ಸಾರ್ವತ್ರಿಕ ಮುಷ್ಕರ: ಎಐಯುಟಿಯುಸಿ ಪ್ರತಿಭಟನೆ

ವಾಡಿ: ದೇಶದಲ್ಲಿ ಹಿಂದೆಂದೂ ಕಾಣದಂತಹ ಅತ್ಯಂತ ಕೆಟ್ಟ ಕರಾಳ ದಿನಗಳನ್ನು ಕಾಣುತ್ತಿದ್ದೇವೆ. ಕೇಂದ್ರ ಬಿಜೆಪಿ ಸರಕಾರ ರೈತ-ಕಾರ್ಮಿಕರ ಮರಣ ಶಾಸನ ಬರೆದು ದುಡಿಯುವ ಜನಗಳ ಸಮಾದಿ ಕಟ್ಟುತ್ತಿದೆ ಎಂದು ರೈತ ಕೃಷಿ ಕಾರ್ಮಿಕ ಸಂಘಟನೆಯ ಜಿಲ್ಲಾ ಸಮಿತಿ ಸದಸ್ಯ ಗುಂಡಣ್ಣ ಎಂ.ಕೆ ಆರೋಪಿಸಿದರು.

ವಿವಿಧ ರೈತ-ಕಾರ್ಮಿಕ ಸಂಘಟನೆಗಳು ಕರೆ ನೀಡಿದ ಅಖಿಲ ಭಾರತ ಸಾರ್ವತ್ರಿಕ ಮುಷ್ಕರ ಬೆಂಬಲಿಸಿ ಆಲ್ ಇಂಡಿಯಾ ಯುನೈಟೆಡ್ ಟ್ರೇಡ್ ಯೂನಿಯನ್ ಸೆಂಟರ್ (ಎಐಯುಟಿಯುಸಿ) ನೇತೃತ್ವದಲ್ಲಿ ಗುರುವಾರ ಪಟ್ಟಣದಲ್ಲಿ ಹಮ್ಮಿಕೊಳ್ಳಲಾಗಿದ್ದ ಪ್ರತಿಭಟನೆ ಉದ್ದೇಶಿಸಿ ಅವರು ಮಾತನಾಡಿದರು. ಸರಕಾರ ರೂಪಿಸಿದ ಜನವಿರೋಧಿ ಶಾಸನಗಳು ಸಂವಿಧಾನಿಕವಾಗಿ ಸಂಸತ್‌ನಲ್ಲಿ ಹಾಗೂ ಸಾರ್ವಜನಿಕವಾಗಿ ಚರ್ಚೆಯಿಲ್ಲದೆ ಅಂಗೀಕಾರಗೊಳ್ಳುತ್ತಿವೆ. ಕರಾಳ ಮಸೂಧೆಗಳು ಶ್ರಮಿಕರ ಕೊರಳು ಸುತ್ತುತ್ತಿವೆ. ಬದಲಾದ ಶಿಕ್ಷಣ ವ್ಯವಸ್ಥೆಯಿಂದ ವಿದ್ಯಾರ್ಥಿ-ಯುವಜನರ ಭವಿಷ್ಯ ಸಂಕಷ್ಟಕ್ಕೆ ನೂಕಲ್ಪಟ್ಟಿದೆ. ಎಲ್ಲವೂ ಖಾಸಗೀಕರಣಗೊಳಿಸಿ ಉದ್ಯಮಿಪತಿಗಳ ಮಾದಕ್ಕೆ ಅರ್ಪಿಸಲು ಮೋದಿ ಸರಕಾರ ತುದಿಗಾಲ ಮೇಲೆ ನಿಂತಿದೆ. ಅನ್ಯಾಯಗಳ ವಿರುದ್ಧ ದನಿ ಎತ್ತುವ ಹೋರಾಟಗಾರರನ್ನು ಬರಹಗಾರರನ್ನು ಬಂಧಿಸಲಾಗುತ್ತಿದೆ. ಸರಕಾರದ ವಿರುದ್ಧ ಮಾತನಾಡುವವರನ್ನು ದೇಶದ್ರೋಹದ ಪಟ್ಟ ಕಟ್ಟಲಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ ರೈತ ನಾಯಕ ಗುಂಡಣ್ಣ, ಸಂಘಟಿತ ಹೋರಾಟಗಳು ಭುಗಿಲೇಳದಿದ್ದರೆ ಸರಕಾರ ನಮ್ಮನ್ನು ತುಳಿದು ಹಾಕುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದರು.

