ಕಾರ್ಮಿಕ ವಿರೋಧಿ ಅಮರೇಶ್ವರ ನಾಯಕ ಸೋಲಿಸಲು ರಮೇಶ ವೀರಾಪೂರು ಕರೆ

ಹಟ್ಟಿ: ಚಿನ್ನದ ಗಣಿ ಕಾರ್ಮಿಕರ ಮತ್ತು ಅಧಿಕಾರಿಗಳ ಮನೆ ಕೆಲಸ ಮಾಡುವ ಕಾರ್ಮಿಕರ ಸಭೆ ನಡೆಸಿ ಮೇ 7 ರಂದು ನಡೆಯುವ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯನ್ನು ಸೋಲಿಸುವ ಇಂಡಿಯಾ ಕೂಟದ ಪ್ರಬಲ ಅಭ್ಯರ್ಥಿಗೆ ಮತ ಚಲಾಯಸಬೇಕು ಎಂದು ಸಿಪಿಐ (ಎಂ) ತಾಲೂಕು ಕಾರ್ಯದರ್ಶಿ ರಮೇಶ ವೀರಾಪೂರು ಕರೆ ನೀಡಿದರು.

ಮನೆಗೆಲಸ ಮಾಡಿ ಜೀವನ ನಡೆಸಲು ಸಾಧ್ಯವಾಗದಂತಹ ಸಂಬಳ ಪಡೆಯುತ್ತಿದ್ದಾರೆ. ಅವಧಿ ಮೀರಿ ಕೆಲಸ ಮಾಡಿದರೂ ನಗರಗಳಲ್ಲಿ ಒಪ್ಪತ್ತಿನ ಊಟಕ್ಕೂ ಪರಿತಪಿಸುವಂತಾಗಿದೆ. ತಿಂಗಳಿಗೆ ಬಿಡಿಗಾಸು ಪಡೆದು ಜೀವನ ನಡೆಸುವುದು ದುಸ್ತರವಾಗಿದೆ. ಕಾರ್ಮಿಕರ ಬದುಕು ಬೆಳಗಿಸುತ್ತೇವೆ ಎಂದು ಹೇಳುವ ಕೇಂದ್ರ ಸರಕಾರ ದಿನನಿತ್ಯ ಅಗತ್ಯ ವಸ್ತುಗಳ ಬೆಲೆ ಏರಿಕೆ ಮಾಡಿ ಕಾರ್ಮಿಕರ ಬದುಕನ್ನು ಮೂರಾಬಟ್ಟೆ ಮಾಡಿದೆ. ಇಂತಹ ಜನ ವಿರೋಧಿ ಕಾರ್ಮಿಕ ವಿರೋಧಿ ಸರ್ಕಾರ ಅಧಿಕಾರಕ್ಕೆ ಬರಲು ಬಿಡಬಾರದು. ಅಮರೇಶ್ವರ ನಾಯಕ ಎಂಪಿ ಆಗಿ ಒಂದು ದಿನವೂ ಕಾರ್ಮಿಕರ ಕಷ್ಟ ಕೇಳಿಲ್ಲ. ಇಂತಹ ಕಾರ್ಮಿಕ ವಿರೋಧಿ ಬಿಜೆಪಿ ಅಭ್ಯರ್ಥಿ ಅಮರೇಶ್ವರ ನಾಯಕ್ ವಿರುದ್ಧವಾಗಿ ಮತ ಚಲಾಯಿಸಬೇಕು ಎಂದರು.

ಈ ಸಂದರ್ಭದಲ್ಲಿ ಸಿಪಿಐಎಂ ಪಕ್ಷದ ಮುಖಂಡರಾದ ನಿಂಗಪ್ಪ ಎಂ, ದಾವೂದ್ ಸೇರಿದಂತೆ ಮನೆಗೆಲಸ ಕಾರ್ಮಿಕ ಸಂಘದ ಮುಖಂಡರು, ನೂರಾರು ಮನೆಗೆಲಸ ಮಾಡುವ ಕಾರ್ಮಿಕರು ಉಪಸ್ಥಿತರಿದ್ದರು.