ಅನುಭವಗಳೇ ಜೀವನದ ಪಾಠಗಳು: ಮಲ್ಲಿನಾಥ ಮುನ್ನೊಳ್ಳಿ

ಆಳಂದ: ಜೀವನದಲ್ಲಿ ಅನುಭವಿಸಿದ ಅನುಭವ ಸಿಹಿ ಕಹಿ ಕಷ್ಟ ಕಾರ್ಪಣ್ಯಗಳೇ ನಮ್ಮ ಪಾಠಗಳಾಗಿವೆ ಎಂದು ಆಳಂದನ ಶ್ರೀನಿವಾಸ ದೇಸಾಯಿ ಪ್ರೌಢಶಾಲೆಯ ಮುಖ್ಯ ಗುರು ಮಲ್ಲಿನಾಥ ಮುನ್ನೊಳ್ಳಿ ಅಭಿಪ್ರಾಯಪಟ್ಟರು.

ಗುರುವಾರ ತಾಲೂಕಿನ ಮೋಘಾ (ಬಿ) ಗ್ರಾಮದಲ್ಲಿ ಜೀವನಜ್ಯೋತಿ ಶಿಕ್ಷಣ ಮತ್ತು ಕಲ್ಯಾಣ ಸಂಸ್ಥೆಯ ಸಂಚಾಲಿತ ಶ್ರೀಮಂತ ಧೋತ್ರೆ ಸ್ಮಾರಕ ಪ್ರೌಢಶಾಲೆಯಲ್ಲಿ ಹಮ್ಮಿಕೊಂಡಿದ್ದ ೧೦ನೇ ತರಗತಿ ವಿದ್ಯಾರ್ಥಿಗಳ ಬೀಳ್ಕೊಡುಗೆ ಸಮಾರಂಭದಲ್ಲಿ ಮುಖ್ಯ ಅತಿಥಿಹಗಳಾಗಿ ಮಾತನಾಡಿದರು.

ವಿದ್ಯಾರ್ಥಿಗಳು ಪರೀಕ್ಷೆಯ ಬಗ್ಗೆ ಪೂರ್ವಾಗ್ರಹ ಪೀಡಿತರಾಗಿ ಭಯಪಡಬಾರದು ಪರೀಕ್ಷೆಯನ್ನು ಒಂದು ಸಂಭ್ರಮದಂತೆ ಆಚರಿಸಲು ಮಾನಸಿಕವಾಗಿ ಸಿದ್ಧರಾಗಬೇಕು ಅದಕ್ಕಾಗಿ ಸಮತೂಕದ ದೈಹಿಕ ಮತ್ತು ಮಾನಸಿಕ ಸ್ಥಿತಿಯನ್ನು ಕಾಪಾಡಿಕೊಂಡು ಬರುವುದು ಅವಶ್ಯಕವಾಗಿದೆ ಎಂದು ಹೇಳಿದರು.

ಹೆಚ್ಚು ಅಂಕಗಳಿಸಬೇಕು ಎಂಬ ಆಸೆಯಿರಲಿ ಆದರೆ ಅದಕ್ಕಾಗಿ ವಾಮಮಾರ್ಗವನ್ನು ಅನುಸರಿಸುವುದು ಬೇಡ. ಎಷ್ಟೇ ಅಡಚಣೆ ಬಂದರೂ ಧೈರ್ಯ ಮತ್ತು ಸ್ಥೈರ್ಯದಿಂದ ಪರೀಕ್ಷೆ ಎದುರಿಸಬೇಕು ಎಂದು ವಿದ್ಯಾರ್ಥಿಗಳಿಗೆ ಸಲಹೆ ನೀಡಿದರು.

ಹಣಮಂತ ಶೇರಿ, ಮಲ್ಲಿನಾಥ ಬುಕ್ಕೆ, ಸತೀಶ ಸನ್ಮುಖ ಮಾತನಾಡಿದರು. ಶಾಲಾ ವಿದ್ಯಾರ್ಥಿಗಳು ಕಾರ್ಯಕ್ರಮ ನಿರ್ವಹಿಸಿದರು. ಮುಖ್ಯ ಗುರು ಸಿದ್ದಾರಾಮ ಧೋತ್ರೆ ಅಧ್ಯಕ್ಷತೆ ವಹಿಸಿದ್ದರು.