ಸೆ. 28 ರಾಜ್ಯ ಬಂದ್: ರೈತ-ಕಾರ್ಮಿಕ, ಪ್ರಗತಿಪರ ಸಂಘಟನೆಗಳ ಪೂರ್ವ ಬಾವಿ ಸಭೆ

ರಾಯಚೂರು: ಎಪಿಎಂಸಿ, ಭೂ ಸುಧಾರಣೆ, ವಿದ್ಯುತ್ ತಿದ್ದುಪಡಿ ಕಾಯ್ದೆಗಳನ್ನು ಜಾರಿಗೊಳಿಸಿರುವುದನ್ನು ಖಂಡಿಸಿ ಇದೇ ಸೆ.28 ರಂದು ಕರೆ ನೀಡಿರುವ ರಾಜ್ಯ ಬಂದ್ ಹಿನ್ನೆಲೆಯಲ್ಲಿ ಕರ್ನಾಟಕ ಪ್ರಾಂತ ರೈತ ಸಂಘಟನೆ, ರಾಜ್ಯ ರೈತ ಸಂಘಟನೆ, ಎಸ್ಎಫ್ಐ, ಸಿಐಟಿಯು ಸೇರಿದಂತೆ ಅನೇಕ ಕಾರ್ಮಿಕ ಸಂಘಟನೆಗಳು, ಎಲ್ಲ ಪ್ರಗತಿಪರರು, ಬೀದಿ ಬೀದಿಯ ಪಾರಗಳು ಸರಕಾರ ನೌಕರರು, ದಲಿತಪರ, ಕನ್ನಡ ಪರ, ಆಟೋ ಚಾಲಕ ಸಂಘ, ಕರ್ನಾಟಕ ರಾಜ್ಯ ದೇವದಾಸಿ ಮಹಿಳಾ ವಿಮೋಚನಾ ಸಂಘಟನೆ, ಸೇರಿದಂತೆ ಅನೇಕ ಸಂಘಟನೆಗಳ ಮುಖಂಡರು ನಗರದ ಗುರು ಭವನದಲ್ಲಿ ಪೂರ್ವಬಾವಿ ಸಭೆ ನಡೆಸಲಾಯಿತು.

ಈ ವೇಳೆ ಎಸ್ಎಫ್ಐ ಜಿಲ್ಲಾಧ್ಯಕ್ಷ ರಮೇಶ ವೀರಾಪೂರು ಮಾತನಾಡಿ, ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಜನ ವಿರೋಧಿ ನೀತಿಗಳನ್ನು ಜಾರಿಗೊಳಿಸಲು ಮುಂದಾಗಿರುವುದು ಖಂಡನೀಯ. ರಾಜ್ಯದ ಜನರ ಅಭಿಪ್ರಾಯ ಪಡೆಯದೇ ತರಾತುರಿಯಲ್ಲಿ ಹಲವು ಮಸೂದೆಗಳನ್ನು ಜಾರಿಗೊಳಿಸುವ ಮೂಲಕ ಜನರನ್ನು ಬೀದಿ ಪಾಲು ಮಾಡುವ ಹುನ್ನಾರ ನಡೆಸಿದ್ದಾರೆ. 28 ರ ಈ ಬಂದ್ ಯಶಸ್ವಿಗೆ ಎಲ್ಲರೂ ಒಗ್ಗೂಡಬೇಕು ಎಂದರು.

ಎಪಿಎಂಸಿ ಕಾಯ್ದೆಯಿಂದ ವರ್ತಕರು, ಹಮಾಲರು ಹಾಗೂ ಜನ ಸಾಮಾನ್ಯರು ತೀವ್ರ ತೊಂದರೆಗೆ ಗುರಿಯಾಗಿದ್ದಾರೆ. ಕಾರ್ಪೋರೆಟ್ ಕಂಪನಿಗಳಿಗೆ ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಎಪಿಎಂಸಿ ಕಾಯ್ದೆ ಜಾರಿಗೊಳಿಸಿದ್ದಾರೆ. ಭೂ ಸುಧಾರಣೆ ಕಾಯ್ದೆ ತಿದ್ದುಪಡಿಯಿಂದ ಬಂಡವಾಳ ಶಾಹಿಗಳು, ವಿದೇಶಿ ಕಂಪನಿಗಳು ಕೃಷಿ ಭೂಮಿಯನ್ನು ಖರೀದಿಸುವ ಹುನ್ನಾರ ನಡೆಸಿದ್ದಾರೆ ಎಂದರು.

