ಪತ್ರಕರ್ತರಿಗೆ ಆರೋಗ್ಯ ಕಾರ್ಡ್ ವಿತರಣೆಗೆ ಕ್ರಮ: ಸಿಎಂ ಬೊಮ್ಮಾಯಿ

*ಸ್ವಾತಂತ್ರ್ಯ ಪೂರ್ವದಿಂದಲೂ ಪತ್ರಿಕಾರಂಗ ಕೆಲಸ ಮಾಡಿದೆ.

*ಕೆಕೆಆರ್ ಡಿಬಿಗೆ ರೂ‌3000 ಕೋಟಿ ಮೀಸಲು ಈ ಕುರಿತು ಮುಂದಿನ ಬಜೆಟ್ ನಲ್ಲಿ ಪ್ರಸ್ತಾಪ.

ಕಲಬುರಗಿ: ಸ್ಚಾತಂತ್ರ್ಯ ಪೂರ್ವದಿಂದಲೂ ಪತ್ರಿಕಾರಂಗ ಕೆಲಸ ಮಾಡುತ್ತಾ ಬಂದಿದೆ. ಪತ್ರಿಕೆಗಳು ಸ್ವಾತಂತ್ರ್ಯ ಹೋರಾಟ ರೂಪಿಸುವಲ್ಲಿ ಬಹಳ ದೊಡ್ಡ ಪಾತ್ರ ನಿರ್ವಹಿಸಿವೆ. ಎರಡನೆಯ ಮಹಾಯುದ್ದದ ನಂತರ ಪತ್ರಿಕಾರಂಗ ತನ್ನ ಸ್ವಂತಿಕೆಯನ್ನು ಅಳವಡಿಕೊಳ್ಳಲು ಪ್ರಾರಂಭಿಸಿತು ಎಂದು ಸಿಎಂ ಬಸವರಾಜ್ ಬೊಮ್ಮಾಯಿ ಹೇಳಿದರು.

ನಗರದ ಪೂಜ್ಯ ಶ್ರೀ ಬಸವರಾಜಪ್ಪ ಅಪ್ಪ ಸ್ಮಾರಕ ಭವನದಲ್ಲಿ ಆಯೋಜಿಸಲಾಗಿದ್ದ ಎರಡನೆಯ ದಿನದ 36 ನೆ ರಾಜ್ಯ ಪತ್ರಕರ್ತರ ಸಮಾವೇಶ ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು.

ಕೈ ಬರಹದ ಮೂಲಕ‌ ಪ್ರಾರಂಭವಾದ ಪತ್ರಿಕಾರಂಗ ನಂತರ ಮೊಳೆ ಜೋಡಿಸುವ ಹಂತಕ್ಕೆ ಬಂದು ಈಗ ಮುಂದುವರೆದ ತಂತ್ರಜ್ಞಾನ ಅಳವಡಿಸಿಕೊಂಡು ಬಂದಿದೆ. ಆ ಕಾಲದಿಂದಲೂ ಪತ್ರಕರ್ತರು ಮೌಲ್ಯವನ್ನ ಉಳಿಸಿಕೊಂಡು ಬಂದಿದ್ದಾರೆ ಎಂದರು.

ಪತ್ರಿಕಾರಂಗಕ್ಕೆ ಬಹಳ ಸವಾಲುಗಳಿವೆ. ವ್ಯವಸ್ಥೆಯ ಒಳಗಿನ ಲೋಪದೋಷ ಹೊರತರಲು ಅಡ್ಡಿ ಆತಂಕ ಎದುರಿಸಿ ಸಿಡಿದೆದ್ದಿದೆ. ಹಾಗಾಗಿ ತನ್ನ ಸ್ವಾಮಿತ್ವವನ್ನ ಕಾಪಾಡಿಕೊಂಡು ಬಂದಿದೆ. ಎಡಿಟೋರಿಯಲ್ ಬರೆಯ ಬೇಕಾದರೆ ಅನುಮತಿ ಪಡೆದುಕೊಳ್ಳಬೇಕಾದ ಸಂದರ್ಭ ಎದುರಾದಾಗಲೂ ಕೂಡಾ ಸಂಪಾದಕರು ಹೋರಾಟ ಮಾಡಿ ತಮ್ಮ ಸ್ವಾತಂತ್ರ್ಯ ವನ್ನ ಉಳಿಸಿಕೊಂಡು ಬಂದಿದ್ದಾರೆ.

