ನೆನೆಗುದಿಗೆ ಬಿದ್ದ ಚರಂಡಿ ಕಾಮಗಾರಿ ಪೂರ್ಣಗೊಳಿಸಲು ಸಾರ್ವಜನಿಕರ ಆಗ್ರಹ

ಶಹಾಬಾದ: ನಗರದ ಮಧ್ಯಭಾಗದಲ್ಲಿರುವ ಬಾಲಕರ ವಸತಿ ನಿಲಯದ ಮುಂಭಾಗದಲ್ಲಿ ಚರಂಡಿ ಕಾಮಗಾರಿ ನೆನೆಗುದಿಗೆ ಬಿದ್ದಿರುವುದರಿಂದ ಸಾರ್ವಜನಿಕರ ಸಂಚಾರಕ್ಕೆ ತೊಂದರೆಯಾಗುತ್ತಿರುವುದಲ್ಲದೇ, ಚರಂಡಿ ನೀರು ಸಂಗ್ರಹವಾಗಿ ಎಲ್ಲಿಲ್ಲದ ತೊಂದರೆಯಾಗುತ್ತಿದೆ.

ನಗರೋತ್ಥಾನದ ೩ನೇ ಹಂತದ ಯೋಜನೆಯಲ್ಲಿ ಕೈಗೊಂಡ ಚರಂಡಿ ಕಾಮಗಾರಿ ಅರ್ಧಂಬರ್ಧವಾಗಿದೆ.ಅದು ಕೂಡ ಕಳಪೆ ಮಟ್ಟದಿಂದ ಮಾಡಲಾಗಿದೆ. ಕಳಪೆ ಮಟ್ಟದಿಂದ ನಡೆದ ಕಾಮಗಾರಿಯ ಬಗ್ಗೆಯೂ ಕ್ರಮ ತೆಗೆದುಕೊಳ್ಳುತ್ತಿಲ್ಲ.ಅಲ್ಲದೇ ಕೆಲಸವೂ ಬೇಗ ಮುಗಿಸುತ್ತಿಲ್ಲ.ಇದರಿಂದ ಸಾರ್ವಜನಿಕರಿಗೆ ಮಿಲತ್ ನಗರ ಬಡಾವಣೆಗೆ ಹೋಗಲು ತೊಂದರೆಯಾಗುತ್ತಿದೆ.ಸುಮಾರು ೨ ವರ್ಷಗಳಿಂದ ಈ ಕಾಮಗಾರಿ ನೆನೆಗುದಿಗೆ ಬಿದ್ದಿದೆ.

ಗುತ್ತಿಗೆದಾರನ ವಿರುದ್ಧ ಕ್ರಮಕೈಗೊಳ್ಳಲು ನಗರಸಭೆಯ ಅಧಿಕಾರಿಗಳು ಹಾಗೂ ಜಿಲ್ಲಾ ಅಧಿಕಾರಿಗಳು ಕ್ರಮಕೈಗೊಳ್ಳಲು ಮುಂದಾಗುತ್ತಿಲ್ಲ. ತೆಗ್ಗು ತೋಡಿ ಚರಂಡಿ ನಿರ್ಮಾಣ ಮಾಡದ ಕಾರಣ ಗುಂಡಿಯಲ್ಲಿ ಕೊಳಚೆ ನೀರು ನಿಂತು ದುರ್ನಾತ ಬೀರುತ್ತಿದೆ.ಸುತ್ತಲಿನ ಜನರಿಗೆ ಸೊಳ್ಳೆಯ ಕಾಟವೂ ಅಧಿಕವಾಗಿದೆ.ಜನ-ಜಾನುವಾರು ಗುಂಡಿಯಲ್ಲಿ ಬೀಳೂವ ಸಾಧ್ಯತೆಯಿದೆ.ಅಲ್ಲದೇ ಚರಂಡಿ ನಿರ್ಮಾಣಕ್ಕಾಗಿ ಮುಖ್ಯರಸ್ತೆಯ ಮೇಲೆ ಕಂಕರ್ ಹಾಗೂ ಮರಳು ಹಾಕಿ ವರ್ಷಗಳಾಗುತ್ತಿವೆ.ಇದರಿಂದ ಮರಳು ಮತ್ತು ಕಂಕರ್ ರಸ್ತೆಯ ತುಂಬೆಲ್ಲಾ ಹರಡಿ ರಸ್ತೆ ಇಕ್ಕಟ್ಟಾಗಿ ಸಂಚರಿಸಲು ಕಷ್ಟವಾಗುತ್ತಿದೆ.ಮರಳಿಂದ ವಾಹನ ಸವಾರರು ಆಯಾ ತಪ್ಪಿ ಬೀಳುತ್ತಿದ್ದಾರೆ.

