ಉದ್ಯೋಗ ಖಾತ್ರಿ ಸಮರ್ಪಕ ಜಾರಿಗೊಳಿಸದಿದ್ದರೆ ಉಗ್ರ ಹೋರಾಟ

ಸುರಪುರ: ಈಗಾಗಲೆ ರೈತರು ಮತ್ತು ಕಾರ್ಮಿಕರು ಸತತ ಬರಗಾಲದಿಂದ ತತ್ತರಿಸಿದ್ದು ಇಂತಹ ಸಂದರ್ಭದಲ್ಲಿ ಸರಕಾರಗಳು ರೈತರು ಕಾರ್ಮಿಕರ ನೆರವಿಗೆ ಬಾರದೆ ಜನತೆಗೆ ಇನ್ನಷ್ಟು ಸಂಕಷ್ಟಕ್ಕೀಡು ಮಾಡುತ್ತಿವೆ.ಉದ್ಯೋಗ ಖಾತ್ರಿ ಯೋಜನೆಯನ್ನು ಸಮರ್ಪಕವಾಗಿ ಜಾಅರಿಗೊಳಿಸದಿದ್ದಲ್ಲಿ ಉಗ್ರ ಹೋರಾಟ ನಡೆಸಲಾಗುವುದು ಎಂದು ಕರ್ನಾಟಕ ಪ್ರಾಂತ ಕೃಷಿ ಕೂಲಿಕಾರರ ಸಂಘದ ರಾಜ್ಯ ಜಂಟಿ ಕಾರ್ಯದರ್ಶಿ ಮಲ್ಲಮ್ಮ ಕೊಡ್ಲಿ ಮಾತನಾಡಿದರು.

ತಾಲ್ಲೂಕಿನ ಬೋನ್ಹಾಳ ಗ್ರಾಮದ ಶಾಖೆ ಉದ್ಘಾಟಿಸಿ ಮಾತನಾಡಿ,ಯಾದಗಿರಿ ಜಿಲ್ಲೆಯಲ್ಲಿನ ಜನಪ್ರತಿನಿಧಿಗಳ ನಿರ್ಲಕ್ಷ್ಯದಿಂದಾಗಿ ಜನರು ನಿತ್ಯ ಗುಳೆ ಹೋಗುವಂತಾಗಿದೆ.ಬಡಜನರ ಭವಣೆಯನ್ನು ಅರಿಯದ ಜನಪ್ರತಿನಿಧಿಗಳಿಗೆ ಮುಂದೆ ಸಂಘಟನೆ ತಕ್ಕ ಪಾಠ ಕಲಿಸಲಿದೆ ಎಂದರು.ಜಿಲ್ಲಾದ್ಯಂತ ಉದ್ಯೋಗ ಖಾತ್ರಿ ಯೋಜನೆಯನ್ನು ಸಮರ್ಪಕವಾಗಿ ಜಾರಿಗೊಳಿಸಬೇಕು,ಮತ್ತು ಎಲ್ಲಾ ಕೂಲಿಕಾರರಿಗೆ ಹದಿನೈದು ದಿನಕ್ಕೊಮ್ಮೆ ಕೂಲಿ ಹಣ ನೀಡಬೇಕೆಂದು ಒತ್ತಾಯಿಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಸಂಘದ ಜಿಲ್ಲಾಧ್ಯಕ್ಷ ದಾವಲಸಾಬ ನದಾಫ್ ಮಾತನಾಡಿ,ಸರಕಾರಗಳು ಪಶು ಪಕ್ಷಿಗಳಿಗಾಗಿ ಅನೇಕ ಸೌಲಭ್ಯ ಮತ್ತು ಕಾನೂನುಗಳನ್ನು ಮಾಡುತ್ತವೆ.ಆದರೆ ಕೂಲಿಕಾರರಿಗಾಗಿ ಒಂದು ಸರಿಯಾದ ಕಾನೂನುಗಳಿಲ್ಲ.ಉದ್ಯೋಗ ಖಾತ್ರಿ ಯೋಜನೆ ಎಲ್ಲವು ಬಲಾಢ್ಯರ ಪಾಲಾಗುತ್ತಿವೆ.ಬಡವರಿಗೆ ನೆರವಾಗುತ್ತಿಲ್ಲ,ಕೂಡಲೆ ಸರಕಾರ ಎಲ್ಲಾ ಕೂಲಿಕಾರರಿಗೆ ಉದ್ಯೋಗ ನೀಡಬೇಕು ಮತ್ತು ದಿನಕ್ಕೆ ಆರು ರೂಪಾಯಿ ಕೂಲಿ ನೀಡಬೇಕೆಂದು ಆಗ್ರಹಿಸಿದರು.

ಇದೇ ಸಂದರ್ಭದಲ್ಲಿ ಗ್ರಾಮ ಶಾಖೆಗೆ ಪದಾಧಿಕಾರಿಗಳನ್ನಾಗಿ ಅಧ್ಯಕ್ಷರು ಸದ್ದಮ್ಮ ಭಜಂತ್ರಿ, ಉಪಾಧ್ಯಕ್ಷರು ದುರ್ಗಪ್ಪ ಮಾಲಗತ್ತಿ,ಜುಲೇಖಾ ಬೇಗಂ,ಕಾರ್ಯದರ್ಶಿ ರಾಜು ದೊಡ್ಡಮನಿ,ಸಹ ಕಾರ್ಯದರ್ಶಿ ಹಣಮಂತಿ,ಗಂಗಮ್ಮ ಇವರುಗಳನ್ನು ನೇಮಕಗೊಳಿಸಲಾಯಿತು.ಕಾರ್ಯಕ್ರಮದಲ್ಲಿ ಸಂಗಯ್ಯ ಸ್ವಾಮಿ ಹಿರೇಮಠ,ಬಸವರಾಜ ಪೂಜಾರಿ,ಭೀಮಪ್ಪ ದೊಡ್ಮನಿ,ಯಂಕಣ್ಣ ಹಾಳೆರ ವೇದಿಕೆ ಮೇಲಿದ್ದರು.