ಜಾಗತೀಕರಣ, ಖಾಸಗಿಕರಣ, ಉದಾರಿಕರಣ‌ದಿಂದಾಗಿ ಹಾಗೂ ಮಾರುಕಟ್ಟೆ ಆಧಾರಿತ ವ್ಯವಸ್ಥೆ ಅಸ್ಥಿತ್ವಕ್ಕೆ ಬಂದಾಗ ಕೇವಲ ಲಾಭ ನಷ್ಟ ಬಂದಾಗ ಮೌಲ್ಯಗಳ ಸ್ಥಾನ ಎಲ್ಲಿದೆ? ಅದನ್ನು ಉಳಿಸುವವರು ಯಾರು? ಎನ್ನುವ ಪ್ರಶ್ನೆಗಳು ಉದ್ಭವವಾಗುತ್ತದೆ. ಈ ಎಲ್ಲದರ ನಡುವೆ ಅಂತಃಕರಣವನ್ನು ಹಿಡಿದಿಟ್ಟುಕೊಳ್ಳುವುದು ಮುಖ್ಯ ಮಾನವೀಯತೆಯನ್ನು ಅಳವಡಿಸಿಕೊಳ್ಳುವುದು ಮುಖ್ಯವಾಗುತ್ತದೆ.

ಆಗ ಸಮಾಜದಲ್ಲಿ ಬಹಳ ದೊಡ್ಡ ಬದಲಾವಣೆ ಆಗಲಿದ್ದು ಸಮಾಜದಲ್ಲಿ ಬದಲಾವಣೆಗೆ ಪತ್ರಕರ್ತರ ಪತ್ರಿಕಾರಂಗ ಪ್ರಮುಖ ಪಾತ್ರವಹಿಸುವುದರ ಜೊತೆಗೆ ಸದಾ ಜಾಗೃತರಿದ್ದರೆ ಸಮಾಜ ಹಾಗೂ ಸರ್ಕಾರ ಸರಿದಾರಿಯಲ್ಲಿರುತ್ತದೆ ಎಂದು ಅಭಿಪ್ರಾಯಪಟ್ಟರು.

ಇಂದು ಪತ್ರಿಕೆ ನಡೆಸುವುದು ಕಷ್ಟದ ಕೆಲಸ ಹಾಗಾಗಿ ಪತ್ರಿಕಾರಂಗದಲಿ ಕೆಲಸ ಮಾಡುವ ಪತ್ರಕರ್ತರಿಗೆ ಸರ್ಕಾರಿ ಸೌಲತ್ತು ವಿಸ್ತರಣೆ ಮಾಡಲಿದ್ದೇವೆ. ಕೊರೋನಾ ಸಂದರ್ಭದಲ್ಲಿ ಪತ್ರಕರ್ತರು ಗಮನಾರ್ಹ ಕೆಲಸ ಮಾಡಿದ್ದಾರೆ ಹಾಗೂ ಸರ್ಕಾರಕ್ಕೆ ಹಾಗೂ ವ್ಯವಸ್ಥೆಯನ್ನು ಎಚ್ಚರಿಸುವ ಕೆಲಸ ಮಾಡಿದ್ದಾರೆ ಎಂದು ಶ್ಲಾಘಿಸಿ, ಕೊರೋನದಿಂದ ಮೃತಪಟ್ಟ ಪತ್ರಕರ್ತರಿಗೆ ಈಗಾಗಲೇ ಐದು ಲಕ್ಷ ಪರಿಹಾರ ನೀಡಿದ್ದೇವೆ. ಇನ್ನುಳಿದವರಿಗೂ ಪರಿಹಾರ ಕೂಡಲೇ ವಿತರಿಸಲಾಗುವುದು ಎಂದು ಭರವಸೆ ನೀಡಿದರು.