ಆದರೆ ಇದೇ ರಸ್ತೆಯಿಂದ ನಗರಸಭೆಯ ಅಧಿಕಾರಿಗಳು ಬಂದು ಹೋಗುತ್ತಿದ್ದರೂ ಕ್ರಮಕೈಗೊಳ್ಳಲು ಮಾತ್ರ ಹಿಂದೇಟು ಹಾಕುತ್ತಿರುವುದು ಮಾತ್ರ ದುರ್ದೈವ. ಈ ಬಗ್ಗೆ ಅನೇಕ ಬಾರಿ ಶಾಸಕ ಬಸವರಾಜ ಮತ್ತಿಮಡು ಅವರ ಗಮನಕ್ಕೆ ತರಲಾದರೂ ಸಮಸ್ಯೆ ಮಾತ್ರ ಸಮಸ್ಯೆಯಾಗಿಯೇ ನಿಂತಿದೆ.ಇದಕ್ಕೆ ಹೇಳೋರು ಕೇಳೋರು ಯಾರು ಇಲ್ಲವಾ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಿಂದ ಕೇಳಿ ಬರುತ್ತಿದೆ.ಕೂಡಲೇ ನಗರಸಭೆಯ ಅಧಿಕಾರಿಗಳು ರಸ್ತೆಯ ಮೇಲಿನ ಮರಳು ಮತ್ತು ಕಂಕರ್‌ಗಳನ್ನು ತೆಗೆಯಿಸಬೇಕು.ಅಲ್ಲದೇ ಉತ್ತಮ ಮತ್ತು ವೈಜ್ಞಾನಿಕ ಚರಂಡಿ ನಿರ್ಮಾಣ ಮಾಡಬೇಕು ಎಂದು ಸಾರ್ವಜರ್ನಿಕರ ಒತ್ತಾಯವಾಗಿದೆ.

ಈಗಾಲೇ ಚರಂಡಿಗಾಗಿ ತಗ್ಗು ತೋಡಿ ಹಾಗೇ ಬಿಡಲಾಗಿದೆ.ಅದರಲ್ಲಿ ನೀರು ಮಲೆತು ದುರ್ನಾತ ಬೀರುತ್ತಿದೆ. ರಸ್ತೆಯ ಮೇಲೆ ಮರಳು ಮತ್ತು ಕಂಕರ್ ಬಿದ್ದಿರುವುದರಿಂದ ಸಾರ್ವಜನಿಕರ ಸಂಚಾರಕ್ಕೆ ತೋದರೆಯಾಗುತ್ತಿದೆ. ಚರಂಡಿ ಕಾಮಗಾರಿ ಸ್ವಲ್ಪವೇ ಮಾಡಿದ್ದಾರೆ.ಅದು ಕೂಡ ಕಳಪೆ ಕಾಂಗಾರಿ.ಈಬಗ್ಗೆ ಅನೇಕ ಬಾರಿ ಶಾಸಕರ ಗಮನಕ್ಕೆ ಹಾಗೂ ನಗರಸಭೆಯ ಪೌರಾಯುಕ್ತರ ಗಮನಕ್ಕೆ ತಂದರೂ ಯಾವುದೇ ಕ್ರಮಕೈಗೊಳ್ಳಲು ಮುಂದಾಗುತ್ತಿಲ್ಲ -ನಾಗರಾಜ ಕರಣಿಕ್ ನಗರಸಭೆಯ ಸದಸ್ಯರು ಶಹಾಬಾದ.

ಕೆಲಸ ಪ್ರಾರಂಭ ಮಾಡಲಾಗಿತ್ತು. ಮಳೆಗಾಲದಲ್ಲಿ ಕೆಲಸ ಮಾಡಲು ಆಗದಿರುವುದರಿಂದ ನಿಲ್ಲಿಸಲಾಗಿತ್ತು.ಸದ್ಯ ಕೆಲಸ ಪ್ರಾರಂಭ ಮಾಡಲು ಗುತ್ತಿಗೆದಾರನಿಗೆ ತಾಕೀತು ಮಾಡಲಾಗಿದೆ. ಕೆಲವೇ ದಿನಗಳಲ್ಲಿ ಕೆಲಸ ಪ್ರಾರಂಭ ಮಾಡಿ ಉತ್ತಮ ಚರಂಡಿ ನಿರ್ಮಾಣ ಮಾಡಿಕೊಡಲಾಗುವುದು- ಡಾ.ಕೆ.ಗುರಲಿಂಗಪ್ಪ ಪೌರಾಯುಕ್ತರು ನಗರಸಭೆ ಶಹಾಬಾದ.