ಅಮೇರಿಕಾ ಜನವಿರೋಧಿ ನೀತಿ ವಿರುದ್ಧ ಎಸ್.ಯು.ಸಿ.ಐ ಪ್ರತಿಭಟನೆ

ಶಹಾಬಾದ: ಡೊನಾಲ್ಡ್ ಟ್ರಂಪ್‍ನ ಫ್ಯಾಸೀವಾದಿ ದುರಾಡಳಿತವನ್ನು ಖಂಡಿಸಿ ಹೋರಾಟ ಮಾಡುತ್ತಿರುವ ಅಮೇರಿಕಾದ ಜನತೆಯೊಂದಿಗೆ ನಾವಿದ್ದೆವೆ ಎಂದು ಬೆಂಬಲಿಸಿ ಎಸ್.ಯು.ಸಿ.ಐ(ಕಮ್ಯುನಿಸ್ಟ್) ಪಕ್ಷದಿಂದ ಸೋಮವಾರ ಪ್ರತಿಭಟನೆ ನಡೆಸಲಾಯಿತು.

ಈ ಸಂದರ್ಭದಲ್ಲಿ ಮಾತನಾಡಿದ ಪ್ರತಿಭಟನಾಕಾರರು ಅಮೇರಿಕಾ ಸಾಮ್ರಾಜ್ಯಶಾಹಿಗಳ ಆಡಳಿತವು ಹೇರುತ್ತಿರುವ ಜನವಿರೋಧಿ ನೀತಿಗಳ ವಿರುದ್ಧ ಐತಿಹಾಸಿಕ ಹೋರಾಟವನ್ನು ಮಾಡುತ್ತಿರುವ ಅಮೇರಿಕಾದ ಹೋರಾಟನಿರತ ಜನತೆಯೊಂದಿಗೆ ನಾವಿದ್ದೆವೆ.

ಜನತೆಯಲ್ಲಿ ಹುದುಗಿದ್ದ ಸಂಕಟ, ಆಕ್ರೋಶವು ಜ್ವಾಲಾಮುಖಿಯಂತೆ ಸ್ಪೋಟಗೊಂಡಿದೆ. ಇದು ಕೇವಲ ವರ್ಣಭೇದ ನೀತಿಯ ವಿರುದ್ದವಲ್ಲದೇ ಅಮೇರಿಕಾ ಸಾಮ್ರಾಜ್ಯಶಾಹಿ ಆಳ್ವಿಕರ ಜನವಿರೋಧಿ ನೀತಿಗಳ ವಿರುದ್ದ ಹೋರಾಟ ನಡೆಯುತ್ತಿದೆ. ಅಮೇರಿಕಾದಲ್ಲಿ ನಿರುದ್ಯೋಗ, ಕೆಲಸದಿಂದ ವಜಾ, ಹಸಿವು ಮತ್ತು ಕೋವಿಡ್-19 ರೋಗವನ್ನು ತಡಗಟ್ಟವಲ್ಲಿ ವಿಫಲಗೊಂಡಿದ್ದರಿಂದ ಲಕ್ಷಾಂತರ ಜನತೆಯ ಸಾವಿಗೆ ಕಾರಣವಾದ ಟ್ರಂಪ್ ರವರ ದುರಾಡಳಿತ ವಿರೋಧಿಸಿ ಜನರು ರಸ್ತೆಗೆ ಇಳಿದಿದ್ದಾರೆ.

ಈ ಹೋರಾಟದಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಧರ್ಮ, ವರ್ಣಭೇದ ಮರೆತು ಅಮೇರಿಕಾದ ಎಲ್ಲಾ ವಿಭಾಗದ ಜನರು ಒಗ್ಗಟ್ಟಾಗಿ ಹೋರಾಟಕ್ಕೀಳಿದಿದ್ದಾರೆ. ಇದು ನಮಗೆ ಅಮೇರಿಕಾ ಸಾಮ್ರಾಜ್ಯಶಾಹಿಗಳ ಬುಡವನ್ನೇ ಅಲುಗಾಡಿಸಿದ “ಅಕ್ಯುಪೈ ವಾಲ್‍ಸ್ಟ್ರೀಟ್” ಹೋರಾಟವನ್ನು ನೆನಪಿಸುತ್ತದೆ.

ಈ ಹೋರಾಟವು ಸಾಮ್ರಜ್ಯಶಾಹಿ-ಬಂಡವಾಳಶಾಹಿಗಳ ಶೋಷಣೆಯ ವಿರುದ್ದ ಶೋಷಿತ, ದಮನಿತ ಜನರಿಗೆ ಸ್ಪೂರ್ತಿ ನೀಡುತ್ತದೆ. ಹಾಗೂ ಎಸ್.ಯು.ಸಿ.ಐ(ಕಮ್ಯುನಿಸ್ಟ್) ಪಕ್ಷವು ಅಮೇರಿಕಾದ ಜನರು ಈ ಹೋರಾಟದಲ್ಲಿ ಯಶಸ್ವಿಯಾಗಲೆಂದು ಬೆಂಬಲ ಸೂಚಿಸುತ್ತದೆ ಎಂದು ಹೇಳಿದರು. ಎಸ್.ಯು.ಸಿ.ಐ(ಕಮ್ಯುನಿಸ್ಟ್) ಪಕ್ಷದ ಕಾರ್ಯದರ್ಶಿ ಗಣಪತರಾವ ಮಾನೆ, ಜಗನ್ನಾಥ.ಎಸ್.ಹೆಚ್,ಶಿವಕುಮಾರ ಕುಸಾಳೆ,ಇತರರು ಇದ್ದರು.