ವ್ಯಾಪಕ ಮಳೆಯಿಂದ ರೈತರ ಬದುಕು ಬರ್ಬಾದ್- ಕುರ್ಚಿಗಿಟ್ಟಿಸಿಕೊಳ್ಲುವಲ್ಲಿ ಶಾಸಕರು ಮಗ್ನ

ಕಲಬುರಗಿ: ಜಿಲ್ಲೆಯ ಆಳಂದ, ಚಿಂಚೋಳಿ, ಸೇಡಂ, ಕಲಬುರಗಿ ಗ್ರಾಮೀಣ, ಕಾಳಗಿ, ಶಹಾಬಾದ್ ಇಲ್ಲೆಲ್ಲಾ ವ್ಯಾಪಕ ಮಳೆಯಿಂದ ರೈತರ ಬೆಳೆಗಳು ಸಂಪೂರ್ಣವಾಗಿ ಹಾಳಾಗಿವೆ. ತೊಗರಿ, ಉದ್ದು, ಹೆಸ,ರು ರೈತರು ಕಂಗಾಲಾಗಿದ್ದಾರೆ. ಆದರೆ ಈ ಕ್ಷೇತ್ರಗಳನ್ನು ಪ್ರತಿನಿಧಿಸುತ್ತಿರುವ ಬಿಜೆಪಿ ಶಾಸಕರು ತಮಗಾಗಿ ಕುರ್ಚಿ ಗಿಟ್ಟಿಸಿಕೊಳ್ಳುವಲ್ಲಿ ನಿರತರಾಗಿದ್ದಾರೆ, ತಮ್ಮನ್ನು ಮತ ಹಾಕಿ ಗೆಲ್ಲಿಸಿರುವ ರೈತರು, ಜನರನ್ನೇ ಸಂಪೂರ್ಣ ಮರೆತುಬಿಟ್ಟಿದ್ದಾರೆ ಎಂದು ಕೆಪಿಸಿಸಿ ಸದಸ್ಯ ಹಣಮಂತರಾವ ಭೂಸನೂರ್ ವ್ಯಂಗವಾಡಿದ್ದಾರೆ.

ಕಳೆದ 2020ರಲ್ಲಿ ಅತಿ ಹೆಚ್ಚು ಮಳೆ ಸುರಿದಿದ್ದರಿಂದ ರೈತರ ಬೆಳೆಗಳು ಹಾಳಾಗಿದ್ದವು. ಬೆಳೆ ಸಮೀಕ್ಷೆ ಸರಕಾರ ಸಂಪೂರ್ಣವಾಗಿ ನಡೆಸಲಿಲ್ಲ. ಸರಕಾರದ ಮೇಲೆ ಜನರ ಮತ್ತು ರೈತರ ನಂಬಿಕೆ ವಿಶ್ವಾಸ ಇಲ್ಲದಂತಾಗಿದೆ. ಶೇ. 70 ರಷ್ಟು ರೈತರ ಮುಂಗಾರು ಬೆಳೆ ಹಾಳಾಗಿದ್ದರೂ ಕೇಳೋರಿಲ್ಲದಂತಾಗಿದೆ.

ನೂರಾರು ಹಳ್ಳಿಗಳಲ್ಲಿ ರೈತರ ಶೇ 75 ರಷ್ಟು ಬೆಳೆ ಮಳೆಯಿಂದ ಹಾನಿಯಾಗಿದೆ. ಆದರೆ ಬಿಜೆಪಿ ಶಾಸಕರು, ಸಂಸದರು ಒಬ್ಬ ರೈತನ ಹೊಲಗಳಿಗೆ ಭೇಟಿ ನೀಡಿ ಬೆಳೆ ಹಾನಿ ಸಮೀಕ್ಷೆ ನಡೆಸಿಲ್ಲ, ಜಿಲ್ಲಾಡಳಿತಕ್ಕೆ ಸೂಚಿಸುತ್ತ ಸರಕಾರಕ್ಕೆ ವರದಿ ಬೇಗ ಸಲ್ಲಿಕೆಯಾಗುವಂತೆ ಕ್ರಮ ಕೈಗೊಂಡಿಲ್ಲ. ಕೇಂದ್ರ ನೈಸರ್ಗಿಕ ವಿಕೋಪ ಪರಿಹಾರದ ನಿಯಮದಂತೆ ಇನ್ನುವರೆಗೆ ಮನೆ ಕಳೆದುಕೊಂಡವರಿಗೆ ಮತ್ತು ಬೆಳೆ ಹಾನಿಗೊಳಗಾದವರಿಗೆ ತಕ್ಷಣ ಪರಿಹಾರ ನೀಡುವ ಕೆಲಸವೂ ನೆನೆಗುದಿಗೆ ಬಿದ್ದಿದೆ ಎಂದು ಹಣಮಂತರಾವ ಭೂಸನೂರ್ ದೂರಿದ್ದಾರೆ.

ಜಿಲ್ಲೆಯ ರೈತರು ಅನಾಥರಾಗಿದ್ದಾರೆ ಅವರ ಬಗ್ಗೆ ಕಾಳಜಿ ತೋರಿಸುವವರೇ ಇಲ್ಲದಂತಾಗಿದೆ. ಅಧಿಕಾರ ಆಸೆಗಾಗಿ ಬೆಂಗಳೂರು, ದೆಹಲಿಯಲ್ಲಿ ಬಿಡಾರ ಹೂಡಿರುವುದರಿಂದ ರೈತರನ್ನೆ ಮರೆತು ಬಿಟ್ಟಿದ್ದಾರೆ. ಜಿಲ್ಲೆಯ ಎಲ್ಲಾ ಬಿಜೆಪಿ ಶಾಸಕರು ಹೈಕಮಾಂಡ್ ಮನೆ ಮೆಟ್ಟಿಲು ತುಳಿಯುತ್ತಿದ್ದಾರೆಯೇ ಹೊರತು ಕಣ್ಣೀರಲ್ಲಿ ಕೈ ತೊಳೆಯುತ್ತಿರುವ ರೈತರನ್ನು ಮಾತನಾಡಿಸುತ್ತಿಲ್ಲ. ಜನರ ನೋವು- ನಲಿವಿಗೂ ಸ್ಪಂದಿಸುತ್ತಿಲ್ಲ. ಇಂತಹ ಜನನಾಯಕರ ಧೋರಣೆಗೆ ಜಿಲ್ಲೆಯ ಜನ ಬೇಸತ್ತಿದ್ದಾರೆ. ಜನರೇ ಇವರಿಗೆ ಪಾಠ ಕಲಿಸುತ್ತಾರೆಂದು ಭೂಸನೂರ್ ಹೇಳಿದ್ದಾರೆ.