ವಲ್ಯಾಪುರೆಗೆ ಎಂಎಲ್‍ಸಿ ಮಾಡಿ, ಬಿಜೆಪಿ ಮುಖಂಡರ ಆಗ್ರಹ

ಶಹಾಬಾದ: ಬಿಜೆಪಿ ಪಕ್ಷಕ್ಕಾಗಿ ಹಗಲಿರುಳು ಶ್ರಮಿಸಿದ ಮತ್ತು ಪಕ್ಷಕ್ಕಾಗಿ ನಿಷ್ಠೆಯಿಂದ ಕೆಲಸ ಮಾಡಿದ ಮಾಜಿ ಸಚಿವ ಸುನೀಲ ವಲ್ಯಾಪುರೆ ಅವರನ್ನು ವಿಧಾನ ಪರಿಷತ್ ಸದಸ್ಯರನ್ನಾಗಿ ಮಾಡಬೇಕೆಂದು ನಗರದ ಬಿಜೆಪಿ ಮುಖಂಡರು ಯಡಿಯೂರಪ್ಪನವರಿಗೆ ಮನವಿ ಮಾಡಿದ್ದಾರೆ.

ಅವರು ಸುದ್ದಿಗಾರರೊಂದಿಗೆ ಮಾತನಾಡಿ, ಈ ಹಿಂದೆ ಶಹಾಬಾದ ಮತಕ್ಷೇತ್ರದಿಂದ ಗೆಲುವು ಸಾಧಿಸಿ ಶಾಸಕರಾಗಿ ಹತ್ತು ಹಲವಾರು ಅಭಿವೃದ್ಧಿ ಕೆಲಸಗಳನ್ನು ಮಾಡಿದ್ದಾರೆ.ಅಲ್ಲದೇ ಚಿಂಚೋಳಿ ಮತಕ್ಷೇತ್ರದದಿಂದ ಶಾಸಕರಾಗಿ ಆಯ್ಕೆಯಾಗಿ ನಂತರ ಸಚಿವರಾಗಿ ಉತ್ತಮ ಅಭಿವೃದ್ಧಿ ಮಾಡಿದ್ದಾರೆ.

ಡಾ.ಉಮೇಶ ಜಾಧವ ಸಂಸದರಾಗಲು ಹಾಗೂ ಅವರಿಗೆ ಸಿಗುವ ಟಿಕೆಟ್‍ನ್ನು ಹಿರಿಯರ ಒತ್ತಾಯದ ಮೇರೆಗೆ ತ್ಯಾಗ ಮಾಡಿ ಡಾ.ಅವಿನಾಶ ಜಾಧವ ಶಾಸಕರಾಗಲು ವಲ್ಯಾಪುರೆ ಪಕ್ಷಕ್ಕಾಗಿ ದುಡಿದಿದ್ದಾರೆ.ಅಲ್ಲದೇ ಇವರಿಬ್ಬರ ಗೆಲುವಿಗೆ ವಲ್ಯಾಪುರೆ ಪ್ರಮುಖ ಪಾತ್ರವಹಿಸಿದ್ದು ಎಲ್ಲರಿಗೂ ಗೊತ್ತಿದ್ದ ವಿಷಯ.

ಕಳೆದ ಚುನಾವಣೆಯ ಪ್ರಚಾರಕ್ಕಾಗಿ ಬಂದ ಸಂದರ್ಭದಲ್ಲಿ ಸ್ವತಃ ಯಡಿಯೂರಪ್ಪನವರು ಮತ್ತು ಬಿಜೆಪಿ ಪಕ್ಷದ ಘಟಾನುಗಟಿ ಮುಖಂಡರು ವಲ್ಯಾಪುರೆ ಅವರಿಗೆ ಎಂಎಲ್‍ಸಿ ಸ್ಥಾನ ನೀಡಲಾಗುವುದು ಎಂದು ಹೇಳಿದ ಹಾಗೇ ನುಡಿದಂತೆ ನಡೆಯಬೇಕೆಂದು ನಮ್ಮ ಬಯಕೆ.ಕಲ್ಯಾಣ ಕರ್ನಾಟಕ ಭಾಗದಲ್ಲಿ ಪಕ್ಷ ನಿಷ್ಠ, ರಾಜಕೀಯ ಚತುರರಾದ ವಲ್ಯಾಪುರೆ ಅವರನ್ನುವಿಧಾನ ಪರಿಷತ್ ಸದಸ್ಯರನ್ನಾಗಿ ಮಾಡಲೆಬೇಕೆಂದು ಆಗ್ರಹಿಸಿದರು.

ಬಿಜೆಪಿ ಹಿರಿಯ ಮುಖಂಡರಾದ ಅರುಣ ಪಟ್ಟಣಕರ್, ಅನೀಲ ಭೋರಗಾಂವಕರ್, ಭೀಮರಾವ ಸಾಳುಂಕೆ, ಕನಕಪ್ಪ ದಂಡಗುಲಕರ್,ಬಿಜೆಪಿ ಮಾಜಿ ಅಧ್ಯಕ್ಷ ಸುಭಾಷ ಜಾಪೂರ, ಶಿವಾಜಿ ರೆಡ್ಡು ಇತರರು ಇದ್ದರು.