ಶರಣಬಸವರು ಇಂದಿಗೂ ಲೀಲೆಗೈಯುತ್ತಿದ್ದಾರೆ

ಮಹಾದಾಸೋಹಿ ಶರಣಬಸವೇಶ್ವರರು ಇಂದಿಗೂ ಅನೇಕ ಲೀಲೆಗಳನ್ನು ಮಾಡುತ್ತಾ ಎಲ್ಲಾ ಜಾತಿಯವರ ಆರಾಧ್ಯ ದೇವರಾಗಿದ್ದಾರೆ ಎಂದು ಶರಣಬಸವೇಶ್ವರ ವಾಣಿಜ್ಯ ಪದವಿಪೂರ್ವ ಮಹಾವಿದ್ಯಾಲಯದ ಸಹ ಪ್ರಾಧ್ಯಾಪಕಿ ಪ್ರೊ. ಜಗದೇವಿ ಗುಳೇದ ಹೇಳಿದರು.

ಕಲಬುರಗಿಯ ಶರಣಬಸವೇಶ್ವರ ಸಂಸ್ಥಾನದ ಅಖಿಲ ಭಾರತ ಶಿವಾನುಭವ ಮಂಟಪದಲ್ಲಿ ಶ್ರಾವಣ ಮಾಸದ ಪ್ರಯುಕ್ತ ಹಮ್ಮಿಕೊಂಡಿರುವ ೪೦ ದಿನಗಳ ಉಪನ್ಯಾಸ ಮಾಲಿಕೆಯಲ್ಲಿ ಮಂಗಳವಾರ ’ಮಹಾದಾಸೋಹಿ ಶರಣಬಸವರ ಶಿವಲೀಲೆಗಳ’ ಕುರಿತು ಉಪನ್ಯಾಸ ನೀಡಿದರು.

ಶರಣಬಸವರ ಸಾನಿಧ್ಯದಲ್ಲಿ ಮಾದೇವನೆಂಬ ಭಕ್ತನಿದ್ದ. ಶರಣರ ಮಾತುಗಳೇ ಅವನಿಗೆ ವೇದವಾಕ್ಯ. ಅವನನ್ನು ಕೆಲವು ಕಿಡಿಗೇಡಿಗಳು ಆಗಾಗ ಅವಮಾನ ಮಾಡುತ್ತಿದ್ದರು. ಶರಣರಿಗೆ ಇದು ಗೊತ್ತಾಗಿ ಅವರನ್ನು ಕರೆದು ಬುದ್ಧಿ ಹೇಳುತ್ತಾರೆ. ಬುದ್ಧಿ ಹೇಳಿದರೂ ಅವರು ಹಾಗೇ ಮಾಡುತ್ತಾರೆ. ಒಂದು ದಿನ ಅವಮಾನುಸುತ್ತಿದ್ದಾಗ ಅವರ ಕಣ್ಣು ಬಾಯಿ ಎರಡು ಕಳೆದುಕೊಳ್ಳುತ್ತಾರೆ. ಈಗ ಮಾದೇವನಿಗೆ ನೋಡುವಂತಿಲ್ಲ, ಬಾಯಿಂದ ಬೈಯುವಂತಿಲ್ಲ. ಆಗ ಅವರು ಅಳುವದನ್ನು ನೋಡಲಾರದೆ ಮಾದೇವನೆ ಅವರ ಕೈ ಹಿಡಿದು ಶರಣರಲ್ಲಿಗೆ ಕರೆದುಕೊಂಡು ಬರುತ್ತಾನೆ. ಶರಣರು ಅವರಿಗೆ ಬುದ್ಧಿ ಹೇಳಿ ವಿಭೂತಿ ತಂದು ಹಣೆಗೆ ಹಚ್ಚುತ್ತಾರೆ. ತಕ್ಷಣ ಕಣ್ಣು ಬಾಯಿ ಪಡೆದ ಅವರು ಶರಣರ ಪಾದಕ್ಕೆರಗುತ್ತಾರೆ.

