ಎಡ-ಬಲ ಪಂಥಕ್ಕಿಂತ ಮನುಷ್ಯ ಪಂಥ ಬಹಳ ಮುಖ್ಯ: ಡಾ. ಎಚ್.ಟಿ. ಪೋತೆ

ಕಲಬುರಗಿ: ಇಡೀ ನಾಡಿಗೆ ಕಲ್ಯಾಣ ಕರ್ನಾಟಕ ಭಾಗದ ಕೊಡುಗೆ ಅಪಾರವಾಗಿದೆ ಗುಲ್ಬರ್ಗ ವಿವಿ ಕನ್ನಡ ಅಧ್ಯಯನ ಸಂಸ್ಥೆಯ ನಿರ್ದೇಶಕ ಡಾ. ಎಚ್.ಟಿ. ಪೋತೆ ಅಭಿಪ್ರಾಯಪಟ್ಟರು.

ಕಲಬುರಗಿ ಸಾಂಸ್ಕೃತಿಕ ಪ್ರತಿಷ್ಠಾನ, ಬೀದರ್ ನ ಸಿದ್ದೇಶ್ವರ ಪ್ರಕಾಶನದ ವತಿಯಿಂದ ಭಾನುವಾರ ಹಮ್ಮಿಕೊಂಡಿದ್ದ ಲೇಖಕಿ ಪ್ರೇಮಾ ಹೂಗಾರ ಅವರ ಗಜಲ್ ಬಂಧ ಹಾಗೂ ಹಾಯ್ಕುಗಳು ಎರಡು ಕೃತಿಗಳನ್ನು ಲೋಕಾರ್ಪಣೆ ಮಾಡಿ ಮಾತನಾಡಿದ ಅವರು, ಗಜಲ್ ಮತ್ತು ಹಾಯ್ಕುಗಳು ಭಾರತದ ಜಾಯಮಾನದವಲ್ಲ. ಆದರೆ ಈ ಭಾಗದ ಜನರು ಆ ಪ್ರಕಾರಗಳನ್ನು ಬರೆಯುವ ಮೂಲಕ ಅವುಗಳು ಕೂಡ ನಮ್ಮದೇ ಭಾಗವಾಗಿ ಬೆಳೆದಿರುವುದು ಸಂತೋಷದ ವಿಷಯ ಎಂದರು.

ಅನಕ್ಷರತೆ, ಅಸ್ಪೃಷ್ಯತೆ, ಅಜ್ಞಾನ ಭಾರತದ ಇಂದಿನ ಸಮಾಜಕ್ಕೆ ಅಪಾಯಕಾರಿಯಾಗಿದ್ದು, ಈ ಮೂರರ ಮೂಲೋತ್ಪಾಟನೆ ಮಾಡಬೇಕಾಗಿರುವುದು ಇಂದಿನ ಅಗತ್ಯವಾಗಿದೆ ಎಂದು ವಿವರಿಸಿದರು.

ಪ್ರೇಮ-ಪ್ರೀತಿ ಎನ್ನುವುದು ಪ್ರಣಯವನ್ನು ಮೀರಿದ್ದಾಗಿರಬೇಕು. ಪ್ರಣಯವೇ ಪ್ರಧಾನವಾಗಿರಬಾರದು. ಪ್ರೀತಿ-ಪ್ರೇಮ ಸೀಮಾತೀತ. ಇದೊಂದು ವಿಶಿಷ್ಟ ಸಂಸ್ಕೃತಿ. ಕವಿ, ಲೇಖಕ, ಸಾಹಿತಿಗಳಿಗೆ ಜವಾಬ್ದಾರಿ ಇರಬೇಕು ಎಂದು ತಿಳಿಸಿದರು.

ಕುವೆಂಪು ಅವರು ಸಾಕಷ್ಟು ಸಮಸ್ಯೆ-ಸವಾಲುಗಳನ್ನು ಎದುರಿಸಿ ಅವುಗಳನ್ನು ಸಮರ್ಥವಾಗಿ ಎದುರಿಸಿದರು. ಇಂದಿನ ಯುವ ಲೇಖಕರ ಎದುರಿಗೆ ಅನೇಕ ಸವಾಲುಗಳಿವೆ. ಸಾಂಪ್ರದಾಯಿಕತೆಯನ್ನು ಮೀರಿ ಬೆಳೆಯಬೇಕು. ಜಾತಿ ಸಂಕೊಲೆಗಳನ್ನು ಮೀರಿ ಸಮಾಜಮುಖಿಯಾಗಿ ಬೆಳೆಯಬೇಕು. ಎಡ ಬಲ ಯಾವುದೇ ಪಂಥದವರಾಗಿರದೆ, ಮನುಷ್ಯ ಪಂಥೀಯನಾಗುವ ಕಡೆ ಆಲೋಚಿಸುವುದು ಇಂದಿನ ತುರ್ತಾಗಿದೆ ಎಂದು ಹೇಳಿದರು.

“ಗಜಲ್ ಬಂಧ” ಕುರಿತು ಸಿಯುಕೆ ಕನ್ನಡ ಪ್ರಾಧ್ಯಾಪಕ ಡಾ. ಅಪ್ಪಗೆರೆ ಸೋಮಶೇಖರ, “ಹಾಯ್ಕುಗಳು” ಕುರಿತು ಪತ್ರಕರ್ತ-ಲೇಖಕ ಮಹಿಪಾಲರೆಡ್ಡಿ ಮುನ್ನೂರ್ ಮಾತನಾಡಿದರು.

ಹಿರಿಯ ಸಾಹಿತಿ ಡಾ. ಸ್ವಾಮಿರಾವ ಕುಲಕರ್ಣಿ ಅಧ್ಯಕ್ಷತೆ ವಹಿಸಿದ್ದರು. ಬೀದರ್ ಜಿಲ್ಲಾ ಕಸಾಪ ಅಧ್ಯಕ್ಷ ಸುರೇಶ ಚನಶೆಟ್ಟಿ, ಪ್ರತಿಷ್ಠಾನದ ಅಧ್ಯಕ್ಷ ಬಿ.ಎಚ್. ನಿರಗುಡಿ, ಲೇಖಕಿ ಪ್ರೇಮಾ ಹೂಗಾರ ವೇದಿಕೆಯಲ್ಲಿದ್ದರು. ಡಾ. ಶರಣಬಸಪ್ಪ ವಡ್ಡನಕೇರಿ ನಿರೂಪಿಸಿದರು.

ಚಾಮರಾಜ ದೊಡ್ಡಮನಿ, ಪಿ.ಎಂ. ಮಣ್ಣೂರ, ಕಾಶಿನಾಥ ಅಂಬಲಗೆ, ಡಾ.‌ಸುಜಾತಾ ಜಂಗಮಶೆಟ್ಟಿ, ಜ್ಯೋತಿ ಡಿ. ಬೊಮ್ಮಾ, ಶಾಂತಾ ಪಸ್ತಾಪುರ, ಎಸ್. ಪಿ. ಸುಳ್ಳದ, ಪ್ರಭಾಕರ ಸಾತಖೇಡ ಇತರರಿದ್ದರು.