ನೇಮಕಾತಿಗೆ ಬ್ರೇಕ್: ಅಧಿಸೂಚನೆ ರದ್ದುಗೊಳಿಸುವಂತೆ ‌ಸಿಎಂ,‌ ಡಿಸಿಎಂಗೆ ಶಾಸಕ ಖರ್ಗೆ  ಪತ್ರ

ಕಲಬುರಗಿ: ಕೋವಿಡ್ 19 ಹಿನ್ನೆಲೆಯಲ್ಲಿ ಈ ಸಲದ ಆರ್ಥಿಕ ವರ್ಷದಲ್ಲಿ ಕಲ್ಯಾಣ ಕರ್ನಾಟಕ ವೃಂದದ ಹುದ್ದೆಗಳು ಹಾಗೂ ಬ್ಯಾಕ್ ಲಾಗ್ ಹುದ್ದೆಗಳ ಭರ್ತಿ ಮಾಡದಂತೆ ಸರಕಾರ ಅಧಿಸೂಚನೆ ಹೊರಡಿಸಿರುವುದರ ಹಿನ್ನೆಲೆಯಲ್ಲಿ‌  ಶಾಸಕ ಪ್ರಿಯಾಂಕ್ ಖರ್ಗೆ ಸಿಎಂ ಸಿಎಂ ಬಿ.ಎಸ್ .ಯಡಿಯೂರಪ್ಪ ಮತ್ತು ಉಪಮುಖ್ಯಮಂತ್ರಿ ಹಾಗೂ ಕಲಬುರಗಿ ‌ಜಿಲ್ಲಾ ಉಸ್ತುವಾರಿ‌ ಸಚಿವರಾದ ಗೋವಿಂದ ಕಾರಜೋಳ ಅವರಿಗೆ ಪತ್ರ ಬರೆದು ಕೂಡಲೇ ಸುತ್ತೋಲೆ ರದ್ದುಪಡಿಸಿ ಮರು ಆದೇಶಿಸುವಂತೆ ಆಗ್ರಹಿಸಿದ್ದಾರೆ.

ಈ ಭಾಗದ ರಾಜಕೀಯ ನಾಯಕರ, ಹಿರಿಯ ಧುರಿಣರ, ಸಂಘಟನೆಗಳ ಅವಿರತ ಹೋರಾಟದ ಫಲವಾಗಿ ಅಭಿವೃದ್ದಿ ವಂಚಿತ ಕಲ್ಯಾಣ ಕರ್ನಾಟಕ ( ಈ ಹಿಂದಿನ ಹೈಕ) ಭಾಗದ ಸಮಗ್ರ ಅಭಿವೃದ್ದಿಗಾಗಿ ಸಂವಿಧಾನದ ಆರ್ಟಿಕಲ್‌371 ಕ್ಕೆ ತಿದ್ದುಪಡಿ ತರಲಾಯಿತು. 2014 ರಲ್ಲಿ ಅಧಿಕಾರದಲ್ಲಿದ್ದ ಕಾಂಗ್ರೆಸ್ ಸರಕಾರ ಕಲಬುರಗಿಯಲ್ಲಿ ವಿಶೇಷ‌ ಸಚಿವ  ಸಂಪುಟ ಸಭೆ ನಡೆಸಿ ಕಲ್ಯಾಣ ಕರ್ನಾಟಕ ಭಾಗದ ಹುದ್ದೆಗಳ ಭರ್ತಿಗೆ ಇರುವ ಆರ್ಥಿಕ‌ ಇಲಾಖೆಯ ನಿಬಂಧನೆಗಳಿಗೆ ವಿನಾಯತಿ ನೀಡಿ ಸುಮಾರ 50 ಸಾವಿರ ಹುದ್ದೆಗಳ ಭರ್ತಿಗೆ ನಿರ್ಣಯ ಕೈಗೊಳ್ಳಲಾಗಿತ್ತು ಎಂದು ಶಾಸಕರು ಸಂವಿಧಾನ‌ ತಿದ್ದುಪಡಿಗೆ ಉಂಟಾದ ಅನಿವಾರ್ಯತೆ ಹಾಗೂ ನಂತರದ‌ ಕ್ರಮಗಳನ್ನು ನೆನೆಪಿಸಿದ್ದಾರೆ.

ಆದರೆ ಈಗ ಕೊವಿಡ್ 19 ಸಂಕಷ್ಟದ ಸಂದರ್ಭದಲ್ಲಿ ಆರ್ಥಿಕ ಸ್ಥಿತಿ ಸುಧಾರಿಸುವ ನೆಪವೊಡ್ಡಿ ಕಕ ಭಾಗದ ಹುದ್ದೆಗಳ ನೇರ ನೇಮಕಾತಿಗೆ ಮಾತ್ರ ತಡೆಯೊಡ್ಡಿರುವುದು ಆರ್ಟಿಕಲ್   371 J ಮೂಲ ಉದ್ದೇಶಕ್ಕೆ ಧಕ್ಕೆ ತಂದಂತಾಗಿದೆ ಎಂದು  ಪ್ರಿಯಾಂಕ್ ಖರ್ಗೆ ಅವರು ಸರಕಾರದ‌ ನಿರ್ಧಾರಕ್ಕೆ ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ಹೈಕ ವನ್ನು ಕಕ ಎಂದು ನೇಮಕ ಮಾಡಿ ನಂತರ ನಿರ್ಲಕ್ಷಿಸಿದ‌ ಕ್ರಮವನ್ನು ಟೀಕಿಸಿದ ಖರ್ಗೆ ಅವರು , ಕೊವಿಡ್  ನಿಂದ‌ ತೀವ್ರ ಸಂಕಷ್ಟಕ್ಕೊಳಗಾಗಿರುವ ಈ ಭಾಗದ ನಿರುದ್ಯೋಗಿ ವಿದ್ಯಾವಂತ ಯುವಕ ಯುವತಿಯರಿಗೆ ಉದ್ಯೋಗ ಕಲ್ಪಿಸದೆ, ಹುದ್ದೆಗಳ ನೇಮಕಾತಿಗೆ ಬ್ರೇಕ್ ಹಾಕಲು ಅಧಿಸೂಚನೆ ಹೊರಡಿಸುವ ಮೂಲಕ ಸರಕಾರ  ಅನ್ಯಾಯವೆಸಗಿದಂತಾಗಿದೆ.‌‌ಕೇವಲ‌

ಹೆಸರು ಬದಲಾವಣೆ ಮಾಡಿದರೆ ಅಭಿವೃದ್ದಿಯಾಗದು ಅಸಮತೋಲಗೆ ಒಳಗಾಗಿರುವ ಈ ಭಾಗದ ವಿದ್ಯಾವಂತರಿಗೆ ಉದ್ಯೋಗ ಕಲ್ಪಿಸಿ ಸಮಗ್ರ ಅಭಿವೃದ್ದಿ ಮಾಡಿದರೆ ಮಾತ್ರ ಅಭಿವೃದ್ದಿಯಾಗುತ್ತದೆ ಎಂದು ಕುಟುಕಿ, ಯುವಕರ ಭವಿಷ್ಯದ ದೃಷ್ಠಿಯಿಂದ ಸರಕಾರ‌ ಈ ಕೂಡಲೇ ತನ್ನ ಅಧಿಸೂಚನೆಯನ್ನು ವಾಪಸ್ ಪಡೆದುಕೊಂಡು‌ ಮರು ಆದೇಶ ಮಾಡಲಿ ಎಂದು ಬರೆದ ಪತ್ರದಲ್ಲಿ ಆಗ್ರಹಿಸಿದ್ದಾರೆ.