ಕೆಬಿಎನ್ ವಿವಿಯ ಸಿಬ್ಬಂದಿಗಳಿಂದ ವೇತನ ಪಾವತಿಗೆ ಮನವಿ

ಕಲಬುರಗಿ: ನಗರದ ಖಾಜಾ ಬಂದಾ ನವಾಜ ಇಂಜಿನಿಯರಿಂಗ್ ಕಾಲೇಜಿನ ಪ್ರಾಧ್ಯಾಪಕರಿಗೆ ಹಾಗೂ ಸಿಬ್ಬಂದಿಗಳಿಗೆ ಕಳೆದ ೧೦ ತಿಂಗಳಿಂದ ವೇತನ ಬಂದಿಲ್ಲದಿರುವುದನ್ನು ಅಖಿಲ ಭಾರತ ಶಿಕ್ಷಣ ಉಳಿಸಿ ಸಮಿತಿಯ ಬೆಂಬಲಿತವಾಗಿರುವ ಇಂಜಿನಿಯರಿಂಗ್ ಕಾಲೇಜ್ ಫ್ಯಾಕಲ್ಟಿಸ್ ಅಸೋಸಿಯೇಷನ್ ಕಳವಳ ವ್ಯಕ್ತಪಡಿಸಿ, 30 ವರ್ಷದಿಂದ ಕೆಲಸ ಮಾಡುತ್ತಿರುವ ಹಿರಿಯ ಉಪನ್ಯಾಸಕರು, ಲ್ಯಾಬ್ ಅಸಿಸ್ಟೆಂಟ್ಸ್ ಹಾಗೂ ಇತರೆ ಸಿಬ್ಬಂದಿಗಳು ಜೀವನ ನಡೆಸುವುದು ಕಷ್ಟವಾಗುತ್ತಿದೆ ಎಂದು ವಿಶ್ವವಿದ್ಯಾಲಯದ ಉಪಕುಲಪತಿ ಸೇರಿದಂತೆ ಆಡಳಿತ ಮಂಡಳಿಗೆ ಮವನಿ ಮಾಡಿ ಸಮಸ್ಯೆ ಬಗೆ ಹರಿಸುವಂತೆ ಒತ್ತಾಯಿಸಿದ್ದಾರೆ.

ಕೋವಿಡ್-೧೯ರ ನೆಪವೊಡ್ಡಿ ಇಲ್ಲಿಯವರೆಗೆ ಸಿಬ್ಬಂದಿಗಳಿಗೆ ನ್ಯಾಯಯುತವಾಗಿ ತಿಂಗಳಿಗೆ ದೊರಕಬೇಕಾದ ಸಂಬಳವನ್ನು ನೀಡದಿರುವುದನ್ನು ವಿರೋಧಿಸಿ ಅಲ್ಲಿನ ಸಿಬ್ಬಂದಿಗಳು ಪದೇ ಪದೇ ಪ್ರಾಂಶುಪಾಲರು, ಡೀನ್ ಹಾಗೂ ಮ್ಯಾನೆಜ್‌ಮೆಂಟ್‌ರವರ ಗಮನಕ್ಕೆ ತಂದಿದ್ದರು ಸಂಬಳವನ್ನು ನೀಡುತ್ತಿಲ್ಲ. ಕಳೆದ ಎರಡು ವಾರಗಳಿಂದ ಉಪನ್ಯಾಸಕರು, ಪ್ರಾಧ್ಯಾಪಕರು ಕಾಲೇಜಿನಲ್ಲಿ ಸಂಬಳಕ್ಕಾಗಿ ಮನವಿ ಪತ್ರ, ಧರಣಿ, ಪ್ರತಿಭಟನೆ ಮಾಡಿದರೂ ಇಂದಿಗೂ ಸಂಬಳವನ್ನು ನೀಡದಿರುವುದು ಅಮಾನವೀಯವಾದುದಾಗಿದ್ದು, ಎಷ್ಟೋ ಸಿಬ್ಬಂದಿಗಳ ಜೀವನವು ಸಂಕಷ್ಟಕ್ಕೀಡಾಗಿದೆ ಎಂದು ಮನವಿ ಪತ್ರದಲ್ಲಿ ತಿಳಿಸಿದ್ದಾರೆ.

ಸಂಘಟನೆಯ ವತಿಯಿಂದ ಕಾಲೇಜಿನ ಪ್ರಾಂಶುಪಾಲರು, ಕೆ.ಬಿ.ಎನ್. ವಿಶ್ವವಿದ್ಯಾಲಯದ ಉಪಕುಲಪತಿಗಳು, ಡೀನ್‌ರನ್ನು ಭೇಟಿಯಾಗಿ ಆದಷ್ಟು ಬೇಗ ಸಮಸ್ಯೆಯನ್ನು ಬಗೆಹರಿಸಬೇಕೆಂದು ಒತ್ತಾಯಿಸಲಾಗಿದೆ. ಹಾಗೂ ಇಂದು ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದ ರೀಜಿನಲ್ ಆಫೀಸರ್ ಡಾ.ಬಸವರಾಜ ಗಾದಗೆ ಅವರನ್ನು ಭೇಟಿಯಾಗಿ ಸಮಸ್ಯೆಯನ್ನು ಪರಿಹರಿಸುವಂತೆ ಒತ್ತಾಯಿಸಲಾಯಿತು.

ಸಂಘಟನೆಯ ಸಂಚಾಲಕ ವೀರಭದ್ರಪ್ಪ ಆರ್.ಕೆ, ಪ್ರಾಧ್ಯಾಪಕರಾದ ಡಾ. ವಿಶಾಲ ದತ್ತ, ಡಾ. ಮಜರ್ ಹುಸೇನ್, ಜಮರುದ್ಧ ತಾಜ್, ಮಹಮ್ಮದ್, ಮೊಹ್ಮದ್ ಮನ್ಸೂರ್ ಅಹಮದ್ ಹಾಗೂ ಇಂಜಿನಿಯರಿಂಗ್ ಕಾಲೇಜ್‌ಸ್ ಫ್ಯಾಕಲ್ಟಿಸ್ ಅಸೋಸಿಯೇಷನ್ ಪ್ರತಿನಿಧಿಯಾದ ಅಶ್ವಿನಿಯವರು ಇದ್ದರು.