ಲಾತೂರ- ಕಲಬುರಗಿ ರೈಲ್ವೆ ಮಾರ್ಗ: ಆಳಂದ ಶಾಸಕರೊಂದಿಗೆ ರೈಲ್ವೆ ಅಧಿಕಾರಿಗಳ ತಂಡ ಭೇಟಿ

ಆಳಂದ: ಪ್ರಸ್ತಾಪಿತ ಲಾತೂರ- ಕಲಬುರಗಿ ರೈಲ್ವೆ ಮಾರ್ಗದ ಸರ್ವೇ ಕೈಗೊಳ್ಳಲು ಮಧ್ಯ ರೈಲ್ವೆಯ ಅಧಿಕಾರಿಗಳ ತಂಡ ಬುಧುವಾರ  ಪಟ್ಟಣಕ್ಕೆ ಭೇಟಿ ನೀಡಿ ಸ್ಥಳೀಯ ಶಾಸಕ ಸುಭಾಷ್ ಆರ್ ಗುತ್ತೇದಾರ ಮತ್ತು ತಹಸೀಲದಾರ ಜೊತೆ ಚರ್ಚೆ ನಡೆಸಿತು.

ಕೇಂದ್ರ ಸರ್ಕಾರದ ರೈಲ್ವೆ ಇಲಾಖೆಯ ನಿರ್ದೇಶನದ ಮೇರೆಗೆ ಆಗಮಿಸಿದ್ದ ತಂಡವು ತನ್ನ ಪ್ರಸ್ತಾಪಿತ ಯೋಜನೆಯ ನೀಲನಕ್ಷೆಯನ್ನು ಸಿದ್ಧಪಡಿಸಿಕೊಂಡಿದ್ದು ಸಧ್ಯ ಸರ್ವೇ ಕಾರ್ಯ ಕೈಗೆತ್ತಿಕೊಂಡಿದ್ದು ಮುಂದಿನ ಐದಾರು ತಿಂಗಳುಗಳಲ್ಲಿ ಸರ್ವೇ ಪೂರ್ಣಗೊಳಿಸಲಿದೆ. ಸರ್ವೇಯಲ್ಲಿ ಪ್ರಮುಖವಾಗಿ ಸಾರಿಗೆ, ಕೃಷಿ ಉತ್ಪನ್ನ, ಸರಕು ಮತ್ತು ಸಾಗಾಟ, ಜನಸಂಖ್ಯೆ, ಶಾಲಾ ಕಾಲೇಜು, ಇಂಜನಿಯರಿಂಗ್ ಕಾಲೇಜು ಸೇರಿದಂತೆ ಇನ್ನಿತರ ಅಂಶಗಳನ್ನು ಪರಿಗಣಿಸಲಿದೆ ಎಂದು ಹೇಳಿತು.

ಶಾಸಕ ಸುಭಾಷ್ ಆರ್ ಗುತ್ತೇದಾರ ಮಾತನಾಡಿ, ಲಾತೂರ- ಕಲಬುರಗಿ ಮಧ್ಯದ ರೈಲ್ವೆ ಮಾರ್ಗ ಈ ಭಾಗದ ಜನರ ಬಹು ವರ್ಷಗಳ ಕನಸಾಗಿದೆ ಈ ನಿಟ್ಟಿನಲ್ಲಿ ಕ್ರಮಕೈಗೊಂಡ ಪ್ರಧಾನಿ ನರೇಂದ್ರ ಮೋದಿ, ರೈಲ್ವೆ ಸಚಿವ ಪಿಯೂಶ್ ಗೋಯಲ್, ಸಂಸದ ಭಗವಂತ ಖೂಬಾ, ಉಸ್ಮಾನಾಬಾದ್ ಸಂಸದ ರವಿ ಗಾಯಕ್ವಾಡ ಸೇರಿದಂತೆ ಇತರರಿಗೆ ಅಭಿನಂದಿಸುವುದಾಗಿ ತಿಳಿಸಿದರು.