ರಾಜಕಾರಣಿಗಳು ಹಾಗೂ ಪತ್ರಕರ್ತರ ನಡುವೆ ಬಿಡಿಸದ ನಂಟು ಎಂದು ಲಗು ಹಾಸ್ಯದ ಮೂಲಕ ಹೇಳಿದ ಸಿಎಂ, ನಮ್ಮನ್ನು ಬಿಟ್ಟು ನೀವು ನಿಮ್ಮನ್ನು ಬಿಟ್ಟು ನಾವಿರಲು ಆಗುವುದಿಲ್ಲ. ಹಾಗಾಗಿ ಒಳ್ಳೆ ಕೆಲಸಕ್ಕೆ‌ನಾವು‌ನೀವು ಜೊತೆಯಾಗಿ ಸಮಾಜಕ್ಕಾಗಿ ಕೆಲಸ ಮಾಡೋಣ ಎಂದು ಮನವಿ ಮಾಡಿದರು. ನಿಮ್ಮಲ್ಲೂ ಕೂಡಾ ರಾಜಕಾರಣ ಇದೆ. ಒಗ್ಗಟ್ಟನ್ನು ಸಾಧಿಸುವ ಸಲುವಾಗಿ ಇರುತ್ತದೆ. ಇದರಿಂದ ನಮಗೆ ಒಳ್ಳೆಯ ಸಲಹೆ ಸಿಗುತ್ತದೆ ಎಂದರು.

ಕಲಬುರಗಿ ಭಾಗದ‌ ಅಭಿವೃದ್ದಿ ಈ ಭಾಗದ ಜನರ ಭಾವನೆಗಳ ಬಗ್ಗೆ ಸುದೀರ್ಘ ಚರ್ಚೆ ನಡೆಸಿ ನಿರ್ಣಯ ಕೈಗೊಂಡು ಸರ್ಕಾರಕ್ಕೆ ಸಲ್ಲಿಸಿ ಎಂದ ಅವರು ಆರ್ಟಿಕಲ್ 371 J ಪ್ರಕಾರ ಸೌಲಭ್ಯವನ್ನು‌ ಕಟ್ಟು‌ನಿಟ್ಟಾಗಿ ಕೊಡಲಿದ್ದೇವೆ. ಕೆಕೆ ಆರ್ ಡಿಬಿಗೆ ರೂ‌ 3000 ಕೋಟಿಯನ್ನು ಬಜೆಟ್ ನಲ್ಲಿ ತೆಗೆದಿರಿಸಲುದ್ದೇವೆ. ಈ ಭಾಗದಲ್ಲಿ ಖಾಲಿಯಿರುವ 14000 ಪೋಸ್ಟ್ ಗಳಹ ತುಂಬಬೇಕಿದೆ. ಈ ಬಗ್ಗೆ ಈ ಭಾಗದ ಜನಪ್ರತಿನಿಧಿಗಳ ಸಭೆ ಕರೆಯಲಿದ್ದೇವೆ. ಇದಕ್ಕೆ ಆಡಳಿತಾತ್ಮಕ ಅನುಮೋದನೆ ಕೂಡಾ ನೀಡಲಿದ್ದೇವೆ.

ಗ್ರಾಮೀಣ ಭಾಗದ ಪತ್ರಕರ್ತರಿಗೆ ಆರೋಗ್ಯ ಕಾರ್ಟ್ ಹಾಗೂ ಬಸ್ ಪಾಸ್ ಒದಗಿಸಲು ಮುಂದಿನ ಬಜೆಟ್ ನಲ್ಲಿ ಒದಗಿಸಲಿದ್ದೇನೆ ಎಂದು ಭರವಸೆ ನೀಡಿದರು.

