ಅತಿಯಾದ ಮಳೆಯಿಂದ ಐತಿಹಾಸಿಕ ದೇವಸ್ಥಾನಗಳು ಜಲಾವೃತ

ಶಹಾಬಾದ: ನಗರದಲ್ಲಿ ಶುಕ್ರವಾರ ಸುರಿದ ಭಾರಿ ಮಳೆಯಿಂದ ನಗರದ ಅಜನಿ ಹಳ್ಳ ದುಂಬಿಕ್ಕಿ ಹರಿದ ಪರಿಣಾಮ ನಗರದ ಮಡ್ಡಿ ಪ್ರದೇಶ ಅಕ್ಷರಶಃ ನಡುಗಡ್ಡೆಯಂತಾಗಿ, ಐತಿಹಾಸಿಕ ದೇವಸ್ಥಾನಗಳು ನೀರಿನಿಂದ ಜಲಾವೃತಗೊಂಡಿವೆ.

ತಾಲೂಕಿನ ಎಲ್ಲಾ ಪ್ರದೇಶಗಳಲ್ಲಿ ರಾತ್ರಿ ಮಳೆಯಾದ ಪರಿಣಾಮ ನಗರದ ಅಜನಿ ಹಳ್ಳದಲ್ಲಿ ಪ್ರವಾಹ ಉಂಟಾಗಿ ಸಣ್ಣ ಸೇತುವೆ ಹಾಗೂ ಇತ್ತಿಚ್ಚಿಗೆ ನಿರ್ಮಾಣವಾದ ಹೊಸ ಸೇತುವೆಯೂ ಮುಳುಗಿ ಹೋಗಿದೆ.

ಅಲ್ಲದೇ ನಗರದ ಐತಿಹಾಸಿಕ ಬಸವಣ್ಣ ದೇವರ ಗುಡಿ, ಅಡವಿತಾತನ ಗುಡಿ, ತೆಗನೂರ ಗ್ರಾಮದ ಶಿವಯೋಗೇಶ್ವರ ಮಂದಿರದಲ್ಲಿ ಅಪಾರ ಪ್ರಮಾಣದ ನೀರು ನುಗ್ಗಿದೆ. ಅಲ್ಲದೇ ನಗರದ ಮಧ್ಯಭಾಗದ ಮುಸ್ಲಿಂ ರುದ್ರಭೂಮಿ, ಹಿಂದೂ ರುದ್ರಭೂಮಿ ಹಾಗೂ ಕೋಲಿ ಸಮಾಜದ ರುದ್ರಭೂಮಿಯಲ್ಲೂ ಸಂಪೂರ್ಣ ನೀರು ಆವರಿಸಿದೆ. ಮಡ್ಡಿ ಪ್ರದೇಶದ ಮುಖ್ಯ ರಸ್ಥೆಯ ಅರ್ಧ ಕಿಮೀವರೆಗೆ ನೀರು ಆವರಿಸಿದ್ದರಿಂದ ಜನರು ನೀರಿನಲ್ಲಿ ಹೋಗುವ ಸಾಹಸ ದೃಶ್ಯ ಕಂಡು ಬಂದಿತು. ಮೊಬೈಲ್ ಕ್ಯಾಮರಾಗಳನ್ನು ಹಿಡಿದು ದೃಶ್ಯವನ್ನು ಸೆರೆ ಹಿಡಿಯಲು ಹಾಗೂ ನೋಡಲು ನಗರದ ಸಾವಿರಾರು ಜನರು ಕಿಕ್ಕಿರಿದು ನಿಂತಿದ್ದರು.