರ್ ಗಳಲ್ಲಿ ಜಗಳ ಮಾಡುವವರಿಗೆ ಚಿತ್ತಾಪುರದ ಜನರು ಮತ ಹಾಕಬೇಕಾ ? ಯಾರು ನಿಮ್ಮ ಶಾಸಕರಾಗಬೇಕು ಎಂದು ನೀವು ನಿರ್ಧರಿಸಬೇಕಾದ ಸಮಯ ಬಂದಿದೆ ಎಂದು ಕಾಂಗ್ರೆಸ್ ಅಭ್ಯರ್ಥಿ ಹಾಗೂ ಶಾಸಕ ಪ್ರಿಯಾಂಕ್ ಖರ್ಗೆ ಅವರು ಹೇಳಿದರು.

ಡೋಣಗಾಂವ ಗ್ರಾಮದಲ್ಲಿ ನಡೆದ ಚುನಾವಣಾ ಪ್ರಚಾರ ಸಭೆಯಲ್ಲಿ ಅವರು ಮಾತನಾಡುತ್ತಿದ್ದರು.

ಜನರು ಜಾಗೃತರಾಗಬೇಕು. ಇದು‌ ಚುನಾವಣಾ ಪ್ರಚಾರ ಸಭೆ ಎನ್ನುವ ‌ಬದಲು ಜಾಗೃತಿ ಮೂಡಿಸುವ ಸಭೆ ಎಂದರೂ ತಪ್ಪಾಗಲಾರದು. ಯಾಕೆಂದರೆ, ಬಜೆಪಿಗರು ತತ್ವ ಸಿದ್ದಾಂತಗಳನ್ನು ಗಾಳಿಗೆ ತೂರಿ ಕ್ರಿಮಿನಲ್ ಹಿನ್ನೆಲೆ ಇರುವವರಿಗೆ ಟಿಕೇಟ್ ನೀಡಿ ಅವರನ್ನೇ ಶಾಸಕರನ್ನಾಗಿ ಮಾಡ ಹೊರಟಿದೆ ಎಂದರು.

ಯುವಕರು ಅವನ ಹಿಂದೆ ಹೋದರೆ, ಅವನಂತೆ ಕ್ರಿಮಿನಲ್ ಹಿನ್ನೆಲೆ ಹೊಂದಿ ಜೈಲು ಬೇಲು ಅಂತ ಕೋರ್ಟಿಗೆ ಅಲೆಯಬೇಕಾಗುತ್ತದೆ. ಈ ಬಗ್ಗೆ ತಾವೆಲ್ಲ ಎಚ್ಚರವಹಿಸಬೇಕು ಎಂದರು.

ಕಾಂಗ್ರೆಸ್ ಪಕ್ಷದ‌ ಐದು ಪ್ರಮುಖ ಗ್ಯಾರೆಂಟಿಗಳ ಬಗ್ಗೆ ವಿವರಿಸಿದ ಖರ್ಗೆ. ಗೃಹ ಭಾಗ್ಯ, ಗೃಹಜ್ಯೋತಿ, ಹತ್ತು ಕೆಜಿ ಅಕ್ಕಿ, ಯುವನಿಧಿ ಹಾಗೂ ಮಹಿಳೆಯರಿಗೆ ಸರ್ಕಾರದ ಬಸ್ ಗಳಲ್ಲಿ ಉಚಿತ ಪ್ರಯಾಣದ‌ ಯೋಜನೆಗಳು ಜನರಿಗೆ ಅನುಕೂಲವಾಗಲಿವೆ. ಆರನೆಯ ಗ್ಯಾರೆಂಟಿ ಏನಂದರೆ, ಅಕ್ಕಿ ಕಳ್ಳತನ ಮಾಡುವವರಿಗೆ ಜೈಲಿಗೆ ಕಳಿಸುವುದಾಗಿದೆ ಎಂದರು.

ಕಳೆದ ಬಾರಿ ನೀವು ನನಗೆ ಆಶೀರ್ವಾದ ಮಾಡಿದ್ದೀರಿ ಆದರೆ ಕೂಲಿ ಸ್ವಲ್ಪ ಕಮ್ಮಿ ಆಗಿತ್ತು. ಆದರೆ, ಈ ಸಲ ಕೂಲಿ ಜಾಸ್ತಿ ಕೊಡಿ‌ ಅಂದಾಗಲೇ ಮಾತ್ರ ಹೆಚ್ಚಿನ ಅನುದಾನ ತಂದು ಅಭಿವೃದ್ದಿ ಮಾಡಲಿದ್ದೇನೆ ಎಂದು ಭರವಸೆ‌ ನೀಡಿದರು.

ವೇದಿಕೆಯ ಮೇಲೆ ಜಗನಗೌಡ ರಾಮತೀರ್ಥ, ಭಾಗನಗೌಡ ಸಂಕನೂರು, ನಾಗರೆಡ್ಡಿ ಪಾಟೀಲ ಕರದಾಳ ಸೇರಿದಂತೆ ಮತ್ತಿತರಿದ್ದರು.