ವಿಜಯಕರ್ನಾಟಕ ಸಂಪಾದಕರಾದ ಹರಿಪ್ರಕಾಶ ಅವರು ಪ್ರಾಸ್ತಾವಿಕ ಮಾತನಾಡಿ ಕೊರೋನಾದಂತ ಮಹಾಮಾರಿಯನ್ನು ಈ ದೇಶ ಯಶಸ್ವಿಯಾಗಿ ಎದುರಿಸಿದೆ. ಭಾರತ ಸರ್ಕಾರ ಸೈನಿಕರು, ಅಧಿಕಾರಿಗಳು, ಆರೋಗ್ಯ ಇಲಾಖೆಯ ಅಧಿಕಾರಿಗಳನ್ನು ಹಾಗೂ ಪತ್ರಕರ್ತರನ್ನು ಕೊರೋನಾ ವಾರಿಯರ್ಸ್ ಎಂದು ಘೋಷಿಸಿತ್ತು. ಪತ್ರಕರ್ತರು ಕೊರೋನಾ ಸಂದರ್ಭದಲ್ಲಿ ಸವಾಲನ್ನು ಎದುರಿಸಿ ಕಾರ್ಯನಿರ್ವಹಿಸಿದ್ದರು.

ಈ ತಲೆಮಾರಿನ ಪತ್ರಕರ್ತರು ಯುದ್ದದಂತ ವಾತಾವರಣ ನೋಡಿರಲಿಲ್ಲ ಆದರೆ ಕೊರೋನಾವನ್ನು ಯುದ್ದೋಪಾದಿಯಲ್ಲಿ ಕೆಲಸ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಸಾವನ್ನಪ್ಪಿದ ‌48 ಪತ್ರಕರ್ತರು ತಲಾ ರೂ 5 ಲಕ್ಷ ಪರಿಹಾರ ಸರ್ಕಾರ ಕೊಟ್ಟಿದೆ. ಇದಕ್ಕೆ ತಗಡೂರು ಅವರ ಶ್ರಮ ಬಹಳ ಇದೆ ಎಂದರು.

ಪತ್ರಕರ್ತರು ಜವಾಬ್ದಾರಿಯನ್ನು ನೈತಿಕತೆಯ ಹೊಣೆಗಾರಿಕೆ ನಿಭಾಯಿಸಬೇಕು. ಡಿಜಿಟಲ್ ಯುಗದ ಪತ್ರಕರ್ತರು ಅತ್ಯಂತ ಕರ್ತವ್ಯಪ್ರಜ್ಞೆಯಿಂದ ಕೆಲಸ ಮಾಡಬೇಕು ಎಂದು ಮನವಿ ಮಾಡಿದರು.

ವಿಜಯವಾಣಿ ಸಂಪಾದಕರಾದ ಕೆ. ಎನ್ ಚೆನ್ನೇಗೌಡ, ಮಾತನಾಡಿ ಸಮಾಜದ ಪ್ರಜ್ಞೆಯ ಪ್ರತೀಕವಾಗಿರುವ ಪತ್ರಕರ್ತರು ತುಂಬಾ ಜವಾಬ್ದಾರಿಯಿಂದ ಕಾರ್ಯನಿರ್ವಹಿಸಬೇಕು. ಆದರೆ, ಕೊರೋನಾದಂತ ವಿಷಯದ ಕುರಿತು ಜನರಲ್ಲಿ ಅರಿವು ಮೂಡಿಸುವ ಬದಲು ಭೀತಿಯನ್ನುಂಟು ಮಾಡುತ್ತಿರುವುದು ವಿಷಾದನೀಯ ಎಂದರು.

ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಮುದ್ರಣ ಕಾಗದದ ಮೇಲಿನ ತೆರಿಗೆಯನ್ನು ಮುಂದಿನ ಜಿಎಸ್ ಟಿ ಸಭೆಯಲಿ ರದ್ದು ಮಾಡಬೇಕು ಎಂದು ಸರ್ಕಾರಕ್ಕೆ ಮನವಿ ಮಾಡಿದರು. ಕೊರೋನ ಸಮಯದಲಿ ಮೃತಪಟ್ಟ ಪತ್ರಕರ್ತರಿಗೆ ಪರಿಹಾರ ನೀಡಿದ್ದು ಸ್ವಾಗತಾರ್ಹ ಆದರೆ ಪತ್ರಕರ್ತರ ಕಲ್ಯಾಣ ನಿಧಿಗೆ ಅನುದಾನ ಒದಗಿಸಬೇಕೆಂದು ಆಗ್ರಹಿಸಿದರು.