ಎಐಯುಟಿಯುಸಿ ಜಿಲ್ಲಾ ಜಂಟಿ ಕಾರ್ಯದರ್ಶಿ ಶರಣು ಹೇರೂರ ಮಾತನಾಡಿ, ಇದೂವರೆಗೂ ಜಾರಿಗೊಂಡ ಹೊಸ ಮಸೂಧೆಗಳಲ್ಲಿ ಕಾರ್ಮಿಕರ ಹಲವು ಹಕ್ಕುಗಳನ್ನು ಕಸಿದುಕೊಳ್ಳಲಾಗಿದೆ. ಬಂಡವಾಳಶಾಹಿಗಳ ಪರ ಕಾನೂನುಗಳು ರೂಪಿತಗೊಂಡಿವೆ. ಕಾರ್ಖಾನೆಗಳು ಜನರಿಗೆ ಕೆಲಸ ನೀಡುವ ಬದಲು ಇದ್ದ ಕೆಲಸವನ್ನು ಕಸಿದು ಮನೆಗೆ ಕಳುಹಿಸುತ್ತಿವೆ. ಎಸಿಸಿ ಸಿಮೆಂಟ್ ಕಂಪನಿಯಲ್ಲಿ ದುಡಿಯುವ ಗುತ್ತಿಗೆ ಕಾರ್ಮಿಕರಿಗೆ ತಿಂಗಳಿಗೆ ನಾಲ್ಕೋ ಅಥವ ಐದು ಹಾಜರಿ ನೀಡಲಾಗುತ್ತಿದೆ. ಕಡ್ಡಾಯವಾಗಿ ೨೬ ಹಾಜರಿ ನೀಡಬೇಕು ಎಂದು ಆಗ್ರಹಿಸಿದರು.

ಎಐಡಿಎಸ್‌ಒ ಕಾರ್ಯದರ್ಶಿ ವೆಂಕಟೇಶ ದೇವದುರ್ಗಾ ಮಾತನಾಡಿದರು. ಕಟ್ಟಡ ಕಾರ್ಮಿಕ ಸಂಘದ ಮುಖಂಡ ವಿಠ್ಠಲ ರಾಠೋಡ, ಮಲ್ಲಣ್ಣ ದಂಡಬಾ, ಮಲ್ಲಿಕಾರ್ಜುನ ಗಂದಿ, ಶಿವುಕುಮಾರ ಆಂದೋಲಾ, ಮಲ್ಲಿನಾಥ ಹುಂಡೇಕಲ್, ದತ್ತು ಹುಡೇಕರ, ಅವಿನಾಶ ಒಡೆಯರ, ವಿದ್ಯಾ ಬಡಿಗೇರ, ಏಸಪ್ಪಾ ಕೇದಾರ, ಗೋವಿಂದ ಯಳವಾರ, ಈಸಮ್ಮಾ ಜಾಲಗಾರ, ಜಯಶ್ರೀ ಸಮಗಾರ, ಯಲ್ಲಮ್ಮ ತಳಗೇರೆ ಸೇರಿದಂತೆ ಕಟ್ಟಡ ಕಾರ್ಮಿಕರು, ಹಾಸ್ಟಲ್ ಕಾರ್ಮಿಕರು, ರೈತರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. ನಾಲವಾರ ಉಪತಹಶೀಲ್ದಾರ ವೆಂಕನಗೌಡ ಪಾಟೀಲ ಸ್ಥಳಕ್ಕಾಗಮಿಸಿ ಮನವಿಪತ್ರ ಸ್ವೀಕರಿಸಿದರು.