ಈ ಕಾರಣದಿಂದ ಎಲ್ಲಾ ರೈತ , ಕಾರ್ಮಿಕ, ದಲಿತ, ವಿದ್ಯಾರ್ಥಿ, ಯುವಜನ, ವ್ಯಾಪಾರಸ್ಥರು ಸೇರಿದಂತೆ ಇನ್ನೂ ಅನೇಕರು ಸೇರಿ ಒಗ್ಗಟ್ಟಿನಿಂದ ಚಳವಳಿ ರೂಪಿಸಬೇಕೆಂದು ಕರೆ ನೀಡಿದರು.

ವಕೀಲರಾದ ಕುಪ್ಪಣ್ಣ ಮಾಣಿಕ್ ಮಾತನಾಡಿ, ವಿದ್ಯುತ್ ಕಾಯ್ದೆಯಿಂದ ಕೃಷಿ ಪಂಪ್ ಸೆಟ್‌ಗಳಿಗೆ ಉಚಿತ ವಿದ್ಯುತ್ ಪೂರೈಸಲು ಸಾಧ್ಯವಿಲ್ಲ. ಬಡವರಿಗೆ ನಿರ್ಗತಿಕರಿಗೆ, ಭಾಗ್ಯ ಜ್ಯೋತಿ ಸೇರಿದಂತೆ ಇನ್ನಿತರ ಎಲ್ಲವು ರದ್ದಾಗಿ ರೈತರು ತೀವ್ರ ತೊಂದರೆ ಅನುಭವಿಸಬೇಕಾಗುತ್ತದೆ. ಸಾರಿಗೆ ನೌಕರರ ಸಂಘ, ಸಂಘ ಸಂಸ್ಥೆಗಳ ಮುಖಂಡರು ಬೆಂಬಲ ವ್ಯಕ್ತಪಡಸಿ ಯಶಸ್ವಿಗೊಳಿಸಬೇಕು ಎಂದರು.

ರಾಜ್ಯ ಬಂದ್ ಭಾಗವಾಗಿ ಲಿಂಗಸ್ಗೂರು ತಾಲೂಕು ಸಹ ಬಂದ್ ಗೆ ಕರೆ ನೀಡಲಾಗಿದೆ. ಈ ಸಂಬಂಧ ತಾಲೂಕಿನ ಜನರು ಬೆಂಬಲಿಸಿ ಎಂದರು.

ಈ ಸಂದರ್ಭದಲ್ಲಿ ಕರ್ನಾಟಕ ಪ್ರಾಂತ ರೈತ ಸಂಘಟನೆ ಮುಖಂಡರಾದ ಆಂಜನೇಯ ನಾಗಲಾಪೂರು, ಕೆಆರ್ ಎಸ್ ಮುಖಂಡರಾದ ಶಿವಪುತ್ರಪ್ಪ, ಸದಾನಂದ, ಬಸನಗೌಡ, ಕೆಪಿಆರ್ ಎಸ್ ನ ಸದ್ದಾ ಹುಸೇನ್, ಎಸ್ಎಫ್ಐ ತಾಲೂಕಾಧ್ಯಕ್ಷ ತಿಪ್ಪಣ್ಣ, ನಗರ ಘಟಕದ ಮುಖಂಡ ಸಂದೀಪ್, ದಲಿತ ಸಂಘಟನೆ ಮುಖಂಡರಾದ ಲಿಂಗಪ್ಪ ಪರಂಗಿ, ಹುಲುಗಪ್ಪ, ಕೆಸರಟ್ಟಿ, ರಮೇಶ ಗೋಸ್ಲಿ ಅಮರೇಶ ಕರಡಕಲ್, ಶಿವಣ್ಣ ಪರಂಗಿ, ಬಸವರಾಜ್, ಕರವೇ ಮುಖಂಡ ಜಿಲಾನಿ ಪಾಷಾ, ಅಂಗನವಾಡಿ ಸಂಘಟನೆಯ ತಾಲೂಕು ಕಾರ್ಯದರ್ಶಿ ಸರಸ್ವತಿ ಈಚನಾಳ, ದುರ್ಗಪ್ಪ, ಹುಲಗಪ್ಪ ಕುಣಿಕೆಲ್ಲೂರ್, ಬಸವರಾಜ್, ಜಾಫರ್ ಸಾಬ್, ತಮ್ಮಣ್ಣ ಯತಜಂತಿ, ದೇವದಾಸಿ ಸಂಘಟನೆ ಮುಖಂಡರಾದ ನಾಗರತ್ನ ಮಸ್ಕಿ, ಅನಿಲ್ ಕುಮಾರ್ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.