ಆಳಂದ; ಬಾಲಕಿಯ ಶವ ಬಾವಿಯಲ್ಲಿ ಪತ್ತೆ | ಕಠಿಣ ಶಿಕ್ಷೆಗೆ ಆಗ್ರಹಿಸಿ ಪ್ರತಿಭಟನೆ

ಕಲಬುರಗಿ: ಆಳಂದ ತಾಲ್ಲೂಕಿನ ಗ್ರಾಮವೊಂದರಲ್ಲಿ ಬಾಲಕಿ ಮೇಲೆ ಅತ್ಯಾಚಾರ ಮಾಡಿ, ಕೊಲೆ ಮಾಡಲಾಗಿದೆ ಎಂದು ಆಕೆಯ ತಂದೆ ನಿಂಬರ್ಗಾ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಅಪ್ರಾಪ್ತ ಬಾಲಕಿಯ ಶವ ಗ್ರಾಮವೊಂದರ ಬಾವಿಯಲ್ಲಿ ಸಿಕ್ಕಿದ್ದು, ಜಲಚರಗಳು ಮುಖದ ಭಾಗವನ್ನು ತಿಂದಿದ್ದರಿಂದ ವಿಕಾರವಾಗಿದೆ. ಅತ್ಯಾಚಾರ, ಕೊಲೆ ಶಂಕೆ ಮೇಲೆ ಅದೇ ಗ್ರಾಮದ ವ್ಯಕ್ತಿಯೊಬ್ಬನ್ನು ಪೊಲೀಸರು ಸೋಮವಾರ ವಶಕ್ಕೆ ಪಡೆದಿದ್ದಾರೆ ಎಂದು ಹೇಳಲಾಗುತ್ತಿದೆ. ಆ ವ್ಯಕ್ತಿಯು ಹಿಂದೆಯೂ ಇಂತಹ ಕೃತ್ಯದಲ್ಲಿ ಭಾಗಿಯಾಗಿ, ಜೈಲು ಶಿಕ್ಷೆಗೂ ಗುರಿಯಾಗಿದ್ದ ಎನ್ನಲಾಗುತ್ತಿದೆ.

ಶನಿವಾರ ಶಾಲೆ ಮುಗಿಸಿಕೊಂಡು ಪಕ್ಕದ ಗ್ರಾಮದ ಚಿಕ್ಕಮ್ಮನ ಮನೆಗೆ ತೆರಳುವುದಾಗಿ ಹೇಳಿ ಹೋದ ಬಾಲಕಿ ಮನೆಗೆ ವಾಪಸ್ ಬಂದಿರಲಿಲ್ಲ. ಭಾನುವಾರ ತಡರಾತ್ರಿ ಬಾವಿಯಲ್ಲಿ ಶವವಾಗಿ ಪತ್ತೆಯಾಗಿದ್ದಾಳೆ ಎಂದು ಗ್ರಾಮಸ್ಥರೊಬ್ಬರು ಹೇಳಿದ್ದಾರೆ.

ಭಾನುವಾರ ಸಂಜೆ ಗ್ರಾಮದ ಹೊರವಲಯದ ಬಾವಿಯೊಂದರಲ್ಲಿ ನೀರು ಬೀಡಲು ಹೋಗಿದ್ದ ವ್ಯಕ್ತಿ ಶವವನ್ನು ನೋಡಿ ಠಾಣೆಗೆ ಮಾಹಿತಿ ನೀಡಿದರು.

ಪೊಲೀಸರು ಶವವನ್ನು ಹೊರ ತೆಗೆದರು. ಆದರೆ, ಶವದ ಮುಖ ಜಲಚರಗಳು ತಿಂದಿದ್ದರಿಂದ ಗುರುತು ಪತ್ತೆಯಾಗಲಿಲ್ಲ. ವಾಟ್ಸ್ಆ್ಯಪ್ ಮೂಲಕ ಶವದ ಫೋಟೊ ತಾಲ್ಲೂಕಿನಾದ್ಯಂತ ಹರಿದಾಡಿದರೂ ಗುರುತು ತಿಳಿದು ಬರಲಿಲ್ಲ. 8ನೇ ತರಗತಿ ಓದುತ್ತಿರುವ ಬಾಲಕಿಯ ಅಣ್ಣನು ಆಕೆ ಧರಿಸಿದ್ದ ಟೀ ಶರ್ಟ್ ಗುರುತು ಹಿಡಿದ’ ಎಂದರು.

ಪ್ರತಿಭಟನೆ: ಪ್ರಕರಣದ ಸಬ್ಬಂಧಿಸಿದಂತೆ ಆರೋಪಿಗಳಿಗೆ ಕಠಿಣ ಶಿಕ್ಷೆಗೆ ಗುರಿಪಡಿಸಬೇಕೆಂದು ಸೋಮವಾರ ಸಂಜೆ ವೇಳೆ ಕುರುಬ ಸಮಾಜದಿಂದ ಜಿಲ್ಲಾಧಿಕಾರಿ ಕಚೇರಿ ಮುಂದೆ ರಸ್ತೆ ತಡೆದು ಪ್ರತಿಭಟನೆ ನಡೆಸಿ ಆಗ್ರಹಿಸಿದರು.

ಎಸ್.ಪಿ ಭೇಟಿ: ಇಂದು ನಿಂಬರ್ಗಾ ಪೊಲೀಸ್ ಠಾಣೆಗೆ ಕಲಬುರಗಿ ಎಸ್.ಪಿ ಈಶಾ ಪಂತ್ ಭೇಟಿ ನೀಡಿ ಘಟನೆ ಕುರಿತು ಸ್ಥಳೀಯ ಪೊಲೀಸರಿಂದ ಮಾಹಿತಿ ಪಡೆದ್ದಿದ್ದಾರೆ.