2ನೇ ಹಂತದ ಗ್ರಾ.ಪಂ. ಚುನಾವಣೆ: ಶೇ. 74.55 ರಷ್ಟು ಮತದಾನ

ಕಲಬುರಗಿ: ಗ್ರಾಮ ಪಂಚಾಯಿತಿಯ ಸಾರ್ವತ್ರಿಕ-2020ರ ಚುನಾವಣೆ ಹಿನ್ನೆಲೆಯಲ್ಲಿ ಕಲಬುರಗಿ ಜಿಲ್ಲೆಯ ಐದು ತಾಲೂಕುಗಳಲ್ಲಿ ಎರಡನೇ ಹಂತದ ಮತದಾನವು ರವಿವಾರ ಶಾಂತಿಯುತವಾಗಿ ನಡೆದಿದ್ದು, ಒಟ್ಟು ಶೇ. 74.55 ರಷ್ಟು ಮತದಾನವಾಗಿದೆ ಎಂದು ಕಲಬುರಗಿ ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿ ವಿ.ವಿ. ಜೋತ್ಸ್ನಾ ಅವರು ತಿಳಿಸಿದ್ದಾರೆ.

ಜೇವರ್ಗಿ ತಾಲೂಕು ಶೇ. 77.65 ರಷ್ಟು, ಚಿತ್ತಾಪುರ ಶೇ. 66.20 ರಷ್ಟು, ಸೇಡಂ 82.39 ಶೇ.ರಷ್ಟು, ಚಿಂಚೋಳಿ ಶೇ. 76.85 ರಷ್ಟು ಹಾಗೂ ಯಡ್ರಾಮಿ ಶೇ.69.65 ರಷ್ಟು ಮತದಾನವಾಗಿದೆ.

ಮತ ಚಲಾಯಿಸುವ ಹಕ್ಕು ಹೊಂದಿದ ಒಟ್ಟು 5,63,006 ಮತದಾರರ ಪೈಕಿ 4,24,673 ಮತದಾರರು ಮತ ಚಲಾಯಿಸಿದ್ದು, ಇದರಲ್ಲಿ 2,16,066 ಪುರುಷರು ಹಾಗೂ 2,08,607 ಮಹಿಳಾ ಮತದಾರರು ಇದ್ದಾರೆ.

ಎರಡನೇ ಹಂತದಲ್ಲಿ ಒಟ್ಟು 116 ಗ್ರಾಮ ಪಂಚಾಯಿತಿಗಳ 1953 ಸ್ಥಾನಗಳಿಗೆ ಚುನಾವಣೆ ನಡೆಯಬೇಕಿತ್ತು. ಆದರೆ 242 ಸ್ಥಾನಗಳಿಗೆ ಅವಿರೋಧವಾಗಿ ಆಯ್ಕೆಯಾಗಿರುವ ಹಿನ್ನೆಲೆಯಲ್ಲಿ 1711 ಸ್ಥಾನಗಳಿಗೆ ಮತದಾನ ನಡೆಯಿತು.