ನೊಂದವರ ಬಾಳಿಗೆ ಬೆಳಕಾಗುವವರೇ ನೈಜ ಸಾಧಕರು

ಕಲಬುರಗಿ: ಯಾವ ವ್ಯಕ್ತಿ ಸಮಾಜದಲ್ಲಿರುವ ನೊಂದವರು, ಬಡವರು, ಅಸಹಾಯಕರ ಪರ ಕಾಳಜಿ ಹೊಂದಿ ಅವರಿಗೆ ಸಹಾಯ ಮಾಡುತ್ತಾನೆಯೋ, ಅವರೇ ಸಮಾಜದ ನೈಜ ಸಾಧಕರಾಗುತ್ತಾರೆ. ಹುಟ್ಟು-ಸಾವುಗಳ ಮಧ್ಯೆ ಸಮಾಜಮುಖಿ ಕಾರ್ಯಗಳು ಪ್ರಮುಖ. ಯಾರು ಸಮಾಜಕ್ಕೆ ದುಡಿದಿರುತ್ತಾರೆಯೋ, ಅವರ ಸ್ಮರಣೆ ಅಗತ್ಯವಾಗಿದೆ ಎಂದು ಪಿಡಿಎ ಇಂಜಿನಿಯರಿಂಗ ಕಾಲೇಜಿನ ಪ್ರಾಧ್ಯಾಪಕ ಡಾ.ಬಾಬುರಾವ ಶೇರಿಕಾರ ಹೇಳಿದರು.

ನಗರದ ಜಗತ್ ಬಡಾವಣೆಯ ಡೋಹರ ಕಕ್ಕಯ್ಯ ದೇವಸ್ಥಾನದ ಆವರಣದಲ್ಲಿ ಆಳಂದ ತಾಲೂಕಿನ ಬಾಳ್ಳಿ ಗ್ರಾಮದ ಹಿರಿಯ ಮುಖಂಡ, ಸಮಾಜ ಸೇವಕ ಲಿಂ.ಶಿವಶರಣಪ್ಪ ಎಸ್.ದೊಡ್ಡದೊಡ್ಡಿ (ಬಿರಾದಾರ) ಅವರ 8ನೇ ಲಿಂಗೈಕ್ಯ ಸ್ಮರಣೋತ್ಸವ ನಿಮಿತ್ಯ ‘ಬಸವೇಶ್ವರ ಸಮಾಜ ಸೇವಾ ಬಳಗ’ ವತಿಯಿಂದ ಶನಿವಾರ ಏರ್ಪಡಿಸಲಾಗಿದ್ದ ವಿವಿಧ ಕ್ಷೇತ್ರದ ಸಾಧಕರಿಗೆ ಗೌರವ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.

ಬಳಗದ ಅಧ್ಯಕ್ಷ ಹಾಗೂ ಉಪನ್ಯಾಸಕ ಎಚ್.ಬಿ.ಪಾಟೀಲ ಮಾತನಾಡಿ, ಕೌಟುಂಬಿಕ ವ್ಯವಸ್ಥೆಯ ಸಫಲತೆಯಲ್ಲಿ ತಂದೆಯ ಪಾತ್ರ ಪ್ರಮುಖವಾಗಿದೆ. ಮಕ್ಕಳಿಗೆ ಮೌಲ್ಯಗಳು, ಸಂಸ್ಕಾರ ಬೆಳೆಸಿ ಸಮಾಜಕ್ಕೆ ಮಕ್ಕಳನ್ನು ದೊಡ್ಡ ಆಸ್ತಿಯನ್ನಾಗಿಸುವುವರು ಆದರ್ಶ ತಂದೆಯಾಗುತ್ತಾರೆ. ಮೂರ್ಖ ಮಕ್ಕಳು ಸಮಾಜಕ್ಕೆ ಕಂಠಕವಾಗುತ್ತಾರೆ. ಲಿಂ.ಶಿವಶರಣಪ್ಪ ಎಸ್.ದೊಡ್ಡದೊಡ್ಡಿ ಅವರು ಪ್ರಗತಿಪರ ರೈತರು, ಸಮಾಜ ಸೇವಕರು, ಶಿಕ್ಷಣ ಪ್ರೇಮಿಗಳು, ಆಧ್ಯಾತ್ಮಿಕ ಜೀವಿಗಳು ಹಾಗೂ ಗ್ರಾಪಂ ಮಾಜಿ ಅಧ್ಯಕ್ಷರಾಗಿ ಸಮಾಜಕ್ಕೆ ವಿವಿಧ ಆಯಾಮಗಳಲ್ಲಿ ಅಮೂಲ್ಯವಾದ ಕೊಡುಗೆಯನ್ನು ನೀಡಿದ್ದಾರೆ. ಇಂಥಹ ವ್ಯಕ್ತಿಗಳ ಆದರ್ಶ, ಮೌಲ್ಯಗಳು ಸಮಾಜಕ್ಕೆ ಮಾದರಿಯಾಗುತ್ತವೆ ಎಂದರು.

ವಿವಿಧ ಕ್ಷೇತ್ರದ ಸಾಧಕರಾದ ಸಾಯಬಣ್ಣ ಹೋಳ್ಕರ್ ನೀಲೂರ, ಅಫಜಲಪುರ(ಆಧ್ಯಾತ್ಮಿಕ), ರಾಜಕುಮಾರ ಪಾಟೀಲ ಕಮಕನೂರ, ಕಾಳಗಿ(ಕೃಷಿ),ಅಸ್ಲಾಂ ಶೇಖ್ ಟಾಕಳಿ, ಅಫಜಲಪುರ(ಸಮಾಜ ಸೇವೆ), ಗೌಡೇಶ ಬಿರಾದಾರ, ಕಲಬುರಗಿ(ಶಿಕ್ಷಣ), ಓಂಕಾರ ವಠಾರ, ಕಲಬುರಗಿ(ರಾಜಕೀಯ) ಅವರಿಗೆ ಸತ್ಕರಿಸಿ, ಗೌರವಿಸಲಾಯಿತು.

ಕಾರ್ಯಕ್ರಮದಲ್ಲಿ ನಿವೃತ್ತ ಕೃಷಿ ಅಧಿಕಾರಿ ಹಾಗೂ ಕಸಾಪ ಉತ್ತರ ವಲಯದ ಗೌರವ ಅಧ್ಯಕ್ಷ ಶಿವಯೋಗೆಪ್ಪಾ ಎಸ್.ಬಿರಾದಾರ, ಜ್ಯೋತಿ ಪಾಟೀಲ, ಸೋಮಶೇಖರ ವಠಾರ, ಭಿಮರಾಯ ಕಡಗನ್, ಸೂರ್ಯಕಾಂತ ಪಾಟೀಲ, ರಾಜಕುಮಾರ ಅವಟಗಿ, ಹಿರಗಪ್ಪ ಎಸ್.ಬರಗಲಿ, ಶರಣು ಜಮಾದಾರ, ಮಲ್ಲಿಕಾರ್ಜುನ ಪಾಟೀಲ, ಶ್ರೀಮಂತ ತುಪ್ಪದ ಸೇರಿದಂತೆ ಇನ್ನಿತರರು ಪಾಲ್ಗೊಂಡಿದ್ದರು.