ವಾಡಿ: ದಿನಸಿ-ಕೋವಿಡ್ ಸುರಕ್ಷಾ ಕಿಟ್ ವಿತರಣೆ

ವಾಡಿ: ದೊಡ್ಡ ದೊಡ್ಡ ಬಂಗಲೆ ಮಹಲುಗಳನ್ನು ಕಟ್ಟಿ ಬೀದಿ ಬದಿಯ ಗುಡಿಸಲಲ್ಲಿ ಬದುಕುವ ಕಟ್ಟಡ ಕಾರ್ಮಿಕರು ಸಂಕಷ್ಟದ ಜೀವನ ನಡೆಸುತ್ತಿದ್ದಾರೆ. ಬಿತ್ತಿ ಬೆಳೆದು ದೇಶಕ್ಕೆ ಅನ್ನ ನೀಡುವ ರೈತರು ಹೊಟ್ಟೆಗೆ ಹಿಟ್ಟಿಲ್ಲದೆ ಹಸಿವೆಯಿಂದ ನರಳುತ್ತಿದ್ದಾರೆ. ದುಡಿಯುವ ವರ್ಗ ಸರಕಾರಕ್ಕೆ ತನ್ನ ಹಕ್ಕು ಕೇಳುವ ಸ್ವಾತಂತ್ರ್ಯವಿಲ್ಲ ಎಂದು ಹೋರಾಟಗಾರ ಆರ್.ಕೆ.ವೀರಭದ್ರಪ್ಪ ಕಳವಳ ವ್ಯಕ್ತಪಡಿಸಿದರು.

ಆಲ್ ಇಂಡಿಯಾ ಯುನೈಟೆಡ್ ಟ್ರೇಡ್ ಯೂನಿಯನ್ ಸೆಂಟರ್ (ಎಐಯುಟಿಯುಸಿ)ಗೆ ಸಂಯೋಜಿತ ಕಟ್ಟಡ ಕಾರ್ಮಿಕರ ಸಂಘ, ಕಾರ್ಮಿಕ ಇಲಾಖೆ ವತಿಯಿಂದ ನೀಡಲಾದ ದಿನಸಿ ಪದಾರ್ಥ ಹಾಗೂ ಕೋವಿಡ್ ಸುರಕ್ಷಾ ಕಿಟ್‍ಗಳನ್ನು ಗುರುವಾರ ನಗರದ ಎಂಪಿಎಸ್ ಶಾಲೆ ಮೈದಾನದಲ್ಲಿ ನೂರಾರು ಜನ ಕಟ್ಟಡ ಕಾರ್ಮಿಕರಿಗೆ ವಿತರಿಸಿ ಅವರು ಮಾತನಾಡಿದರು.

ದೇಶದ ಸ್ವಾತಂತ್ರ್ಯದ ಬಗ್ಗೆ ಬಹಳ ಜನ ಹೆಮ್ಮೆಯಿಂದ ಮಾತನಾಡುತ್ತಾರೆ. ಆದರೆ ದೇಶವನ್ನು ಕಟ್ಟಿ ಹಸಿದ ಹೊಟ್ಟೆಯಿಂದ ಬೀದಿಯಲ್ಲಿ ನಿಂತಿರುವ ನಿರಾಶ್ರಿತ ಕಾರ್ಮಿಕರ ಹೀನಾಯ ಬದುಕಿನ ಕುರಿತು ಯಾರೊಬ್ಬರೂ ಮಾತನಾಡುವುದಿಲ್ಲ.

ಬೆವರು ಸುರಿಸಿ ಆಣೆಕಟ್ಟುಗಳನ್ನು ಅರಮನೆಗಳನ್ನು ಕಟ್ಟಿದವರು ಈ ದೇಶದ ದುಡಿಯುವ ಜನರು. ಅವರಿಗೆ ಸಿಗಬೇಕಾದ ಸೌಲತ್ತುಗಳನ್ನು ನೇರವಾಗಿ ಅವರ ಮನೆಬಾಗಿಲಿಗೆ ತಲುಪಿಸುವ ಕೆಲಸ ಸರಕಾರಗಳು ಮಾಡುತ್ತಿಲ್ಲ. ಸ್ವಾಭೀಮಾನದಿಂದ ಬದುಕಬೇಕಾದ ಈ ಶ್ರಮಜೀವಿಗಳು ಇಂದಿಗೂ ದಿನಸಿ ಕಿಟ್‍ಗಳಿಗಾಗಿ ಕೈಯೊಡ್ಡಿ ನಿಲ್ಲುತ್ತಿದ್ದಾರೆ. ಇದು ಆರಳುವ ಸರಕಾರಗಳಿಗೆ ಕಾಣುತ್ತಿಲ್ಲ ಎಂದು ಆರೋಪಿಸಿದರು.

ಕಟ್ಟಡ ಕಾರ್ಮಿಕ ಸಂಘದ ಚಿತ್ತಾಪುರ ತಾಲೂಕು ಅಧ್ಯಕ್ಷ ರಾಘವೇಂದ್ರ ಎಂ.ಗುಜರಾಲಕರ ಮಾತನಾಡಿ, ಸರಕರಾದ ಯಾವೂದೇ ಸೌಲಭ್ಯ ಹೋರಾಟ ಮಾಡದೆ ನಮ್ಮ ಕೈಗಳಿಗೆ ಸೇರುವುದಿಲ್ಲ. ಕಟ್ಟಡ ಕಾರ್ಮಿಕರಿಗಾಗಿ ವಿಶೇಷ ಯೋಜನೆಗಳಿವೆ ಮತ್ತು ಸೌಲಭ್ಯಗಳಿವೆ.

ಆದರೆ ಅವು ಅರ್ಹ ಫಲಾನುಭವಿಗಳಿಗೆ ತಲುಪದೆ ಮಧ್ಯವರ್ತಿಗಳ ಪಾಲಾಗುತ್ತಿವೆ. ಕಟ್ಟಡ ಕಾರ್ಮಿಕರು ಸಂಘಟಿತರಾಗುವ ಮೂಲಕ ಅನ್ಯಾಯಗಳ ವಿರುದ್ಧ ಹೋರಾಟಕ್ಕೆ ಮುಂದಾಗಬೇಕು ಎಂದು ಕರೆ ನೀಡಿದರು.

ಕಟ್ಟಡ ಕಾರ್ಮಿಕ ಸಂಘದ ನಗರ ಘಟಕದ ಸಂಚಾಲಕ ಶರಣು ಹೇರೂರ ಪ್ರಾಸ್ತಾವಿಕ ಮಾತನಾಡಿದರು. ಕಾರ್ಮಿಕ ಮುಖಂಡರಾದ ಚಂದ್ರಕಾಂತ ಮಾಳಗಿ, ವಿಠ್ಠಲ ರಾಠೋಡ, ಅವಿನಾಶ ಒಡೆಯರ, ಶಿಕ್ಷಕ ಭಗವಾನ ದಂಡಗುಲಕರ, ರಾಜು ಒಡೆಯರ್, ಯೇಶಪ್ಪ ಕೇದಾರ, ಸಾಯಿನಾಥ ಚಿಟೇಲಕರ, ಗೌತಮ ಪರತೂರಕರ ಸೇರಿದಂತೆ ನೂರಾರು ಜನ ಕಟ್ಟಡ ಕಾರ್ಮಿಕರು ಸಭೆಯಲ್ಲಿ ಪಾಲ್ಗೊಂಡು ದಿನಸಿ ಕಿಟ್‍ಗಳನ್ನು ಪಡೆದುಕೊಂಡರು.