ವಂಚನೆಯ ಆರೋಪ: ಕಾಂಗ್ರೆಸ್ ಶಾಸಕ ಡಾ.ಅಜಯಸಿಂಗ್ ಮಾಜಿ ಆಪ್ತ ಸಹಾಯಕನ ಬಂಧನ

ಕಲಬುರಗಿ: ಸರಕಾರಿ ನೌಕರಿ ಹಾಗೂ ಕಾಮಗಾರಿಗಳನ್ನು ಕೊಡಿಸುತ್ತೇನೆಂದು ಹೇಳಿ ವಂಚಿಸಿದ ಕೆಕೆಆರ್ಡಿಬಿ ಅಧ್ಯಕ್ಷ ಹಾಗೂ ಜೇವರ್ಗಿ ಶಾಸಕ ಡಾ.ಅಜಯ್ ಧರ್ಮಸಿಂಗ್ ಅವರ ಮಾಜಿ ಆಪ್ತ ಸಹಾಯಕ ಪರಶುರಾಮ ಪಾಟೀಲ ವಿರುದ್ಧ ಮೋಸˌ ವಂಚನೆ ಮತ್ತು ನಂಬಿಕೆಯ ಉಲ್ಲಂಘನೆ (420, 406)ಕುರಿತು ಪ್ರಕರಣ ದಾಖಲಾಗಿದೆ.

2020ರಿಂದ 2024 ರವರೆಗೆ ಡಾ.ಅಜಯ್ ಧರ್ಮಸಿಂಗ್ ಅವರ ಬಳಿ ಆಪ್ತ ಸಹಾಯಕರಾಗಿ ಕೆಲಸ ಮಾಡುತ್ತಿದ್ದ ಪರಶುರಾಮ ಪಾಟೀಲ ನೆಲೋಗಿ ಇವರು ಸರಕಾರಿ ನೌಕರಿ ಹಾಗೂ ಕಾಮಗಾರಿಗಳನ್ನ ಕೊಡಿಸುವುದಾಗಿ ಹಣ ಪಡೆದು 32 ಜನ ಕಾಂಗ್ರೆಸ್ ಕಾರ್ಯಕರ್ತರಿಗೆ ವಂಚಿಸಿದ್ದಾನೆ ಎಂದು ಜೇವರ್ಗಿ ಪೊಲೀಸ್ ಠಾಣೆಗೆ ಬಂದು ವಂಚಿತರು ದೂರು ನೀಡಿದ್ದರು.

ಈ ರೀತಿಯಾಗಿ ಮೋಸಕ್ಕೊಳಗಾದ ಜನರು ಶಾಸಕರ ಬಳಿ ದೂರು ಹೇಳಿದ್ದರು. ಹಲವರ ಹಣವನ್ನು ಕೊಡಿಸುವಲ್ಲಿ ಶಾಸಕರು ಕೂಡ ಸಹಾಯ ಮಾಡಿದ್ದರು. ನಂತರ ಮಾಹಿತಿ ಪಡೆದು ಡಾ.ಅಜಯಸಿಂಗ್ ಅವರು ವರ್ಷದ ಹಿಂದೆಯೆ ಪರಶುರಾಮ ಅವರನ್ನು ಆಪ್ತ ಸಹಾಯಕ ಸ್ಥಾನದಿಂದ ತೆಗೆದುಹಾಕಿದ್ದರು.

ಮೋಸ ಹೋದವರಲ್ಲಿ ಬೀದರˌ ಕಲಬುರಗಿˌ ಸುರಪುರˌ ಜೇವರ್ಗಿ ಮತ್ತು ಯಡ್ರಾಮಿಗೆ ಸೇರಿದ ಕಾಂಗ್ರೆಸ್ ಮುಖಂಡರಿದ್ದಾರೆ. ಪೊಲೀಸರು ಪರಶುರಾಮ ಅವರನ್ನು ಬಂದಿಸಿದ್ದು ಜೇವರ್ಗಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.