ಕಸಾಯಿಖಾನೆ ತ್ಯಾಜ್ಯ ಮಿಶ್ರಿತ ನೀರು ರಸ್ತೆ ಮೇಲೆ: ಸಾರ್ವಜನಿಕರ ಆಕ್ರೋಶ

ಸುರಪುರ: ನಗರದ ವೆಂಕಟಾಪುರ ರಸ್ತೆ ಬಳಿಯ ಖುರೇಶಿ ಮೊಹಲ್ಲಾದಲ್ಲಿನ ಕಸಾಯಿ ಖಾನೆಯ ತ್ಯಾಜ್ಯ ಮಿಶ್ರಿತ ನೀರು ರಸ್ತೆ ಮೇಲೆ ಹರಿಯುತ್ತಿವೆ ಎಂದು ಸಾರ್ವಜನಿಕರು ಆರೋಪಿಸಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಕಸಾಯಿಖಾನೆಯಲ್ಲಿನ ರಕ್ತ ಮಿಶ್ರಣಗೊಂಡ ನೀರು ರಸ್ತೆ ಮೇಲೆ ಹರಿಯುತ್ತಿರುವುದರಿಂದ ಜನರ ಭಯಗೊಳ್ಳುತ್ತಿದ್ದಾರೆ,ಅಲ್ಲದೆ ಈ ನೀರು ದುರ್ವಾಸನೆ ಬೀರುವುದರಿಂದ ರಸ್ತೆ ಬದಿಯಲ್ಲಿನ ಮನೆಗಳ ಜನರು ಬೇಸತ್ತಿದ್ದಾರೆ.ತ್ಯಾಜ್ಯದ ನೀರು ರಸ್ತೆಯ ಮೇಲೆ ಹರಿಯದಂತೆ ಕ್ರಮ ಕೈಗೊಳ್ಳಲು ನಗರಸಭೆಗೆ ಮನವಿ ಮಾಡಿಕೊಂಡರು ಪ್ರಯೋಜನೆಯಾಗುತ್ತಿಲ್ಲ ಎಂದು ಅಲ್ಲಿಯ ನಿವಾಸಿ ಮಹ್ಮದ್ ಹುಸೇನ್ ಎನ್ನುವವರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

ನಗರಸಭೆ ಈ ನೀರು ರಸ್ತೆಯ ಮೇಲೆ ಹರಿಯುವುದನ್ನು ತಡೆಯದಿದ್ದಲ್ಲಿ ಜನರು ಸಾಂಕ್ರಾಮಿಕ ರೋಗಕ್ಕೊಳಗಾಗುತ್ತಾರೆ.ಜನರು ಬೇಸತ್ತು ನಗರಸಭೆ ಮುಂದೆ ಉಗ್ರ ಪ್ರತಿಭಟನೆ ನಡೆಸಬೇಕಾಗುತ್ತದೆ.ಅಂತಹ ಸ್ಥಿತಿ ನಿರ್ಮಾಣವಾಗುವ ಮುನ್ನ ನಗರಸಭೆ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಕೂಡಲೇ ತ್ಯಾಜ್ಯದ ನೀರು ರಸ್ತೆ ಮೇಲೆ ಹರಿಯುವುದನ್ನು ತಡೆಯಲು ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದ್ದಾರೆ.