ಮನುಷ್ಯರಿಗೆ ಮಾನ್ಯತೆ ಕೊಟ್ಟ ಧರ್ಮವೇ ವಚನ ಧರ್ಮ: ಡಾ. ಈಶ್ವರಯ್ಯ ಮಠ

ಕಲಬುರಗಿ: ಕೌಟುಂಬಿಕ ಕಾರ್ಯಕ್ರಮಗಳನ್ನು ಸಮಾಜಮುಖಿಯಾಗಿ ಮಾಡುವುದು ಅಗತ್ಯವಿದೆ. ವ್ಯಕ್ತಿ, ಕುಟುಂಬ, ಸಮಾಜ ಒಂದಕ್ಕೊಂದು ಸಂಬಂಧ ಉಳಿಸಿಕೊಂಡಿವೆ. ಇದೊಂದು ಒಳ್ಳೆಯ ಪರಂಪರೆ. ಈ ಪರಂಪರೆ ಉಳಿಸಿಕೊಂಡು ಹೋಗಬೇಕು ಎಂದು ಹಿರಿಯ ಸಾಹಿತಿ ಡಾ. ಬಸವರಾಜ ಸಬರದ ಹೇಳಿದರು.

ಕರ್ನಾಟಕ ವಚನ ಸಾಹಿತ್ಯ ಅಕಾಡೆಮಿ ವತಿಯಿಂದ ಸಮೃದ್ಧಿಯ ನೆನಹಿನಲ್ಲಿ ನಗರದ ಮದರ್ ತೆರೆಸಾ ಶಿಕ್ಷಣ ಮಹಾವಿದ್ಯಾಲಯದಲ್ಲಿ ಮಂಗಳವಾರ ಹಮ್ಮಿಕೊಂಡ ಸಹಸ್ರಮಾನದ ವಚನಾಂತರಗದ ಅವಲೋಕನ ವೈಚಾರಿಕ ಚಿಂತನಾ ಸಮಾವೇಶದಲ್ಲಿ ವಚನ ಕಂಠಪಾಠ ಸ್ಪರ್ಧೆಯಲ್ಲಿ ವಿಜೇತರಾದ ಮಕ್ಕಳಿಗೆ ಪ್ರಶಸ್ತಿ ಪತ್ರ ವಿತರಣೆ ಮಾಡಿ ಮಾತನಾಡಿದರು.

ಆರಂಭದಲ್ಲಿ ವೇದಕ್ಕೆ ಒರೆಯ ಕಟ್ಟಿದ ಶರಣರು, ವೇದ ಓದಿನ ಮಾತು ಎಂದು ಮುಂದೆ ಇದನ್ನು ಪುನರ್ ಸೃಷ್ಟಿ ಮಾಡಿದರು. ವೇದ ಕೇವಲ ಓದಿನ ಮಾತು ಹೊರತು ಅನುಭವ, ಅನುಭಾವದ ಮಾತು ಅಲ್ಲ ಎಂದು ಪದ ಪದದ ಜೊತೆಗೆ ಪದಾರ್ಥದ ಅರ್ಥ ಹೇಳಿದರು ಎಂದು ಅರ್ಥೈಸಿದರು.

ಕಾರ್ಯಕ್ರಮ ಉದ್ಘಾಟಿಸಿದ
ಸಾಹಿತಿ ಡಾ. ಈಶ್ವರಯ್ಯ ಮಠ ಮಾತನಾಡಿ, ಯಾರು ಚಿಂತಿಸಬಲ್ಲರೋ, ಯಾರು ಆಲೋಚಿಸಬಲ್ಲರೋ ಅವರು ಮನುಷ್ಯರು. ದಯೆ, ಅಂತಕರಣವುಳ್ಳವರು ಮಾನವರು. ಮನುಷ್ಯರಿಗೆ ಮಾನ್ಯತೆ ಕೊಡುವುದೇ ವಚನ ಸಾಹಿತ್ಯದ ಸಾರವಾಗಿದೆ ಎಂದು ಹೇಳಿದರು.

ಜೀವ ವಿರೋಧಿಸುವ ಶಾಸ್ತ್ರವನ್ನು ಮೀರಿ ಜೀವ ಪ್ರೀತಿಸುವ ವಚನ ಸಾಹಿತ್ಯವು ಅಂಗ-ಲಿಂಗ, ಮನುಷ್ಯ-ಮಾನವ, ಭಕ್ತ-ಶರಣನಾಗುವ ಪರಿಯನ್ನು ಬಿಚ್ಷಿಟ್ಟರು ಎಂದು ತಿಳಿಸಿದರು.

ಸ್ವಾಗತ ಸಮಿತಿ ಅಧ್ಯಕ್ಷ ಡಾ. ಸುರೇಶ ಶರ್ಮಾ, ಕಾರ್ಯಾಧ್ಯಕ್ಷ ಡಾ. ರಾಘವೇಂದ್ರ ಚಿಂಚನಸೂರ, ವೈಚಾರಿಕ ಚಿಂತಕ ಜಗನ್ನಾಥ ಎಲ್. ತರನಳ್ಳಿ, ಶ್ರವಸ್ತಿ ಟ್ರಸ್ಟ್ ಅಧ್ಯಕ್ಷ ಡಾ. ಕಿರಣ ದೇಶಮುಖ, ಮದರ್ ತೆರೆಸಾ ಬಿ.ಈಡಿ ಕಾಲೇಜು ಪ್ರಾಚಾರ್ಯೆ ಡಾ. ವನಿತಾ ಜಾಧವ ವೇದಿಕೆಯಲ್ಲಿದ್ದರು.

ಸಂಸ್ಥೆ ಕಾರ್ಯದರ್ಶಿ ಶಿವಪುತ್ರಪ್ಪ ಡೆಂಕಿ ಅಧ್ಯಕ್ಷತೆ ವಹಿಸಿದ್ದರು. ಅಕಾಡೆಮಿ ಅಧ್ಯಕ್ಷ ವಿಜಯಕುಮಾರ ಪಾಟೀಲ ತೇಗಲತಿಪ್ಪಿ ಪ್ರಸ್ತಾವಿಕ ಮಾತನಾಡಿ ಸ್ವಾಗತಿಸಿದರು. ಪರಮೇಶ್ವರ ಶೆಟಕಾರ ನಿರೂಪಿಸಿದರು.