ವಿಧವೆಯರರಿಗೆ ಸೌಲಭ್ಯಗಳು, ಗೌರವ ದೊರೆಯಲಿ

ಕಲಬುರಗಿ: ಎಲ್ಲಾ ವಿಧವೆಯರಿಗೆ ಸರ್ಕಾರ ಯೋಜನೆಯಾದ ವಿಧವಾ ವೇತನದ ಸಮರ್ಪಕ ಜಾರಿಯಾಗಬೇಕು. ವಿಶೇಷವಾಗಿ ವಿಧವಯೆರಿಗಾಗಿಯೇ ಮನೆಗಳನ್ನು ನಿರ್ಮಿಸಿ ಒದಗಿಸಬೇಕು.ಸ್ವಾವಲಂಬಿ ಜೀವನಕ್ಕೆ ಪೂರಕವಾದ ಸ್ವಯಂ ಉದ್ಯೋಗಾವಕಾಶಗಳನ್ನು ನೀಡಬೇಕು. ಅವರಿಗೆ ಗೌರವ ನೀಡಬೇಕು ಎಂದು ಸಾಮಾಜಿಕ ಹೋರಾಟಗಾರ, ನ್ಯಾಯವಾದಿ ಡಾ.ಸುನೀಲಕುಮಾರ ಎಚ್.ವಂಟಿ ಸರ್ಕಾರಕ್ಕೆ ಒತ್ತಾಸೆ ಮಾಡಿದರು.

ನಗರದ ಗುಲ್ಲಾಬಾವಡಿ ಬಡಾವಣೆಯ ಸಮುದಾಯ ಭವನದ ಆವರಣದಲ್ಲಿ ‘ಬಸವೇಶ್ವರ ಸಮಾಜ ಸೇವಾ ಬಳಗ’ ಮತ್ತು ‘ಸುಜಯ್ ಶಿಕ್ಷಣ ಮತ್ತು ಕಲ್ಯಾಣ ಸಂಸ್ಥೆ’ಯ ವತಿಯಿಂದ ಭಾನುವಾರ ಏರ್ಪಡಿಸಲಾಗಿದ್ದ ‘ಅಂತಾರಾಷ್ಟ್ರೀಯ ವಿಧವೆಯರ ದಿನಾಚರಣೆ’ಯಲ್ಲಿ ಅವರು ಮಾತನಾಡಿದರು.

ಬಳಗದ ಅಧ್ಯಕ್ಷ ಹಾಗೂ ವೈಚಾರಿಕ ಚಿಂತಕ ಎಚ್.ಬಿ.ಪಾಟೀಲ ಮಾತನಾಡಿ, ವಿಧವೆಯರ ಬಗ್ಗೆ ಕೀಳರಿಮೆ ಸಲ್ಲದು. ಅವರಿಗೆ ನೋವು ನೀಡುವುದು ಅಮಾನವೀಯ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆ. ಮಹಾತ್ಮ ಗೌತಮ ಬುದ್ಧ, ವಿಶ್ವಗುರು ಬಸವಣ್ಣ, ಡಾ. ಬಾಬಾಸಾಹೇಬ್ ಅಂಬೇಡ್ಕರ್, ಮಹಾತ್ಮ ಜ್ಯೋತಿಬಾಫುಲೆ, ಸಾವಿತ್ರಿಬಾಯಿ ಫುಲೆ, ರಾಜಾರಾಮ ಮೋಹನರಾಯ್ ಅವರತಂತಹ ಮಹನೀಯರು ಮಹಿಳೆಯರ ಸಮಾನತೆಗಾಗಿ ಹೋರಾಡಿರುವುದು ಸ್ಮರಣೀಯ. ವಿಧವೆಯರ ಎಂದಿಗೂ ಕೂಡಾ ದೈತಿಗೆಡದೆ ಧೈರ್ಯದಿಂದ ಜೀವನ ಸಾಗಿಸಬೇಕು. ವಿಧವಾ ಮಹಿಳೆಯರು ಕನಿಷ್ಠವೆಂದು ಭಾವಿಸಿ ಆಕೆಯನ್ನು ಯಾವುದೇ ಆಚರಣೆ, ಕಾರ್ಯಕ್ರಮ, ಸಭೆ-ಸಮಾರಂಭ, ಶುಭ ಕಾರ್ಯದಿಂದ ದೂರವಿರಿಸುವುದು ತಪ್ಪು. ಸಾಮಾನ್ಯ ಮಹಿಳೆಯರಂತೆ ಆಕೆಗೂ ಬದುಕುವ ಹಕ್ಕಿದೆ. ವಿಧವೆಯರ ಮನಸ್ಸಿಗೆ ನೋವಾಗುವ ರೀತಿಯಲ್ಲಿ ಸಮಾಜ ವರ್ತಿಸುವುದು ನಿಲ್ಲಿಸಬೇಕು. ವಿಧವೆಯರು ಕನಿಷ್ಠವಲ್ಲ ಎಂದರು.

ಐವರು ವಿಧವಾ ತಾಯಂದಿರಾದ ಲಕ್ಷ್ಮೀ ಹೊಸಮನಿ, ಆಶಮ್ಮ ಗುಡ್ಡಪಾಪ, ಬನ್ನೆಮ್ಮ ಹೊಸಮನಿ, ಶರಣಮ್ಮ ಅಲಿಪುರಕರ್ ಹಾಗೂ ರತ್ನಮ್ಮ ಭೀಮನಳ್ಳಿ ಅವರು ಸಾಮೂಹಿಕವಾಗಿ ಉದ್ಘಾಟಿಸಿದ್ದು ವಿಶೇಷವಾಗಿತ್ತು. ನಂತರ ಇವರಿಗೆ ಗೌರವಿಸಿ, ಸಮ್ಮಾನಿಸಲಾಯಿತು.
ಕಾರ್ಯಕ್ರಮದಲ್ಲಿ ಜಿಲ್ಲಾ ಮಾದಿಗ ಸಮಾಜದ ಅಧ್ಯಕ್ಷ ಸಿದ್ದಲಿಂಗ ಕಟ್ಟಿಮನಿ, ಮಾಜಿ ಸೈನಿಕ ರಾಜು ನಾಗೂರಕರ್, ಪ್ರಮುಖರಾದ ರಾಜು ಕಾಂಬಳೆ, ಶರಣಪ್ಪ ಹೊಟ್ಟೆನವರ್, ಮಹಾದೇವಿ ಗುಲ್ಲಾಬಾವಡಿ, ರಾಣಮ್ಮ ಹೊಸಮನಿ ಸೇರಿದಂತೆ ಇನ್ನಿತರರು ಪಾಲ್ಗೊಂಡಿದ್ದರು.