ಇದೇ ಸಂದರ್ಭದಲ್ಲಿ ತಗಡೂರು ಅವರು ಬರೆದಿರುವ ಕೊರೋನದ ಕಾಲಘಟ್ಟದಲ್ಲಿ ಹಾಗೂ ಡಾ ಸ್ವಾಮಿರಾವ್ ಕುಲಕರ್ಣಿ ಬರೆದಿರುವ ಮಾಧ್ಯಮ ಹೆಜ್ಜೆಗಳು ಹಾಗೂ ಅವಲೋಕ‌ನ ಎನ್ನುವ ಎರಡು ಪುಸ್ತಕಗಳು ಹಾಗೂ ಕ್ಯಾಲೆಂಡರ್ ಬಿಡುಗಡೆ ಮಾಡಿದರು.

ವೇದಿಕೆಯ ಮೇಲೆ ಪೂಜ್ಯ ಶ್ರೀ ಶರಣಬಸವಪ್ಪ ಅಪ್ಪಾ ಕೇಂದ್ರ ಸಚಿವರಾದ ಭಗವಂತ ಖುಬಾ, ಸಂಸದರಾದ ಉಮೇಶ ಜಾಧವ, ಸಚಿವರಾದ ಮುರುಗೇಶ ನಿರಾಣಿ, ಕೆಕೆ ಆರ್ ಡಿಬಿ ಅಧ್ಯಕ್ಷರಾದ ದತ್ತಾತ್ರೆಯ ಪಾಟೀಲ ರೇವೂರು, ವಿರೋಧ ಪಕ್ಷದ ಮುಖ್ಯ ಸಚೇತಕರಾದ ಡಾ ಅಜಯ್ ಸಿಂಗ್, ಶಾಸಕರಾದ ಸುಭಾಷ್ ಗುತ್ತೇದಾರ, ಅವಿನಾಶ ಜಾಧವ, ಬಸವರಾಜ ಮತ್ತಿಮುಡ, ಎಂ ಎಲ್ ಸಿ ಬಿ.ಜಿ. ಪಾಟೀಲ್, ಶಶಿಲ್ ನಮೋಸಿ, ಅರಣ್ಯ ಪ್ರಾಧಿಕಾರದ ಅಧ್ಯಕ್ಷರಾದ ತಾರಾ ಅನುರಾಧ, ವಿಜಯಕರ್ನಾಟಕ ಸಂಪಾದಕರಾದ ಹರಿಪ್ರಕಾಶ ಕೋಣೆಮನಿ, ವಿಜಯವಾಣಿ ಸಂಪಾದಕರಾದ ಕೆ. ಎನ್ ಚೆನ್ನೇಗೌಡ, ಕ.ಕಾ.ನಿ.ಪತ್ರಕರ್ತರ ಸಂಘದ ರಾಜ್ಯಾಧ್ಯಕ್ಷರಾದ ಶಿವಾನಂದ ತಗಡೂರು, ಜಿಲ್ಲಾಧ್ಯಕ್ಷರಾದ ಭವಾನಿಸಿಂಗ್ ಠಾಕೂರು, ರಾಜ್ಯ ಕಾರ್ಯದರ್ಶಿ ಹಣಮಂತರಾವ್ ಭೈರಾಮಡಗಿ, ಜಿಲ್ಲಾ ಕಾರ್ಯದರ್ಶಿ ದೇವಿಂದ್ರಪ್ಪ ಅವಂಟಿ, ಸೇರಿದಂತೆ ಹಲವರು ಇದ್ದರು.