ಒಂದು ಸಲ ಜೈನಯತಿಯೊಬ್ಬ ಶರಣರಲ್ಲಿಗೆ ಬಂದು ಲಿಂಗಿಲ್ಲ, ಭಸ್ಮಿಲ್ಲ ಎಂದು ವಾದ ಮಾಡುತ್ತಾನೆ. ಶರಣರು ಎಷ್ಟು ಬುದ್ಧಿ ಹೇಳಿದರೂ ಕೇಳದ ಆ ಯತಿ ಕಲ್ಲು ಲಿಂಗದಲ್ಲಿ ಹೇಗೆ ದೇವರನ್ನು ಕಾಣಲು ಸಾಧ್ಯ ಎಂದು ಜೈನ ಧರ್ಮದ ಶ್ರೇಷ್ಠತೆ ಹೇಳುತ್ತಾನೆ. ಆಗ ಶರಣರು ಭಕ್ತನೊಬ್ಬ ಇಷ್ಟಲಿಂಗ ಪೂಜೆ ಮಾಡಿಕೊಳ್ಳುವಾಗ ಆ ಜೈನ ಮುನಿಯನ್ನು ಆ ಲಿಂಗದೊಳಗೆ ತೋರಿಸುತ್ತಾರೆ. ಅವನು ತನ್ನ ತಪ್ಪನ್ನು ಒಪ್ಪಿಕೊಂಡು ಶರಣರಿಗೆ ಸಾಷ್ಟಾಂಗ ಹಾಕಿ ಶರಣಾಗುತ್ತಾನೆ.
ಶ್ರಾವಣ ಮಾಸದಲ್ಲಿ ಮುಸ್ಲಿಂ ಹೆಣ್ಣು ಮಗಳೊಬ್ಬಳು ಒಂದು ತಿಂಗಳ ಪರ್ಯಂತ ಮಹಾಮನೆಗೆ ಬಂದು ಶರಣಬಸವರ ದರ್ಶನ ಮಾಡಿ ಹೋಗುತ್ತಿದ್ದಳು. ಒಂದು ದಿನ ಮಳೆ ಜೋರಾಗಿ ಬಂದು ಆ ಹೆಣ್ಣುಮಗಳು ಬರುವುದು ಅಸಾಧ್ಯವಾದರೂ ಹಾಗೆಯೇ ಹೊರಟಾಗ ಕಾಲು ಜಾರಿ ಬಿದ್ದು ನೀರಿನಲ್ಲಿ ಕೊಚ್ಚಿಕೊಂಡು ಹೋಗತೊಡಗಿದಳು. ಆದರೂ ಭಕ್ತಿಯಿಂದ ’ ಯಪ್ಪಾ ಶರಣಾ’ ಎಂಬ ನಾಮಸ್ಮರಣೆ ಮಾಡುತ್ತಲೇ ಇದ್ದಳು. ಕೆಲವೇ ನಿಮಿಷಗಳಲ್ಲಿ ದೊಡ್ಡಗಿಡ ಆಕೆಗೆ ಅಧಾರವಾಗಿ ಸಿಕ್ಕಿತು. ಯಾರೋ ಆ ಗಿಡವನ್ನು ಹತ್ತಿಸಿಬಿಟ್ಟಂತಾಯಿತು. ಗಿಡದೊಳಗೆ ಕುಳಿತ ಆ ಮಹಿಳೆಯ ಮೇಲೆ ಒಂದು ಮಳೆ ಹನಿ ಬೀಳಲಿಲ್ಲ. ಮೂರು ದಿನ ಅಲ್ಲಿಯೇ ಕುಳಿತರೂ ಹಸಿವೆ ನೀರಡಿಕೆಗಳಿಲ್ಲ. ಮಳೆ ನಿಂತ ಮೂರು ದಿನಕ್ಕೆ ಆ ಹೆಣ್ಣುಮಗಳು ಅದೇ ಭಕ್ತಿಯಿಂದ ಬಂದು ಶರಣರ ದರ್ಶನ ಮಾಡುತ್ತಾಳೆ. ಅಲ್ಲಿ ನಡೆದ ವಿಚಾರವನ್ನು ಎಲ್ಲರಿಗೂ ಹೇಳುತ್ತಾಳೆ. ಅಲ್ಲಾನಿಗಿಂತಲೂ ಶರಣರು ಹೆಚ್ಚಾಗಿದ್ದಾರೆಂದು ಎಲ್ಲರೂ ನಿಂತಲ್ಲಿಯೇ ಕೈ ಮುಗಿಯುತ್ತಾರೆ.

ಯುಗಾದಿ ದಿನದಂದು ಶರಣರು ಸಾವಿರದ ಜಂಗಮರಿಗೆ ದಾಸೋಹ ಮಾಡುವ ನಿಯಮವನ್ನರಿಸಿಕೊಂಡಿದ್ದರು. ಒಂದು ದಿನ ಜಂಗಮ ಶರಣರು ನಡೆಸುತ್ತಿರುವ ದಾಸೋಹದಲ್ಲಿ ಜಗಳ ತೆಗೆಯುತ್ತಾನೆ. ಶರಣರು ಬಂದು ಕೈ ಜೋಡಿಸಿ ಪ್ರಸಾದ ಪಡೆಯಿರಿ ಎಂದು ಹೇಳಿದರೂ ಕೆಲ ಜಂಗಮರು ದಿಕ್ಕರಿಸಿ ಹೋಗುತ್ತಿದ್ದಾಗ ಕುಸಿದು ಬಿಳುತ್ತಾರೆ. ಮುಂದಕ್ಕೆ ಹೋಗಲು ಆಗುತ್ತಿಲ್ಲ. ತಕ್ಷಣವೇ ’ತಪ್ಪಾಯ್ತಪ್ಪಾ ಶರಣರೇ ಕಾಪಾಡಿ’ ಎಂದು ಚೀರಲು ಪ್ರಾರಂಭಿಸುತ್ತಾರೆ. ವಿಭೂತಿ ಒಯ್ದು ಅವರ ಹಣೆಗೆ ಹಚ್ಚಿದಾಗ ಕಾಲುಗಳು ನೆಟ್ಟಗಾಗುತ್ತವೆ. ತಕ್ಷಣವೇ ಶರಣರ ಪಾದವಿಡಿದು ತಪ್ಪನ್ನು ಒಪ್ಪಿಕೊಳ್ಳುತ್ತಾರೆ. ಶರಣರು ಅವರಿಗೆ ಬುದ್ಧಿ ಹೇಳಿ ಕಳುಹಿಸುತ್ತಾರೆ. ಇಷ್ಟೇ ಅಲ್ಲದೆ ಇನ್ನು ಕೆಲವು ಇತ್ತೀಚಿಗೆ ನಡೆದ ಲೀಲೆಗಳನ್ನು ಸಹ ಪ್ರೊ.ಜಗದೇವಿ ಗುಳೇದ ಹೇಳಿದರು.

ಪ್ರೊ. ಜಗದೇವಿ ಗುಳೇದ, ಸಹ ಪ್ರಾಧ್ಯಾಪಕಿ