ಮನೆ ಕನ್ನ ಕಳವು ಮಾಡುತ್ತಿದ್ದ ಆರೋಪಿಗಳ ಬಂಧನ

ಕಲಬುರಗಿ: ನಗರದ ಹೊರ ವಲಯದ ಬಡಾವಣೆಯಲ್ಲಿ ರಾತ್ರಿ ಹೊತ್ತು ಮುಖಕ್ಕೆ ಮಂಕಿ ಕ್ಯಾಪ್ ಹಾಕಿಕೊಂಡು ಕೈಯಲ್ಲಿ ಮಾರಕಾಸ್ತ್ರ ಹಿಡಿದು ಓಡಾಡುತ್ತಿದ್ದ ಸಿಸಿಟಿವಿ ಫುಟೇಜ್‍ಗಳು ಸಾಮಾಜಿಕ ಜಾತಾಣದಲ್ಲಿ ಹರಿದಾಡುತ್ತಿದ್ದ ಬೆನ್ನಲ್ಲೇ ಎಚ್ಚೆತ್ತುಕೊಂಡ ಕಲಬುರಗಿ ಪೊಲೀಸರು ಮನೆಗೆ ಕನ್ನ ಹಾಕಿ ಕಳ್ಳತನ ಮಾಡುತ್ತಿದ್ದ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಅಗಲು ಬಗ್ಗು ಚವ್ಹಾಣ (50) ಸೀತಾರಾಮ ಬಗ್ಗು ಚವ್ಹಾಣ (26) ಅವರನ್ನು ಬಂದಿ ಸಲಾಗಿದ್ದು, ಇನ್ನಿಬ್ಬರು ತಪ್ಪಿಸಿಕೊಂಡು ಓಡಿ ಹೋಗಿದ್ದು, ಅವರನ್ನು ಸಹ ಕೂಡಲೇ ಪತ್ತೆ ಹಚ್ಚಲಾಗುವುದು ಎಂದು ಕಲಬುರಗಿ ಮಹಾನಗರ ಪೊಲೀಸ್ ಆಯುಕ್ತ ಚೇತನ್ ಆರ್. ತಿಳಿಸಿದರು.

ಆಳಂದ ತಾಲ್ಲೂಕಿನ ಕಮಸರ ನಾಯಕ ತಾಂಡಾ ನಿವಾಸಿಗಳಾದ ಇವರುಗಳು ರಾತ್ರಿ ವೇಳೆ ಬೈಕ್ ಮೇಲೆ ಕಲಬುರಗಿ ನಗರಕ್ಕೆ ಆಗಮಿಸಿ ಸಾಯಿನಗರ, ರಾಮಮಂದಿರ ನೃಪತುಂಗ ಕಾಲೋನಿ, ಹುಂಡೇಕಾರ ಕಾಲೋನಿ, ಭೂಪಾಲ ತೆಗನೂರ ಗ್ರಾಮದಲ್ಲಿ ಮನೆಗಳನ್ನು ಕಳ್ಳತನ ಮಾಡಿರುವ ಬಗ್ಗೆ ತಪ್ಪು ಒಪ್ಪಿಕೊಂಡಿದ್ದಾರೆ ಎಂದು ಶನಿವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

6 ಪ್ರಕರಣಗಳಲ್ಲಿ ಸಿಕ್ಕಿರುವ 4,30,000 ರೂ ಮೌಲ್ಯದ 72 ಗ್ರಾಂ. ಬಂಗಾರದ ಆಭರಣ, 18,000 ರೂ. ಮೌಲ್ಯದ ಬೆಳ್ಳಿ ಆಭರಣ, 80,000 ರೂ. ಮೌಲ್ಯದ ಎರಡು ಬೈಕ್ ಹೀಗೆ ಒಟ್ಟು ಅಂದಾಜು 5,28,000 ರೂ. ಬೆಲೆ ಬಾಳುವ ಬಂಗಾರ, ಬೆಳ್ಳಿ ಹಾಗೂ ಬೈಕ್‍ಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ನಗರ ಪೊಲೀಸ್ ಆಯುಕ್ತ ಚೇತನ್ ಆರ್., ಉಪ ಪೊಲೀಸ್ ಆಯುಕ್ತರಾದ ಕನಿಕಾ ಸಿಕ್ರವಾಲ, ಪ್ರವೀಣ ಎಚ್. ನಾಯಕ ಮಾರ್ಗದರ್ಶನದಲ್ಲಿ ಎಸಿಪಿ ಡಿ.ಜಿ. ರಾಜಣ್ಣ ನೇತೃತ್ವದಲ್ಲಿ ವಿವಿ ಠಾಣೆಯ ಪಿಐ ಜಗದೀಶ ಪಿಎಸ್‍ಐಗಳಾದ ಮಹ್ಮದ್ ಇಬ್ರಾಹಿಂ ಹುಸೇನ್ ಭಾಷಾ, ಸಿಬ್ಬಂದಿಗಳಾದ ರಾಜು ಟಕಾಳೆ, ಹಾಜಿ ಮಲಂಗ್, ಪ್ರಕಾಶ, ವಿಶ್ವನಾಥ, ಮಂಜುನಾಥ, ಪ್ರೀತಮ್, ಸುಲ್ತಾನ್ ಅವರೊನ್ನೊಳಗೊಂಡ ತಂಡವು ಆರೋಪಿಗಳನ್ನು ವಶಕ್ಕೆ ಪಡೆದು ಮಾಡಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ತಿಳಿಸಿದರು.