ಸಾಹಿತ್ಯ ಬದುಕಿನಲ್ಲಿ ಭರವಸೆ ಮೂಡಿಸುತ್ತದೆ: ಎಸಿ ಕೋಲಾರ ಅಭಿಮತ

ಕಲಬುರಗಿ: ವಿಶ್ವಜ್ಯೋತಿ ಪ್ರತಿಷ್ಠಾನದ ವತಿಯಿಂದ ಸೇಡಂ ಪಟ್ಟಣದ ಜ್ಞಾನಜ್ಯೋತಿ ಕೈಗಾರಿಕಾ ತರಬೇತಿ ಕೇಂದ್ರದ ಪ್ರಾಂಗಣದಲ್ಲಿ ಶುಕ್ರವಾರ ಏರ್ಪಡಿಸಿದ್ದ ‘ಬೇಂದ್ರೆ ಶ್ರಾವಣ’ ಸಾಹಿತ್ಯ ಮಾಧ್ಯಮದ ಸಾಮಾಜೀಕರಣ ಎಂಬ ವಿಶೇಷ ಮತ್ತು ಅಪರೂಪದ ಕಾರ್ಯಕ್ರಮವೊಂದು ನಡೆಯಿತು.

ಕಾರ್ಯಕ್ರಮ ಉದ್ಘಾಟಿಸಿದ ಸೇಡಂ ಉಪ-ವಿಭಾಗದ ಸಹಾಯಕ ಆಯುಕ್ತ-ಕೆ.ಎ.ಎಸ್. ಅಧಿಕಾರಿ ರಮೇಶ ಕೋಲಾರ ಮಾತನಾಡಿ, ಕನ್ನಡ ಸಾಹಿತ್ಯದಲ್ಲಿ ಸತ್ವ ಇರುವುದರಿಂದಲೇ ಈ ಸಾಹಿತ್ಯವನ್ನು ಅರಿತು ಅಧ್ಯಯನ ಮಾಡಿದವರು ಉತ್ತುಂಗಕ್ಕೇರುತ್ತಾರೆ ಎಂದ ಅವರು, ಕನ್ನಡದ ವಿವಿಧ ಸಾಹಿತ್ಯ ಪ್ರಕಾರಗಳಾದ ವಚನ ಸಾಹಿತ್ಯ, ದಾಸ ಸಾಹಿತ್ಯವನ್ನು ಶ್ರವಣ ಮಾಡುವುದರ ಮೂಲಕ ಸಮಾಜದಲ್ಲಿ ಬೇರೂರಿರುವ ಮೂಢನಂಬಿಕೆಗಳು, ಕಂದಾಚಾರಗಳು ಹೋಗಲಾಡಿಸಲಿಕ್ಕೆ ಪ್ರಯತ್ನಿಸಿದವು.

ವಿಶೇಷ ಉಪನ್ಯಾಸ ನೀಡಿದ ಸಾಹಿತಿ-ಪತ್ರಕರ್ತ ಜಗನ್ನಾಥ ಎಲ್.ತರನಳ್ಳಿ, ಪುರಾಣ-ಪ್ರವಚನಗಳಂತೆಯೇ ಸಾಹಿತ್ಯದ ಮೂಲಕವೂ ಶ್ರಾವಣ ಆಚರಿಸುವುದು ಅವಶ್ಯವಿದೆ. ಸಮಾಜವನ್ನು, ಜನಜೀವನವನ್ನು ಏಕೀಕರಣಗೊಳಿಸುವಲ್ಲಿ ಸಾಹಿತ್ಯದ ಮೂಲಕ ಮಾನವೀಕರಣಗೊಳಿಸುವಲ್ಲಿ ಶ್ರಮಿಸಿದವರು ಸಾಹಿತಿಗಳು. ಇಂಥ ಜನಮುಖಿ ಸಾಹಿತ್ಯವನ್ನಾಧರಿಸಿ , ಶ್ರಾವಣ ಆಚರಿಸಲು ಯೋಚಿಸಿದಾಗ ಮೊದಲು ನೆನಪಾಗುವುದು ವರಕವಿ ಬೇಂದ್ರೆ ಯವರು. ಬೇಂದ್ರೆಯವರಿಗೂ ಶ್ರಾವಣಕ್ಕೂ ಅವಿನಾಭಾವ ಸಂಬಂಧವಿರುವುದರಿಂದ ಬೇಂದ್ರೆಯವರನ್ನು ಶ್ರಾವಣದ ಕವಿಯೆಂದೇ ಕರೆಯುತ್ತಾರೆ. ಬೇಂದ್ರೆ ಸಾಹಿತ್ಯವೂ ಶ್ರಾವಣದಷ್ಟೇ ಪವಿತ್ರವಾಗಿರುವುದನ್ನು ವಿವರಿಸಿದರು.
ಪ್ರಾಸ್ತಾವಿಕ ಮಾತುಗಳನ್ನಾಡಿದ ಪ್ರತಿಷ್ಠಾನದ ಸಂಸ್ಥಾಪಕ ವಿಜಯಕುಮಾರ ತೇಗಲತಿಪ್ಪಿ, ಆಯಾ ಕಾಲದಲ್ಲಿನ ಮಹಾತ್ಮರು ತಮ್ಮ ತಮ್ಮ ವಿಚಾರಗಳ ಮೂಲಕ ಮನಶುದ್ಧತೆಗೆ ಆದ್ಯತೆ ನೀಡಿದ್ದಾರೆ. ಹಾಗಾಗಿ, ಮಹಾತ್ಮರ ವಿಚಾರಗಳು ಬದುಕಿನಲ್ಲಿ ಅಳವಡಿಸಿಕೊಂಡು ಸಮಾಜಕ್ಕೆ ಬೆಳಕಾಗುವ ಕಾರ್ಯ ಮಾಡಬೇಕೆಂದರು.

ಶ್ರೀ ವಿಶ್ವಗಂಗಾ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ಶಂಕರ ಬಿರಾದಾರ ಅಧ್ಯಕ್ಷತೆ ವಹಿಸಿದ್ದರು. ಶರಣ ಚಿಂತಕ ಕಲ್ಯಾಣಪ್ಪ ಪಾಟೀಲ ಮಳಖೇಡ, ಸಾಹಿತ್ಯ ಪ್ರೇರಕ ಸಿದ್ದಪ್ಪ ತಳ್ಳಳ್ಳಿ, ಎಪಿಎಂಸಿ ಅಧ್ಯಕ್ಷ ಸಿದ್ದು ಬಾನರ್, ಕಾಲೇಜಿನ ದುಂಡಪ್ಪ ಹಿಪ್ಪರಗಿ, ಸಂಗಣ್ಣ ಅಲ್ದಿ, ಪ್ರತಿಷ್ಠಾನದ ಶ್ರೀಕಾಂತ ಪಾಟೀಲ ತಿಳಗೂಳ, ಶಿವಾನಂದ ಮಠಪತಿ, ಅಮ್ಜದ್ ಖಾನ್, ವಿಠಲ ಬರಮಕರ್ ಸೇರಿದಂತೆ ಅನೇಕರು ಭಾಗವಹಿಸಿದ್ದರು…