ರೈಲ್ವೆ ಮಾರ್ಗವು ಒಟ್ಟು ೧೮೭ ಕೀ.ಮಿ ಇರಲಿದ್ದು ಆಳಂದ ತಾಲೂಕಿನ ಬಂಗರಗಾ, ಹೊನ್ನಳ್ಳಿ, ಆಳಂದ ಪಟ್ಟಣದಿಂದ ಕಡಗಂಚಿ ಕೇಂದ್ರೀಯ ವಿಶ್ವವಿದ್ಯಾಲಯದವರೆಗೆ ಬಂದು ಮುಂದೆ ಸ್ಟೇಶನ್ ಬಬಲಾದ ಮಾರ್ಗ ಕೂಡಿಕೊಂಡು ಕಲಬುರಗಿ ತಲುಪಲಿದೆ. ಈಗ ನಡೆಯುತ್ತಿರುವ ಸರ್ವೇಯಲ್ಲಿ ಸಣ್ಣ ಪುಟ್ಟ ಮಾರ್ಪಾಡುಗಳನ್ನು ಮಾಡಲು ಹೇಳಿದ್ದು ಜನಹಿತದ ದೃಷ್ಟಿಯಿಂದ ಬದಲಾವಣೆ ಮಾಡಿದರೇ ತಾಲೂಕಿನ ಹೆಚ್ಚಿನ ಜನತೆಗೆ ಈ ಮಾರ್ಗದಿಂದ ಅನೂಕೂಲವಾಗಲಿದೆ ಎಂದು ತಿಳಿಸಿದರು.

ಅಧಿಕಾರಗಳ ತಂಡದಲ್ಲಿ ರೈಲ್ವೇ ಇಲಾಖೆಯ ಸರ್ವೇ ವಿಭಾಗದ ಕಾರ್ಯಾಚರಣೆಯ ಉಪ ಮುಖ್ಯಸ್ಥ ವ್ಯವಸ್ಥಾಪಕ ಸುರೇಶಚಂದ್ರ ಜೈನ, ಸಾರಿಗೆ ವಿಭಾಗದ ಮುಖ್ಯಸ್ಥರಾದ ಆರ್ ಪಿ ಗುಜ್ರಾಲ್, ಮುಖೇಶ ಲಾಲ್ ಇದ್ದರು.

ಜಿ.ಪಂ ಸದಸ್ಯ ಹರ್ಷಾನಂದ ಎಸ್ ಗುತ್ತೇದಾರ, ತಹಸೀಲದಾರ ಯಲ್ಲಪ್ಪ ಸುಬೇದಾರ, ಪುರಸಭೆ ಉಪಾಧ್ಯಕ್ಷ ಚಂದ್ರಕಾಂತ ಹತ್ತರಕಿ, ಮುಖಂಡರಾದ ಅಶೋಕ ಗುತ್ತೇದಾರ, ಶ್ರೀಮಂತ ನಾಮಣೆ, ಸಿ ಕೆ ಪಾಟೀಲ, ನಿಜಲಿಂಗಪ್ಪ ಕೊರಳ್ಳಿ, ಶ್ರೀಶೈಲ ಖಜೂರಿ, ಮಲ್ಲಿಕಾರ್ಜುನ ಕಂದಗೂಳೆ, ಮೃತ್ಯುಂಜಯ ಆಲೂರ, ಶ್ರೀಶೈಲ ಪಾಟೀಲ ಸೇರಿದಂತೆ ಇತರರು ಇದ್ದರು.

ಲಾತೂರ- ಕಲಬುರಗಿ ಮಾರ್ಗ ಆರಂಭವಾಗುವುದರಿಂದ ದೂರದ ಹುಬ್ಬಳ್ಳಿ ಧಾರವಾಡ, ಕಾರವಾರ ಮತ್ತು ಬೆಳಗಾವಿ ನಮಗೆ ಸಮೀಪವಾಗಲಿವೆ. ಈ ಭಾಗದಲ್ಲಿ ಸಿಮೆಂಟ್ ಉದ್ಯಮ ವ್ಯಾಪಕವಾಗಿರುವುದರಿಂದ ಮಹಾರಾಷ್ಟ್ರಕ್ಕೆ ಗೂಡ್ಸ್ ರೈಲಿನ ಮೂಲಕ ವ್ಯಾಪಾರ ವಹಿವಾಟು ಆರಂಭ ಮಾಡಬಹುದು- ಸುಭಾಷ್ ಆರ್ ಗುತ್ತೇದಾರ, ಶಾಸಕರು, ಆಳಂದ.