ಕೆಪಿಸಿಸಿ ಅಧ್ಯಕ್ಷ ಪಟ್ಟಕಾಗಿ ಡಿಕೆಶಿ ಟೆಂಪಲ್ ರನ್?

ಕಲಬುರಗಿ: ಕೆಪಿಸಿಸಿ ಅಧ್ಯಕ್ಷ ಗಾದಿಯ ಕನಸು ಕಾಣುತ್ತಿರುವ ಕಾಂಗ್ರೆಸ್ ಟ್ರಬಲ್ ಶೂಟರ್ ಡಿಕೆ.ಶಿವಕುಮಾರ್ ಇದೀಗ ಮತ್ತೆ ಟೆಂಪಲ್ ರನ್ ಆರಂಭಿಸಿದ್ದಾರೆ.

ಬೆಂಗಳೂರಿನಿಂದ ವಿಮಾನದ ಮೂಲಕ ಇಂದು ಮಧ್ಯಾಹ್ನ ೧.೩೦ಕ್ಕೆ ಕಲಬುರಗಿಗೆ ಆಗಮಿಸಿದ, ನಂತರ ಅಲ್ಲಿಂದ ರಸ್ತೆ ಮಾರ್ಗವಾಗಿ ಯಾದಗಿರಿ ಜಿಲ್ಲೆಯ ವಡಗೇರಾ ತಾಲೂಕಿನ ಗೋನಾಲ್ ಗಡೇಯ ದುರ್ಗಾದೇವಿ ದೇವಸ್ಥಾನಕ್ಕೆ ಭೇಟಿ ನೀಡಿ ಅಲ್ಲಿ ದೇವಿಯ ದರ್ಶನ ಪಡೆದ್ದು, ನಂತರ ರಸ್ತೆ ಮೂಲಕ ಕಲಬುರಗಿಗೇ ಆಗಮಿಸಿ ವಾಸ್ತವ್ಯ ಮಾಡಲಿದ್ದಾರೆ.

ಗುರುವಾರ  ಬೆಳಗ್ಗೆ 9 ಗಂಟೆಗೆ ಅಫಜಲಪುರ್ ತಾಲೂಕಿನ ಗಾಣಗಾಪುರದ ಶ್ರೀ ದತ್ತಾತ್ರೇಯ ದೇವಸ್ಥಾನಕ್ಕೆ ಭೇಟಿ ನೀಡಿ ಅಲ್ಲಿರುವ ನಿರ್ಗುಣ ಪಾದುಕೆಗಳಿಗೇ ವಿಶೇಷ ಪೂಜೆ ಸಲ್ಲಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಈ ಹಿಂದೆ ಐಟಿ ದಾಳಿ ನಂತರ ಸಹ ಡಿಕೆಶಿ ದತ್ತನ ಮೊರೆ ಹೋದ ಬಳಿಕ ಒಂದಿಷ್ಟು ಕಷ್ಟಗಳು ನಿವಾರಣೆಯಾಗಿದ್ದವು, ಅದಾದ ಬಳಿಕ ಇನ್ನೆನ್ನು ಕೆಪಿಸಿಸಿ ಅಧ್ಯಕ್ಷ ಪಟ್ಟ ಅಲಂಕರಿಸಬೇಕು ಅನ್ನುವಷ್ಟರಲ್ಲಿಯೇ ಇದೀಗ ಮತ್ತೆ ಹಲವು ವಿಘ್ನಗಳು ಎದುರಾಗಿದ್ದು, ಆ ವಿಘ್ನಗಳು ನಿವಾರಣೆ ಮಾಡಲು ಡಿಕೆ.ಶಿವಕುಮಾರ್ ಇದೀಗ ಅವರ ಇಷ್ಟಾರ್ಥ ದೇವರ ಮೊರೆ ಹೋಗುತ್ತಿದ್ದಾರೆ ಎಂದು ಪಕ್ಷದಲ್ಲಿ ಗುಸುಗುಸು ಕೇಳಿಬರುತ್ತಿದೆ.