ಮಹಾತ್ಮರ ರಾಷ್ಟ್ರ ನಾಯಕರ ಅವಹೇಳನ ಯಾರೂ ಸಹಿಸಲಾಗದು: ಮಲ್ಲು ದಂಡಿನ್

ಸುರಪುರ: ಇಂದು ಅನೇಕರು ಬೇರೆ ಸಮುದಾಯದ ನಾಯಕರ ಹಾಗು ಮಹಾತ್ಮರ ಭಾವಚಿತ್ರಗಳನ್ನು ಅವಹೇಳನಗೊಳಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವುದು ಹಾಗು ಅವಾಚ್ಯವಾಗಿ ನಿಂದಿಸಿ ಹರಿಬಿಡುವುದು ಯಾರೂ ಸಹಿಸಲು ಸಾಧ್ಯವಿಲ್ಲ ಎಂದು ಕರ್ನಾಟಕ ಪ್ರದೇಶ ಕುರುಬರ ಸಂಘದ ಯುವ ಘಟಕದ ಜಿಲ್ಲಾಧ್ಯಕ್ಷ ಮಲ್ಲು ದಂಡಿನ್ ಬೇಸರ ವ್ಯಕ್ತಪಡಿಸಿದ್ದಾರೆ.

ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು,ಕಳೆದ ಕೆಲ ದಿನಗಳ ಹಿಂದೆ ಕುರುಬ ಸಮುದಾಯದ ಯುವಕರು ವಾಲ್ಮೀಕಿ ಸಮುದಾಯದ ಮಹಾತ್ಮರ ಬಗ್ಗೆ ಹಾಗು ಅದಕ್ಕೆ ಪ್ರತಿಯಾಗಿ ವಾಲ್ಮೀಕಿ ಸಮುದಾಯದ ಯುವಕರು ಕುರುಬ ಸಮುದಾಯದ ಮಹಾತ್ಮರ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡಿದ ವೀಡಿಯೊಗಳನ್ನು ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವ ಮೂಲಕ ಸಮಾಜದಲ್ಲಿ ಅಶಾಂತಿ ಉಂಟು ಮಾಡಲಾಗುತ್ತಿದೆ.

ಯಾವುದೇ ಸಮುದಾಯದ ಮಹಾತ್ಮರಿರಲಿ ಅಥವಾ ನಾಯಕರಿರಲಿ ಅವರು ಅಖಂಡ ಮಾನವ ಸಮಾಜಕ್ಕಾಗಿ ತಮ್ಮನ್ನು ತಾವು ಅರ್ಪಿಸಿಕೊಂಡಿರುತ್ತಾರೆ,ಅಂತಹ ಮಹಾತ್ಮರ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡುವುದು ಖಂಡನಿಯವಾಗಿದೆ.ಇದನ್ನು ಎಲ್ಲರು ಖಂಡಿಸಬೇಕಿದೆ.ಆದ್ದರಿಂದ ಯಾವುದೇ ಸಮುದಾಯದ ಜನರು ಮತ್ತೊಂದು ಸಮುದಾಯದೊಂದಿಗೆ ಸಾನರಸ್ಯ ಮತ್ತು ಸೌಹಾರ್ಧತೆಯೊಂದಿಗೆ ಬೆರೆತು ನಡೆಯಬೇಕಿದೆ.

ಆದ್ದರಿಂದ ಇತ್ತೀಚೆಗೆ ಕೆಲವರು ವೀರಮದಕರಿ ಕುರಿತು ಮತ್ತು ಸಂಗೊಳ್ಳಿ ರಾಯಣ್ಣನ ಕುರಿತು ಹೀಗೆ ಬೇರೆ ಬೇರೆ ನಾಯಕರ ಬಗ್ಗೆ ಮಾತನಾಡಿದ ವೀಡಿಯೊಗಳನ್ನು ಹರಿಬಿಟ್ಟು ಎರಡು ಸಮಾಜಗಳ ಮದ್ಯೆ ವಿವಾದ ಹುಟ್ಟು ಹಾಕುವ ಪ್ರಯತ್ನ ಮಾಡಿರುವುದು ಸರಿಯಲ್ಲ.ಆದ್ದರಿಂದ ಎರಡೂ ಸಮುದಾಯದ ಮುಖಂಡರು ಜಿಲ್ಲಾ ಮಟ್ಟದಲ್ಲಿ ಶಾಂತಿ ಸಭೆ ನಡೆಸಿ ಯುವ ಜನಾಂಗಕ್ಕೆ ಸಾಮರಸ್ಯದ ಸಂದೇಶವನ್ನು ನೀಡುವ ನಿಟ್ಟಿನಲ್ಲಿ ಮುಂದಾಗಲಿದ್ದೇವೆ.ಆದ್ದರಿಂದ ಎಲ್ಲಾ ನಮ್ಮ ಕುರುಬ ಮತ್ತು ವಾಲ್ಮೀಕಿ ಸಮುದಾಯದ ಯುವಕ ಮಿತ್ರರು ಸಹೋದರತೆಯನ್ನು ಬೆಳೆಸಿಕೊಳ್ಳುವಂತೆ ಅವರು ತಿಳಿಸಿದ್ದಾರೆ.