ಕೊರೊನಾ ಕನವರಿಸುವ ವಚನಗಳು’ ಪುಸ್ತಕ ಬಿಡುಗಡೆ

ಕುಟುಂಬ ಜವಾಬ್ದಾರಿ ಜೊತೆ ಪುಸ್ತಕ ಸಂಸ್ಕøತಿ ಕಳಕಳಿ: ಪ್ರೊ.ಎಚ್.ಟಿ. ಪೋತೆ

ಕಲಬುರಗಿ: ಕುಟುಂಬ ಜವಾಬ್ದಾರಿ ಜೊತೆ ಸಾಮಾಜಿಕ ಹಾಗೂ ಪುಸ್ತಕ ಸಂಸ್ಕøತಿಯ ಕಳಕಳಿ ವಾತಾವರಣ ಕಾರ್ಯ ಶ್ಲಾಘನೀಯ ಎಂದು ಗುಲಬರ್ಗಾ ವಿಶ್ವವಿದ್ಯಾಲಯ ಪ್ರಸಾರಾಂಗ ನಿರ್ದೇಶಕ ಪ್ರೊ.ಎಚ್.ಟಿ.ಪೋತೆ ಅಭಿಪ್ರಾಯಪಟ್ಟರು.

ನಗರದ ಎನ್‍ಜಿಓ ಕಾಲೋನಿಯ ಮಾರುತಿ ಪ್ರೆಸ್ಟೀಜ್ ಆವರಣದಲ್ಲಿ ಏರ್ಪಡಿಸಲಾಗಿದ್ದ ಸಂಗಮನಾಥ ರೇವತಗಾಂವ ರಚನೆಯ `ಕೊರೊನಾ ಕನವರಿಸುವ ವಚನಗಳು’ (ಗುಲಬರ್ಗಾ ವಿಶ್ವವಿದ್ಯಾಲಯ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದ ಕೃತಿ) ಪುಸ್ತಕ ಬಿಡುಗಡೆ ಹಾಗೂ ರಾಷ್ಟ್ರಕವಿ ಕುವೆಂಪು ಜನ್ಮದಿನಾಚರಣೆ ಸಮಾರಂಭ ಉದ್ಘಾಟಿಸಿ ಮಾತನಾಡಿ, ಮನೆ, ಮಕ್ಕಳು ಸಂಗಡ ಶಿಕ್ಷಣ ಕೊಡುವ ಪದ್ಧತಿಗೆ ಸೀಮಿತವಾಗದೆ ಲೇಖಕ- ಪತ್ರಕರ್ತ ರೇವತಗಾಂವ ಅವರು, ಗೃಹಪ್ರವೇಶದಂದು ಕೃತಿ ಬಿಡುಗಡೆ ಮಾಡುವ ಮೂಲಕ ವಿನೂತನ ನಿತ್ಯ ನೂತನಕ್ಕೆ ಕಾರಣವಾಗಿದ್ದಾರೆ ಎಂದು ಅವರು ಹೇಳಿದರು.

ಕೊರೊನಾ ಹೊತ್ತಿನಲ್ಲಿ ಆತಂಕದ ನಡುವೆ ವಚನಗಳನ್ನು ಸೃಷ್ಟಿಸಿ ಕೃತಿ ಮೂಲಕ ಜಾಗೃತಿಯನ್ನು ತಂದಿದ್ದಾರೆ. ಬಸವಣ್ಣ ಸಾಂಸ್ಕøತಿಕ ನಾಯಕ ಎಂದು ಸರಕಾರ ಗುರುತಿಸುವುದಕ್ಕಿಂತ ಮುಂದೆ ಎಲ್ಲೆಡೆ ಪ್ರಸರವಾಗಿದೆ. ಸತ್ಯ ಸಂಘರ್ಷ ಮಾಡುತ್ತದೆ. ಸುಳ್ಳಿಗೆ ಸಂಘರ್ಷ ಬೇಕಿಲ್ಲ ಎಂದ ಅವರು, ಸಮಾಜದಲ್ಲಿ ಸಾಹಿತ್ಯ ಸಮಹಿತವಾಗಿದೆ. ಅಕ್ಷರ ಬೆರಗಿನಿಂದ ಬದಲಾಗುವ ಸನ್ನಿವೇಶ ಕಾಣುತ್ತಿದ್ದೇವೆ ಎಂದು ಅವರು ವಿವರಿಸಿದರು.

ಹಿರಿಯ ಸಾಹಿತಿ ಡಾ.ಸ್ವಾಮಿರಾವ ಕುಲಕರ್ಣಿ ಕೃತಿ ಪರಿಚಯ ಮಾಡಿದರು. ಶ್ರೀ ಶರಣಬಸವೇಶ್ವರ ಸಂಸ್ಥಾನದ ಪೂಜ್ಯ ಶ್ರೀ ಲಿಂಗರಾಜಪ್ಪ ಅಪ್ಪ, ಪ್ರಕಾಶಕ ಅಪ್ಪಾರಾವ ಅಕ್ಕೋಣಿ, ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಅಧ್ಯಕ್ಷ ವಿಜಯಕುಮಾರ ಪಾಟೀಲ ತೇಗಲತಿಪ್ಪಿ ಮುಖ್ಯ ಅತಿಥಿಯಾಗಿ ಆಗಮಿಸಿ ಮಾತನಾಡಿದರು.

ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾಧ್ಯಕ್ಷ ಬಾಬುರಾವ ಯಡ್ರಾಮಿ ಅಧ್ಯಕ್ಷತೆ ವಹಿಸಿದ್ದರು.

ಆರಂಭದಲ್ಲಿ ಕು.ಸೃಜನಾ, ಕು.ಸಂಪದಾ ಪ್ರಾರ್ಥನೆ ಹಾಡಿದರು. ರಶ್ಮಿ ಸಂಗಮನಾಥ-ಜ್ಯೋತಿ ಗಲಗಿನ್ ಸ್ವಾಗತಗೀತೆ ಹಾಡಿದರು. ಲೇಖಕ-ಪತ್ರಕರ್ತ ಸಂಗಮನಾಥ ರೇವತಗಾಂವ ಸ್ವಾಗತಿಸಿದರು. ಸಿ.ಎಸ್.ಮಾಲೀಪಾಟೀಲ ನಿರೂಪಿಸಿದರು. ಹಿರಿಯ ಲೇಖಕ ಮಹಿಪಾಲರಡ್ಡಿ ಮುನ್ನೂರ ವಂದಿಸಿದರು.